Vista del campusantu de Paracuellos[1] cercanu al ríu Jarama, unu de los llugares onde asocedieron estos episodios de represión de la guerra civil española, alzáu n'alcordanza y memoria de los executaos. Al fondu de la imaxe, una cruz blanca de grandes dimensiones, na fastera del "cuetu de San Miguel", ye visible dende la proximidá del Aeropuertu de Madrid-Barajas.

Les llamaes matances de Paracuellos fueron una serie d'episodios d'asesinatos masivos entamaos na retaguardia mientres la batalla de Madrid, nel intre de la guerra civil española, que llevaron a la muerte a un mínimu de dos mil quinientos presos consideraos opuestos al bandu republicanu. Los fechos desenvolvieronse en dos llugares cercanos a la ciudá de Madrid: les paraxes del regueru de San José, en Paracuellos de Jarama, y nel sotu de Aldovea, nel términu municipal de Torrejón de Ardoz.

Les execuciones realizáronse aprovechando los tresllaos de presos de diverses cárceles madrilanes, conocíos popularmente como saques, llevaos a cabu ente'l 7 de payares y el 4 d'avientu de 1936, mientres s'enfrentaben les tropes gubernamentales y sublevaes[2] pol control de la ciudá. Del total de 33 saques de presos que tuvieron llugar nes feches citaes, 23 d'elles terminaron n'asesinatos: les de los díes 7, 8, 9, 18, 24, 25, 26, 27, 28, 29 y 30 de payares y les del 1 y el 3 d'avientu. Ente'l 10 y el 17 de payares nun hubo estracción dalguna, y dende el 4 d'avientu cesaron.[3]

Los convóis mentaos fueron esviaos escontra los llugares del regueru San José, na vega del ríu Jarama, y a un calce o canal de riegu fora d'usu, na vega del ríu del Henares, onde miles de prisioneros fueron asesinaos. Ente ellos taben militares que participaren na sublevación o que nun s'incorporaron a la defensa de la República[4], falanxistes, relixosos, aristócrates, militantes de la derecha, burgueses y otres persones que na so inmensa mayoría fueren deteníes por ser consideraes partidaries de la sublevación y encarcelaes ensin amparu llegal nin acusación formal.

Los presos estrayíos de les prisiones dieronlo con llistes ellaboraes y notificaciones de treslláu o llibertá con membrete de la Dirección Xeneral de Seguridá y, n'ocasiones, roblaes por Segundu Serrano Poncela, el delegáu d'Orde Públicu de la Conseyería d'Orde Públicu de la Xunta de Defensa de Madrid. La Presidencia de la Xunta de Defensa ocupábala'l xeneral José Miaja Menant, y la Conseyería d'Orde Públicu taba encabezada por Santiago Carrillo Solares. Darréu, como se dixo, los presos que figuraben nes 23 saques citaes fueron fusilaos de manera sumaria por milicies pertenecientes a les organizaciones obreres.

Referencies

  1. ↑ Plano del Camposanto de Paracuellos de Jarama: plano de las fosas de Paracuellos del Jarama y explicación sobre cada una de ellas, en la web de la Hermandad de Nuestra Señora de los Mártires de Paracuellos del Jarama.
  2. ↑ El 21 de setiembre la Xunta de Defensa Nacional nomó Xeneralísimu a Francisco Franco, y el 1 d'ochobre "Xefe del Estáu español" (Preston 1994: 229-230 y 236).
  3. ↑ (Cervera 2006: 89).
  4. ↑ Según Javier Cervera, unos 1100 jefes y oficiales del Exércitu atopábense recluyíos na Cárcel Modelo el 9 d'agostu; (Cervera 2006: 85).

Enllaces esternos

This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.