Propaganda estauxunidense na Segunda Guerra Mundial, faciendo un llamáu a los ciudadanos a aumentar la producción.

Propaganda ye una información presentada y difundida col enfotu d'influyir na ciudadanía pa que faigan una aición determinada. Magar que'l mensax contenga información verdadera, ye posible que seya partidista, nun presentar un cuadru completu y equilibráu del oxetu en cuestión. L'emplegu primariu provién del contestu comercial y del políticu, referiéndose polo xeneral a los esfuercios patrocinaos por gobiernos o partíos.

L'oxetivu de la propaganda política ye aumentar el sofitu (o la refuga) a una cierta posición, enantes que presentar esta posición. L'oxetivu de la propaganda ye la opinión de la xente, non la información. Por mor d'ello, la información que tresmite la propaganda ye frecuente que tenga una alta carga emocional, faciendo un llamáu a los sentimientos patrióticos.

N'inglés, la pallabra propaganda suel tener fuertes connotaciones ñegatives (y tamién polítiques). Nun ye necesariamente asina n'otres llingües, y l'emplegu del términu pue llevar a confusión. Por exemplu en Brasil y dellos países de fala hispana, especialmente n'América del Sur, propaganda usualmente val pa referise a la forma más común de manipulación de la información: la publicidá. En realidá la propaganda intenta modificar la voluntá con intención política, demientres que la publicidá tien otros oxetivos y estética dafechamente estremaos.

Referencies

Enllaces esternos

• Wikimedia Commons tien conteníu multimedia tocante a Propaganda.