Mazana
Clasificación científica
Xéneru: Malus
Especie: Domestica
Sinonimia
  • Malus communis Desf.
  • Malus pumila Mil.
  • M. frutescens Medik.
  • M. paradisiaca (L.) Medikus
  • M. sylvestris Mil.
  • Pyrus malus L.
  • Pyrus malus var. paradisiaca L.
  • Pyrus dioica Moench[1]
Consultes
[editar datos en Wikidata]

La mazana[2], del xéneru Malus y la familia Rosaceae, ye una de les frutes más cultivaes del mundu. La mayoría de les mazanes remanecen de la especie de Malus domestica (Pumar o híbridu d'ella). La mazana fermentao úsase pa facer bebides alcohóliques como la sidra asturiana o el Calvados, en Francia.

Historia

La mazana foi una fonte alimenticia abondo importante nos climas fríos, y dablemente, ye l'árbol cultivau más antiguu. Ye la especie frutal (sacante los cítricos) que se caltién per más tiempu, faciendo durable bona parte del so valor nutritivu. Les mazanes d'iviernu, recoyíes no cabero la seronda y curiaes en cámares (canigú) o almacenes per encima del puntu de conxelamientu, foren alimentu primordial per dómines n'Asia, Europa y nos Estaos Xuníos (dende 1800).

Especies cultivables

Hai más de 7.500 especies de mazanes. Les diferentes especies alcuéntrense en climas templaos y subtropicales, darréu que les pumaraes nun florien nes estayes tropicales, yá que necesiten dalgunes xelaes.

La siguiente ye una llista de les especies cultivables más comunes y ónde se cultiven, xunto col añu y llugar d'orixe:

Variedaes de mazanes
Mazana calaverina

Yá n'Asturies, la mazana algama tala tradición y puxu, que la bayura de tribes diferenciaes ente elles ye descomanada, y reciben dellos nomes na cultura popular, según seya'l so aspeutu o tastu, asina tenemos toes estes:

  • Berdialona; de Blancón; Calabazona; Calaverina (Mena de mazana de color verdosu, duce, grande y un pocu áceda, asemeyada a la calabaza); Camuesa o Carueza; mazana de color marillentu, pequeña y montés; Coloradina; Cuatrucantos; de la Madalena, colorada y mui dulce; Marialuisa, raneta parda; Meana, especial pa la sidra; Ñuera; Panera; Prieta; Mesada; de Palmazu; Mingán; Monxaca; de Repinaldes; etc.

La mazana ye rica en pectina, zucres y vitamina C. Tamién tien propiedaes medicinales, darréu qu'al ser suavemente llaxante ayuda nos desarreglos intestinales.

Mazanes pa facer sidra

Pa facer la sidra acoyío pola Denominación d'Orixe “Sidra d'Asturies”, hai qu'usar namás mazana de sidra de les races comprendíes dientro d'estos bloques teunolóxicos (pola acidez y la concentración de compuestos felónicos)

  • Ácido: Durona de Tresali, de Blanquina, de Llimón Montés, Teórica, Sanroqueña, de Raxao, Xuanina y Fuentes
  • Dulce: Verdialona y Ernestina
  • Ácido-amargo: Regona
  • Amargo: Clara
  • Amargo-Semiácido: Meana
  • Dulce-amargo: Coloradona
  • Semiácido: de Carrió, Solarina, de la Riega, de Collaos, Perico, de Prieta y Perezosa
  • Semiácido-amargo: Panquerina.

Hai que destacar qu'hai variedaes de mesa que nun s’almiten na Denominación d'Orixe y, polo tanto, tán prohibíes.

Otres carauterístiques que s’estremes ente estes races son, amás del grupu teunolóxicu, la medría, el tiempu cuando floria, la producción, la sensibilidá a fungos y el tiempu cuando madurez.

(Fonte: “Descripción de las variedades de manzana de la D.O.P. Sidra de Asturias”. SERIDA. Autores: Y. Dapena; M. Dolores Blázquez):

Enllaces esternos

Referencies

  1. ↑ Wilson, Karen L. (2017), Report of the Nomenclature Committee for Vascular Plants: 66: (1933). To conserve Malus domestica Borkh. against M. pumila Miller, 66, doi:10.12705/663.15
  2. ↑ Esti términu apaez nel Diccionariu de l'Academia de la Llingua Asturiana. Ver: mazana
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.