Mari Luz Cristóbal Caunedo
Vida
Nacimientu Tinéu, 30 d'agostu de 1948 (75 años)
Nacionalidá España
Estudios
Llingües falaes castellanu
asturianu
Oficiu cantante
Instrumentu musical voz
Cambiar los datos en Wikidata

Mari Luz Cristóbal Caunedo (30 d'agostu de 1948, Tinéu) ye una bien nomada cantante de tonada asturiana.

A lo llargo de la so carrera ganó los concursos de canción asturiana de mayor sonadía del Principáu. Y representó a Asturies nel Festival Intercélticu de Lorient.

La so carrera discográfica entamóla grabando con dellos de los cantantes más conocíos del panorama musical tradicional asturianu: Enrique García Palicio L'Abogáu, Luis Estrada, Jorge Tuya o José Manuel Collado, y tuvo acompañada a la gaita por Luis d'Arnizo, Manolo Quirós, Alberto Varillas, Vicente Prado El Pravianu o El Gaiteru de Veriña. La grabación de Mari Luz qu'algamó mayor espardimientu foi la realizada xunto con Hevia, nel discu Tierra de nadie, onde apaez cantando nel tema Busindre Reel.

Col Coleutivu Muyeres grabó delles canciones nos tres dicos que sacaron al mercáu.

La so primer discu interpretáu por ella dafechu foi la Misa Asturiana de Gaita (grabáu en 1998), nel que Pedro Pangua l'acompañaba al tambor y El Gaiteru de Veriña a la gaita.

Darréu grabó en 1999 Onde la ñublina posa, acompañada por buena parte de los meyores músicos tradicionales d'Asturies, convirtiéndose nun discu que marcaría una diferente manera de facer les coses dientro de la música asturiana.

Otra grabación en solitario foi Cantar de Seronda, del añu 2005 y nel que cuntó cola andecha de 24 músicos pa los 18 cantares incluyíos nel discu. Un nuevu trabayu discográficu en solitario fízolu en 2012, Cancios y asturianes, producíu por Xune Elipe, sobre composiciones de Llorienzu Novo Mier[1].

Nel añu 2001, Mari Luz recibió'l XI Distintitivu Fini Suárez a la investigación folklórica pola gran calidá del so trabayu, con un absolutu respetu al estilu tradicional que supo xunir coles renovaciones que nos postreros 25 años vienen dándose nel panorama musical asturianu xeneral[2]. Esti premiu nagua por facer acordanza de la folklorista mierense Fini Suárez. Igualmente, nel añu 2011 recibiría'l Premiu de la Crítica RPA a la Meyor Trayeutoria [3].

Referencies

  1. ↑ Hai que globalizar dende lo propio pa depués compartilo coles demás cultures Entrevista a Mari Luz Cristóbal en lesnoticies.com. Consultao'l 19.12.2012
  2. ↑ María Luz Cristóbal Caunedo recibe'l XI Distintivu Fini Suárez a la investigación folklórica. www.asturnews.com
  3. ↑ D.B.M. RPA entregó en Mieres los Premios de la Crítica 2011. Les Noticies, 11 d'avientu de 2011

Enllaces esternos

This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.