Prehistoria y Edá Antigua

Bandera de Menorca.

Escudu de Menorca.

Dende les primeres civilizaciones presentes na islla, numberosos pueblos turnáronse'l poder del territoriu.

A una primera etapa de civilización primitiva, supuestamente d'orixe peninsular, siguió-y otra mui brillante na Edá del Bronce, conocida como talayótica, carauterizada por construcciones megalítiques similares a les de Mallorca, Cerdeña o Malta, si bien con dalgunos elementos orixinales como son les taules.

A les visites de fenicios a la que denominaben Nura (Tierra de Fueu) y griegos focenses quienes la nomaben Meloussa (llugar de ganáu), de forma pacífica pa establecer venceyos comerciales siguió la de los cartaxineses con distinta actitú. Desembarcaron a les órdenes de Magón, hermanu d'Aníbal y reclutaron a la fuercia a los hábiles flonderos baleares, que foron protagonistes destacaos nes Guerres Púniques. Los cartaxineses fundaron, nel sieglu VII e.C. los enclaves de Jamma (actual Ciutadella de Menorca, y Magon, Maó). La cultura talayótica perduraría en Menorca más allá de que Quintu Ceciliu Metelu (que recibiría más tarde'l sobrenome de Balearicus), conquistara la islla pa la República romana nel añu 123 e.C. (xunto col restu de les Baleares).

Nel añu 427 la islla vivió la conquista de los vándalos. Supuestamente Menorca convirtióse en territoriu bizantín a la cayida del reinu vándalu, conquistada por Belisariu. Sía que non siguen sieglos d'escuridá y aislamientu, nos que la islla foi atacada por normandos y árabes.

Menorca islámica

Los árabes nun s'asitiaron definitivamente en Menorca hasta l'añu 903, en que foi conquistada y xunida al Califatu de Córdoba. A pesar de la tardida conquista, la islamización de la islla foi intensa. En 1232, tres años dempués de la conquista de Mallorca por Xaime I el Conquistador, la Menorca musulmana fíxose tributaria de la Corona d'Aragón, permaneciendo con una importante autonomía mediu sieglu más.

Reconquista cristiana: el reinu de Mallorca na Corona d'Aragón

La islla foi conquistada por Alfonsu III d'Aragón el 17 de xineru de 1287, festividá de San Antón, (ésta ye la razón de que'l 17 de xineru sía'l día de Menorca o "Diada"), que, según Ramón Muntaner, procedió a la deportación y venta como esclavos de la población musulmana que moraba na islla y so posible repoblación con colonos catalanes. Sicasí otros reputaos historiadores, como Dª Mª Luisa Serra, afirmen qu'esta repoblación nun foi tal, yá que'l númberu de colonos qu'instaláronse na islla, procedentes de tola Corona d'Aragón foron mui inferiores en númberu a la población que permaneció y que foron reabsorbíos pola mesma. So socesor Xaime II el Xustu diósela a Xaime II de Mallorca tres el tratáu d'Anagni (1295), pasando a formar parte del Reinu de Mallorca. En 1343, Pedru el Ceremoniosu arrampuña Menorca al rei de Mallorca, Xaime III (paso previu a la propia desaparición del reinu, anexonáu a la Corona d'Aragón).

Cala de Turqueta (Ciutadella)

La Menorca de la corona d'Aragón beneficiose de la rellumanza marítimo y comercial de dicha corona, pero a partir de finales del sieglu XIV, la islla esperimenta un drásticu procesu de despoblación y decadencia económica. Esti procesu algamó cotes alarmantes nos sieglos XV y XVI, debíu a pluralidá de motivos. Fundamentalmente les lluches sociales ente los campesinos y l'aristocracia, similares y coetanees a les Xermaníes del reinu de Valencia y de Mallorca o a les de la revuelta catalana contra Xuan II. Tamién influyeron los ataques otomanos, que saquearon y destruyeron Maó (1535, pol corsariu otomanu Aruj, gobernador d'Arxel pa la Sublime Puerta asina como hermanu del que foi l'almirante otomanu Jeireddín Barbarroxa y la entonces capital Ciutadella (1558, pol corsariu otomanu Piali, lo qu'amenació cola despoblación casi absoluta de la islla.