Primeros años

La carrera de Meg Ryan empezó con una intervención na serie de televisión As the World Turns (1982), pa pocu dempués consiguir el so primer papel relevante nel cine cola película Top Gun (1986), protagonizada por Tom Cruise y anguaño el so trabayu más taquilleru con 353 millones de dólares. Al añu siguiente interpretó a Lydia Maxwell en Innerspace, na que conoció al que sería'l so home mientres diez años, Dennis Quaid.

Interpretó'l orgasmu que-y dio fama na comedia romántica When Harry Met Sally (1989), xunto a Billy Crystal, Netflix publicó que «esta comedia romántica con Meg Ryan y Billy Cristal ye difícil que non te guste». Trabayó con Tom Hanks nes comedies romántiques Joe Versus the Volcano (1990)y Sleepless in Seattle (1993) poles que recibió nominaciones al Globu d'Oru a la meyor actriz de comedia o musical.

En 1991 interpreta a Pamela Courson, la novia de Jim Morrison, na película The Doors d'Oliver Stone, compartiendo creitos con Val Kilmer. Al rematar esti filme y pasalo nos cines, la familia de Pamela taba bien fadia pola forma en que s'amuesa a Courson, faciéndola pasar por drogadicta cuando según ellos la realidá foi que Morrison yera quien la inducía. El próximu proyeutu foi Prelude to a Kiss (1992) con Alec Baldwin y en 1995 foi candidata al Premiu al Sindicatu d'Actores a la meyor actriz pol drama When a Man Loves a Woman, na qu'interpretaba a una muyer que sufría d'alcoholismu. Esi mesmu añu tamién estrenó la comedia I.Q., con Tim Robbins y Walter Matthau, estrenada n'avientu de 1994.

1995-2000

En 1995 protagonizó y debutó como productora con French Kiss na qu'interpretaba a una muyer que se diba a Francia pa tratar de recuperar al amor de la so vida. Tamién formó parte d'un repartu qu'incluyía a nomes como Hugh Grant, Sam Neill o Robert Downey, Jr nel filme de dómina Restoration (1995). En 1996 dio vida a la capitán Karen Walden en Courage Under Fire (1996), la primer película que tuvo un argumentu cola temática de la guerra del golfu y na que compartió cartelu con Denzel Washington, llogrando una bona respuesta per parte de la crítica. Draguen Antulov dixo que «pa Meg Ryan esta ye la oportunidá pa escaecer la so imaxe de moza de comedia romántica ya interpretar papeles serios, pa variar».

Protagonizó la comedia romántica Addicted to Love (1997) y emprestó la so voz al personaxe d'Anastasia na película de títulu homónimu. En 1998 protagonizó diverses cintes, les comedies romántiques City of Angels con Nicolas Cage y You've Got Mail, de nuevu con Tom Hanks, siendo candidata nuevamente al Globu d'Oru a la meyor actriz de comedia o musical, Y! Online publicó que «la química ente Hanks y Ryan ye innegable». Dambes producciones recaldaron 198 y 250 millones de dólares respeutivamente. Intervieno con Sean Penn y Kevin Spacey nel drama independiente Hurlyburly. Darréu llegaríen les cintes Hanging Up (2000), Kate and Leopold (2001) y la cinta d'aición Proof of Life (2000), con Russell Crowe como compañeru de repartu y con quien caltuvo una curtia rellación sentimental.

2003-presente

Amosó'l so cuerpu desnudu per primer vegada na pantalla col drama eróticu In the Cut (2003), dirixíu por Jane Campion y del que s'afirmó «por enforma que Meg Ryan quiera ganar un Óscar, desafortunadamente, nun pasa la corte».^{[ensin referencies]} Al añu siguiente protagonizó Against the Ropes (2004), interpretando a Jackie Kallen, una mánager de boxéu. Intervieno nun personaxe secundariu, como una muyer enferma de cáncer de mama, en In The Land Of Women (2007) y trabayó a les órdenes de Diane English y xunto a Eva Mendes, Debra Messing y Annette Bening en The Women (2008), pola que recibió la so primer candidatura al Razzie a la peor actriz. La prensa cinematográfica dixo «Meg Ryan ta perbién equí, pero The Women ye la típica comedia romántica que fai que los homes odien esti tipu de cine».

En El mio noviu ye un lladrón (2008) tuvo como compañeru de repartu a Antonio Banderas, finalmente la película nun s'estrenó en sales d'Estaos Xuníos, sicasí n'España foi estrenada n'abril de 2008. Tampoco la comedia The Deal, con William H. Macy consiguió ser distribuyida, siendo estrenada direutamente pa videu en xineru de 2009. En 2009 encabezó'l repartu de Serious Moonlight, la cinta foi estrenada n'Estaos Xuníos n'avientu de 2009 y direuta al mercáu domésticu en numberosos países como Arxentina.