Pabellón d'Asturies de la EXPO'92

Ye l'edificiu que representó a Asturies na Esposición Universal de Sevilla de 1992. Treslladóse al muséu en 1994 y acueye la receición del muséu, el salón d'actos y les sales d'esposiciones temporales. Anguaño amuésense nelli la esposición Los asturianos na cocina. La vida doméstica n'Asturias, 1800-1965, que presenta al traviés d'oxetos domésticos y imáxenes les carauterístiques y la evolución de la sociedá asturiana nesi periodu.

Casa de los González de la Vega

Construyida en Serín (Xixón) en 1757 por don Antonio González de la Vega. Treslladóse al muséu en 1972. Constitúi una bona muestra de casona rural asturiana con corredor, escudu y capiella asitiada nel portal d'entrada. Nella s'alcuéntra'l Muséu de la Gaita, nel que se presenta una coleición de gaites del norte d'África y Europa, especialmente de Francia, Reinu Xuníu y Península Ibérica (Asturies, Galicia, Mallorca, Aragón y Tras-os-Montes). Tien una sala dedicada a la gaita asturiana y otra al restu d'instrumentos de la tradición musical n'Asturies, dende los más cenciellos (carraques, castañueles, panderos) hasta los reproductores mecánicos popularizaos a fines del sieglu XIX (pianoles, gramófonu...).

Casa de los Valdés

Casa fidalga urbana edificada nel sieglu XVII na Villa de Candás por una de les rames d'esti antiguu y poderosu fonduxe asturianu. Treslladóse al muséu en 1970 y reformada y ampliada nel 2000. Acueye la Fototeca d'Asturies, integrada por unes quinientes mil imáxenes, y esposiciones temporales dedicaes fundamentalmente a la fotografía asturiana.

Pabellones de ferramientes agrícoles y medios de tresporte

Nel Pabellón 1 espónense les ferramientes preindustriales pa trabayar la tierra (cambielles, sechorios, llabiegos, gradies...), y pa recoyer y esgranar los cereales, asina como dos carros del país.

Nel Pabellón 2 amúesense les ferramientes industriales y carros que, a fines del sieglu XIX y entamos del XX, sustituyeron a munchos de los anteriores nel trabayu agrícola (araos de vertedera, semadores, salladoras, máquina mayadora de cereales, esgranadores de maíz...).

Nel Pabellón 3 espónense diferentes modelos de medios de tresporte tradicionales: un ramu y una carriella, que son vehículos ensin ruedes utilizaos nos pueblos de monte; dellos modelos diferentes de carros del país, y una xarré.

Casa de campesinos

Modelu de vivienda terrena mui común ente los campesinos del centru d'Asturies. Los exemplos más antiguos daten del sieglu XVII. Ta formada por cocina, dos cuartos, una corte con tenada p'almacenar la yerba y un portal que da pasu a estos espacios. Tolos muebles, arriazos y ferramientes correspuenden a los d'una vivienda de la segunda metá del sieglu XIX. Na cocina puen vese'l llar colos escaños y el sardu de vares d'ablanu entemecíes pa ensugar les castañes; el fornu y la masera pal pan; el bogaderu para colar la ropa; el duernu pa salar la matanza; l'arca pa guardar la ropa; el ferraderu para colgar les ferraes de l'agua; el plateru y el vasar. Nún de los cuartos hai un telar pa texer el filu de llana y llinu que se producía na mesma casa. La visita recrea con fidelidá l'ambiente d'una casa campesina antigua onde nun había lluz llétrica, y el llume y el fumu del llar constituyíen una parte perimportante de la vida doméstica. Xunto a la casa hai una güerta coles plantes melecinables más emplegaes na Asturies rural.

Pisón o Molín de rabilar

Molín de mano utilizáu pa escamochar la grana de la escanda, cubierta d'una cáscara (poxa) que ye preciso quitar enantes de llevala al molín fariñeru. La escanda yera un cereal mui estendíu n'Asturies, col que s'ellaboraba un pan mui apreciao. Esti tipu de molín de mano foi introducíu n'Asturies nel sieglu XVII. En dellos pueblos yera de propiedá comunal y n'árees más afayadices pa l'agricultura yera frecuente nes cases de campesinos acomodaos. Güei queden mui pocos exemplares. El pisón del muséu procede de Llanuces (Quirós) y foi treslladáu en 2001.

Llagar de sidra

El modelu d'esti edificiu ta tomáu d'un llagar de Tueru (Villaviciosa), construyíu en 1900. Nel so interior amuésense dos de los tipos de prenses de sidra más frecuentes n'Asturies: el llagar de pesa procedente de Llue (Colunga) y el llagar de sobigañu d'El Toral, Argüeru (Villaviciosa), asina como tolos utensilios y recipientes que s'emplegaben pa ellaborar, almacenar y consumir la sidra.

Horros y paneres

Nel muséu hai trés horros y dos paneres de los sieglos XVIII y XIX procedentes de los conceyos de Xixón y Carreño. Estes construcciones yeren inseparables de la casa campesina y s'emplegaben pa guardar les colleches de granu, la matanza, y otros alimentos y archiperres (ropa de vistir y de cama, sielles de montar, etc.). La panera allugada frente a la casa data de 1856 y tien una llustrosa decoración de motivos florales tallaos y pintaos con vives colores, como ye común nuna estensa área del centru d'Asturies.

Corru y teitos

Construcciones emplegaes pa'abellugu de pastores y vaqueiros, feches con piedra, madera y escoba, y carauterístiques de los llugares de pación más altos del monte asturianu.

Bolera y tendayu

La bolera s'edificó en 1973 pa la modalidá de cuatreada y nella se celebren concursos añales de bolos. El tendayu se llevantó en 2007 pa la realización d'eventos y actividaes al aire llibre. Ta construyíu siguiendo antiguos modelos de carpintería d'armar y decorado con motivos tallaos tomados d'horros y paneres de los sieglos XVIII y XIX.