Franquismu

Bandera d'España mientres el franquismu.

Franquismu ye'l términu emplegáu pa referise a la ideoloxía política y movimientu social que sirvió de sofitu y sustentu al réxime surdíu n'España mientres la guerra civil ente 1936 y 1939, y que lideráu pol xeneral Francisco Franco, prevaleció hasta la so muerte en 1975.

Les bases del réxime fueron ente otres el nacionalismu español, el catolicismu y l'anticomunismu, que sirvieron de sofitu d'un réxime de dictadura autoritaria que se autoproclamó como «democracia orgánica» n'oposición a la democracia parllamentaria.

A partir de les derrotes d'Italia, Alemaña y Xapón na Segunda Guerra Mundial, el réxime va desfaciéndose del so calter pro-fascista, anque sigui utilizando la so simboloxía. El franquismu tuvo que buscar nueves aliances internacionales, y foi menguando'l papel de la Falanxe en favor d'otros grupos políticos. Na década de los años 60 apaeció una xeneración de políticos tecnócrates formaos nel Opus Dei y rompióse l'aislamientu internacional.

Carauterístiques y fundamentos ideolóxicos

Mientres los años del franquismu caltuvieron una serie de fundamentos políticos ya ideolóxicos, carauterísticos dalgunos de los rexímenes fascistes, y otros propios del franquismu; ente ellos:

Antiliberalismu: el franquismu ye un sistema dafechu opuestu a toa clase de llibertá política o social; polo tanto opuestu a la democracia, a la separación de poderes, a que la soberanía nacional more nel pueblu, al "laisser faire", etc.

Autoritarismu: el réxime de Franco intentó introducise y apoderase de tolos aspeutos de la vida nacional y social, per aciu una serie d'organizaciones de encuadramiento social, dirixíes principalmente pola FET de les JONS.

Antiparlamentarismo: por cuenta de la creencia de Franco de que la democracia lliberal y los partíos políticos causaren la decadencia n'España. Sustitúyese la democracia parllamentaria pola "democracia orgánica", un sistema pseudo-democrático, suxeta, en realidá, a la voluntá de Franco, y caltenida hasta la so muerte.

Anticomunismu: tamién s'oponía por completu al comunismu, y ello ye que a toa ideoloxía d'izquierdes, yá seya la izquierda radical revolucionaria o la burguesía democrática. Dellos lemas del franquismu reflexen esta idea, como «Centinela d'Occidente», xixilando que'l comunismu nun llegara a España nin al restu d'Occidente.

Nacionalcatolicismu: el réxime taba estrechamente rellacionáu cola Ilesia Católica y bien especialmente col ultramontanismo, espresáu na participación del Opus Dei na represión político-social y los privilexos de los que goció. El clericalismu católicu controlaba en gran midida la sociedá per aciu la censura, la prensa, el códigu penal, etc. El nacionalcatolicismu foi'l principiu ideolóxicu qu'actuó de soporte pa encontar la depuración que llevóse a cabu pa purgar l'Estáu Republicanu de desafectos escontra los principios del Movimientu, foi especialmente intensa la depuración del Maxisteriu español tres la Guerra Civil Española.

Nacionalismu esencialista y centralismu: opuestu a 1) cualquier tipu de nacionalismu (inclusive al nacionalismu lliberal español) qu'amenacie la unidá de la nación española o ponga en cuestión la esistencia intemporal de la nación y les sos esencies ancestrales y imperecederas (l'idioma, la cultura, la historia, la relixón y la raza), y 2) a cualquier forma d'autogobiernu rexonal. Mientres les dos primeres décades de la dictadura prohibióse y escorrió l'usu en públicu d'otres llingües (catalán, gallegu, asturianu, eusquera), una política de represión que s'anidió a partir de la década de 1960. Coles mesmes, prohibiéronse les banderes y demás símbolos rexonales, sacante los de la nación española, según los modelos franquistes. El centralismu políticu y alministrativu namái toleró como esceiciones el tratu estremáu espacháu a Navarra y a Álava como contraprestación pol sofitu brindáu a Franco polos Carlistes mientres la guerra.

Tradicionalismu: mientres la dictadura aponderábense les tradiciones y los vieyos símbolos, remembrando de cutio la edá d'oru d'España, los Reis Católicos, los fueros (contrapuestos a constituciones modernes)...

Militarismu: l'exércitu foi consideráu garante y defensor de les esencies patries.

Partíu únicu: namái se dexó la esistencia de la Falanxe Española Tradicionalista de les Xuntes d'Ofensiva Nacional Sindicalista (FET de les JONS), más tarde rebautizáu como "Movimientu Nacional" (1958), a partir de la unión de la Falanxe Española (fundada por José Antonio Primo de Rivera) y la "Comunión Tradicionalista" de los Carlistes. El restu de partíos fueron puestos fora de la llei.

Corporativismu sindical: col Fueru del Trabayu prohíbense, al igual que los partíos, los sindicatos de trabayadores o patronos, y créase sicasí un sindicatu vertical, reguláu dende'l gobiernu.

Control de los medios de comunicación: bien al traviés de la censura, bien al traviés del control d'otros medios de comunicación como Radio Nacional d'España, Radiotelevisión Española y otros periódicos como L'Alcázar, el Diariu Enriba (oficial del réxime) y otros.

Influencia nes families: al traviés de diverses organizaciones de la FET, al envís d'espublizar, na mayoría de los casos, determinaos principios ideolóxicos conservadores. Dellos exemplos d'instituciones qu'operaron nesti sentíu fueron la Seición Femenina, el Frente de Mocedá, la FEN, la OJE, etc.

Cultu al Caudiellu: Impúnxose una esaltación de la persona de Franco, usando llamatos como "Caudiellu"; "Salvador d'España"; "la espada más llimpia d'Europa"; "Centinela d'Occidente"...

Referencies

Enllaces esternos

This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.