Phocidae

Phocidae;
Clasificación científica
Reinu:	Animalia
Filu:	Chordata
Subfilu:	Vertebrata
Clas:	Mammalia
Subclas:	Theria
Infraclas:	Placentalia
Orde:	Carnivora
Suborde:	Caniformia
Superfamilia:	Pinnipedia
Familia:	Phocidae; Gray, 1821
Xéneros
	Cystophora; Erignathus; Halichoerus; Histriophoca; Hydrurga; Leptonychotes; Lobodon; Mirounga; Monachus; Neomonachus; Ommatophoca; Pagophilus; Phoca; Pusa;
Consultes
	[editar datos en Wikidata]

Paul de Vos

Los fócidos o foques verdaderes (Phocidae) son una familia de mamíferos pinnípedos marinos afechos a vivir en medios acuáticos la mayor parte del tiempu. El nome común deriva direutamente del llatín phoca, que de la mesma tien el so orixe nel griegu φώκη (phṓkē).

Conócense 19 especies. Escarecen de pabellón auditivu y les sos estremidaes posteriores tán dirixíes escontra tras y nun son funcionales nel desplazamientu terrestre, carauterística que los estrema de los otáridos (llobos y osos marinos).

Carauterístiques

Les foques habiten les rexones costeres de bona parte del globu, cola esceición de les zones tropicales. Tienen cuerpos allargaos y fusiformes, afechos a la natación; les estremidaes anteriores son curties y esplanaes, meyor preparaes pal so usu como aletes que pal desplazamientu en tierra, anque delles especies pueden movese a gran velocidá emplegando movimientos de reptación. Les posteriores adopten una posición fixa escontra tras, y nun pueden retraerse. A diferencia d'otros pinípedos, les foques escarecen por completu de pabellón auricular.

La pelame de les foques ye xeneralmente curtiu y mestu n'edá adulta; la mayor parte de la proteición térmica nun la ufierta ésti, sinón la gruesa capa de grasa subcutáneo, que puede representar hasta un cuartu del pesu del animal. Delles especies escarecen casi de pelo.

Bioloxía y ecoloxía

La estructura social de les foques varia descomanadamente ente especies; a diferencia de los lleones marinos, nun suelen formar grandes colonies. Delles especies formen pareyes monógames, otres acomúñense en pequeñes tribus, y los elefantes marinos formen menaes compuestes por un machu dominante y un harén de femes. Son predadores por demás eficaces, alimentándose de peces, crustáceos y cefalópodos, anque dalguna especie prinda tamién pingüinos.

Les foques son capaces de nadar grandes distancies y somorguiase a grandes fondures pa prindar la so presa; la foca de Weddell puede somorguiase hasta 600 m sol nivel del mar. Les distancies que tienen de cubrir mientres l'alimentación imponen un ritmu peculiar a la lactancia; la lleche de les foques ye por demás rica en caloríes pa dexar al cachorru sobrevivir mientres les llargues ausencies de la so madre.

La variedá de tamañu ente les foques ye notable; delles especies del xéneru Phoca nun superen el pesu d'un humanu adultu, ente que los elefantes marinos machu pesen más de 3.500 Kg, entá más que les morses. Ello ye que los elefantes marinos son los mamíferos marinos más grandes ente los non cetáceos.

Les foques comunes nun son unos mamíferos migratorios. Amás, suelen dir en grupos de cien exemplares y tienen preferencia por dir a mariñes, badees, etc.^{[ensin referencies]}

La inmensa mayoría de les foques naden nes salaes agües marines, pero la foca del Baikal pasa tola so vida nes agües duces d'esti llagu, en Siberia, carauterística única na so especie. Sábese que la foca común n'ocasiones salea n'estuarios y ríos pa buscar comida. Tamién hai subespecies tantu d'esta especie como de la foca ocelada que viven en llagos ensin salida al mar.

Evolución

Los fósiles de pinnipedos más antiguos conocíos daten del Miocenu mediu, con una edá d'unos 15 millones d'años y fueron escavaos na rexón del Atlánticu Norte. Los estudios xenéticos indiquen que los pinnípedos tán emparentaos colos úrsidos y los mustélidos, pero hasta agora teníense pocos datos paleontolóxicos que lu confirmaren y qu'amosaren la so evolución morfolóxica.^[1]^[2]

Clasificación

Los Phocidae clasifíquense como sigue:^[3]^[4]

Familia Phocidae
- Miophoca†
- Palmidophoca†
- Subfamilia Monachinae
  - Afrophoca†
  - Australophoca†
  - Tribu Monachini
    - Monachopsis†
    - Pristiphoca†
    - Properiptychus†
    - Messiphoca†
    - Mesotaria†
    - Callophoca†
    - Pliophoca†
    - Pontophoca†
    - Monachus monachus (foca monxu del Mediterraneu)
    - Neomonachus schauinslandi (foca monxu de Ḥawai)
    - Neomonachus tropicalis† (foca monxu del Mar Caribe) (Probablemente estinguida hacia l'añu 1950)
  - Tribu Miroungini
    - Mirounga angustirostris (elefante marín septentrional)
    - Mirounga leonina (elefante marín meridional)
  - Tribu Lobodontini
    - Hadrokirus†
    - Monotherium†
    - Ommatophoca rossii (foca de Ross)
    - Lobodon carcinophagus (foca cangrejera)
    - Hydrurga leptonyx (foca leopardo)
    - Leptonychotes weddellii (foca de Weddell)
  - Acrophoca longirostris† (foca cuello de cisne)
  - Piscophoca†
  - Homiphoca†
- Subfamilia Phocinae
  - Kawas†
  - Nanophoca†
  - Pachyphoca†
  - Devinophoca†
  - Sarmatonectes†
  - Leptophoca†
  - Praepusa†
  - Cryptophoca†
  - Erignathus barbatus (foca barbuda)
  - Cystophora cristata (foca de cascu o capuchina)
  - Tribu Phocini
    - Phoca vitulina (foca común o de puertu)
    - Phoca largha (foca enllordiada)
    - Pusa hispida (antes Phoca hispida; foca anillada)
    - Pusa sibirica (antes Phoca sibirica; nerpa o foca del Baikal)
    - Pusa caspica (antes Phoca caspica; foca del Caspiu)
    - Pagophilus groenlandica (antes Phoca groenlandica; foca de Groenlandia)
    - Histriophoca fasciata (antes Phoca fasciata)
    - Phocanella†
    - Platyphoca†
    - Gryphoca†
    - Halichoerus grypus (foca gris)

Referencies

↑ Rybczynski, N. (2009). “A semi-aquatic Arctic mammalian carnivore from the Miocene epoch and origin of Pinnipedia”. Nature 458 (7241): 1021–24.
↑ ZCO-1999: Puijila darwini: la foca con rabu qu'anduvo a cuatro pates
↑ Peter Saundry. 2010. True Seals. Encyclopedia of Earth. topic ed. C.Michael Hogan, ed. in chief C.Cleveland, National Center for Science and the Environment, Washington DC
↑ Martin-Scheel D, Slater GJ, Kolokotronis S-O, Potter CW, Rotstein DS, Tsangaras K, Greenwood AD, Helgen KM (2014) Biogeography and taxonomy of extinct and endangered monk seals illuminated by ancient DNA and skull morphology. ZooKeys 409: 1–33. doi: 10.3897/zookeys.409.6244

Bibliografía

ZCO-1999. «foca-ensin-aletes-que-anduvo-a cuatro pates/ Puijila darwini: la foca con rabu qu'anduvo a cuatro pates». Consultáu'l 7 d'abril de 2010.

Enllaces esternos

Wikimedia Commons tien conteníu multimedia tocante a Phocidae.
Wikcionariu tien definiciones y otra información tocante a foca.

Phocidae en "Fauna ibérica; mamíferos". Ángel Cabrera Latorre. 1914. Facsímil electrónicu.

This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.

[1] Rybczynski, N. (2009). “A semi-aquatic Arctic mammalian carnivore from the Miocene epoch and origin of Pinnipedia”. Nature 458 (7241): 1021–24.

[2] ZCO-1999: Puijila darwini: la foca con rabu qu'anduvo a cuatro pates

[3] Peter Saundry. 2010. True Seals. Encyclopedia of Earth. topic ed. C.Michael Hogan, ed. in chief C.Cleveland, National Center for Science and the Environment, Washington DC

[4] Martin-Scheel D, Slater GJ, Kolokotronis S-O, Potter CW, Rotstein DS, Tsangaras K, Greenwood AD, Helgen KM (2014) Biogeography and taxonomy of extinct and endangered monk seals illuminated by ancient DNA and skull morphology. ZooKeys 409: 1–33. doi: 10.3897/zookeys.409.6244

[1]

[2]

[3]

[4]