Primeros años y educación

Robert Kocharián nació en 1954, na rexón de Nagorno-Karabakh, que daquella taba sol dominiu de la RSS d'Azerbaixán. Recibió la so educación secundaria en Stepanakert, la capital d'aquella rexón, y realizó el so serviciu militar nel Exércitu soviéticu ente los años 1972 y 1974.^[3] Darréu viaxó a la RSS d'Armenia, onde ingresó a estudiar inxeniería llétrica nel Institutu Politéunicu de Yereván, onde se tituló en 1982.

Era soviética

Dende 1980, Kocharián foi miembru del Komsomol y militante de la caña llocal del Partíu Comunista de la Xunión Soviética. En 1988, tres violentos conflictos étnicos escontra la población armenia en Nagorno-Karabakh, Kocharián foi unu de los partidarios de que la rexón fora anexada por Armenia. Pa remediar la situación, el Sóviet Supremu de la URSS decretó l'alministración direuta de la rexón, pero aun así, siguieron los casos de hostigamiento y espulsiones de les comunidaes armenies en ciudaes y rexones azerbaixanes, faciendo que Kocharián aumentara la so condena escontra estos actos de violencia.^[3]

En febreru de 1989, Kocharián foi escoyíu diputáu del Sóviet Supremu, representando la rexón de Nagorno-Karabakh, y tamién foi parte del Presidium. Tamién aportó a miembru del Comité Karabakh, organización de corte nacionalista, que magar en primer instancia buscaba reunificar la rexón de Nagorno-Karabakh, tamién foi unu de los primeros grupos opositores al Partíu Comunista d'Armenia. N'ochobre de 1989, el Comité Karabakh pasa a ser el Movimientu Nacional Panarmenio (HHSh), que llogra una victoria aplastante nes eleiciones pluralistes del Sóviet Supremu, realizaes el 20 de mayu de 1990, na que'l so líder, Levon Ter-Petrosián, llanza un programa nacionalista, qu'esixe la independencia d'Armenia de la URSS, y el cese a les hostilidaes en Nagorno-Karabakh.^[3]