La Orquesta Sinfónica del Principáu d'Asturies (OSPA)[1] ye una orquesta sinfónica que tien la so sede nel Principáu d'Asturies, más concretamente na ciudá d'Uviéu, siendo una de les dos orquestes de la ciudá cumu la Uviéu Filarmonía.

Historia

La orquesta fundóse nel mes de mayu de 1991 y dió'l so primer conciertu nel Teatru Campoamor el 12 de mayu del mesmu añu.En 1996 les representaciones nel Teatro Municipal y la Catedral de Santiago de Chile, onde dos años más tarde volveríen tocar, y nel Auditoriu Arquímedes de Méxicu DF. Na temporada 2003-2004 la orquesta tocó n'Euskadi con un bon recibimientu, y na temportada 2004-2005 la orquesta fizo una xira nacional actuando nel Palau de la Música de Barcelona y nos auditorios de Castellón y Zaragoza, recibiendo perbones crítiques.Na temporada 2005-2006, la OSPA actúo nel Auditoriu Nacional de Madrid en dos importantes celebraciones, la primera d'elles con motivu del Centenariu de la nacencia del Profesor Severo Ochoa, conciertu entamáu pola Universidá Politéunica de Madrid, y na segunda ocasión por cuenta de la celebración del XXV aniversariu de la Fundación Príncipe d'Asturies; amás, actúo nel Auditoriu de Santiago de Compostela dientro de la temporada de la Orquesta Real Filharmonía de Santiago de Compostela.Na temporada 2007-2008, la Orquesta Sinfónica del Principáu d'Asturies realizó una xira de seis conciertos nes ciudaes de Beixín, Shanghai, Dalian, Anshan y Shangxing. Na temporada 2011-2012, la OSPA convirtióse na primera sinfónica del estáu en tocar na Sala Nervi del Vaticanu, nun conciertu homenaxe al Papa Benedictu XVI dirixía por Maximiano Valdés.Tamién participaron en dellos festivales: Festival de Música Relixosa de Cuenca, Festival Internacional de Música y Danza de Granada , Festival Internacional de Música contemporánea d'Alicante, estrenando obres de Jesús Rueda, García Román, García Demestres, etc., Festival Intercélticu de Lorient col estrenu de La Nueche Celta del compositor asturianu Ramón Prada.

Actualmente la orquesta ta compuesta por músicos de 20 nacionalidaes distintes ente les que s'atopen dellos países de la Xunión Europea , Rusia, EAX , Asia y Llatinoamérica, con la direicción titular del maestru Rossen Milanov. Dende la temporada 2012-2013 el so principal direutor invitáu ye David Lockington.

Actividaes

La so actividá musical toma tou tipu de programaciones realizando la orquesta más de 70 conciertos al añu n'escenarios como'l Teatru Xovellanos de Xixón, l'Auditoriu de la Casa de la Cultura d'Avilés y escenarios nes principales llocalidaes asturianes mientres el so ciclu Branu nes Villes , amás de los conciertos que realiza na so sede principal, l'Auditoriu Príncipe Felipe d'Uviéu.

Participa tamién na Temporada d'Ópera de l'Asociación Asturiana d'Amigos de la Ópera nel Teatru Campoamor, recibiendo crítiques bien emponderadores de la prensa rexonal y nacional.

Componentes

Mientres toos estos años túvose bien en cuenta la presencia de destacaos mozos asturianos: José Gómez, Pablo González, Mariano Rivas, Lola Casariego, Juan Castelao, Dmitri Atapine, David Menéndez, Ana Nebot, Alejandro Roy, Mª José Suárez, etc.

Direutores

Al ésitu de la OSPA contribuyeron los sos anteriores direutores titulares Jesse Levine y Maximiano Valdés, pero tamién batutes maestres como Rossen Milanov, David Lockington, Perry So, Kynan Johns, Arturo Tamayo, Odón Alonso, Krzysztof Penderecki, Víctor Pablo Pérez, Aldo Ceccato, Alexander Rahbari, Tamás Vásáry, Jan Latham-Koenig, Cristóbal Halffter, Juan José Mena, Alberto Zedda, Antoni Ros Marbá, López Cobos, John Axelrod, Howard Griffiths y Edmon Colomer, d'ente una llarga llista.

Solistes

Tamién perampliu ye el repartu de grandes solistes qu'actúen al pie de la OSPA: Truls Mørk, Dylana Jenson, Frank Peter Zimmermann, Luciano Pavarotti, Alfredo Kraus, Montserrat Caballé, Carlos Álvarez, Ainhoa Arteta, Elizabeth Connell, Ana Mª Sánchez, María Orán, María Bayo, Alicia de Larrocha, Joaquín Achúcarro, Amanda Roocroft, Patricia Kopatchinskaja, Asier Polo, Josep Colom, Marco Rizzi, Marc-André Hamelin, Elmar Oliveira, David Geringas, Janine Jansen, Asier Polo, Renaud Capuçon, Anne Gastinel, Bruno Gelber, Indra Tomás, René Pape, Luciana d´Intino, Marco Berti, Cheen Yu, Roberto Díaz, Arto Noras, Louis Lortie etc., amás de los coros de la Fundación Príncipe d'Asturies, Orfeó Catalá, Orfeón Donostiarra, Comunidá de Madrid y RTVE.

Referencies

  1. ↑ Academia de la Llingua Asturiana (2007). Cartafueyos Normativos. Abreviatures, rotulaciones y propuestes d’espresión y llocución. ISBN 978-84-8168-421-6.
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.