Un llinguaxe de programación imperativu ye un llinguaxe de programación nel que, a la manera d'un algoritmu, se diz pasu por pasu al ordenador lo que tien que facer pa iguar dalgún problema (ta centráu nel cómo facer les coses). La computación descríbese en términos d'un estáu del programa y de les instrucciones que camuden esi estáu.
Ye asemeyáu al emplegu imperativu del llinguaxe natural, dando órdenes que daquién tien que cumplir; nesti casu les órdenes cúmpleles l'ordenador.
Les estructures básiques de control nun llinguaxe imperativu son:
- Secuencia. Les instrucciones van una tres otra, y execútense nesi orde.
- Esbilla. Escuéyese ente dos o más caminos d'execución, según dalguna condición.
- Iteración o llazu. Un grupu d'instrucciones execútase delles veces, según dalguna condición.
El conocíu como Teorema de la programación estructurada diz que cualesquier problema computable pue resolvese namái que con eses tres estructures de control.
Otres tribes de llinguaxes nun se basen na idea de dicí-y al ordenador lo que tien que facer pasu a pasu, como se describe equí.
L'exemplu más claru ye'l de la programación declarativa, que munches veces cítase como antónimu de la programación imperativa. Esos otros son llinguaxes más afayadizos pa dalgunos problemes concretos; sicasí, los llinguaxes de programación que más s'empleguen anguaño son los imperativos, ente otres coses porque cásique tolos ordenadores tán fechos pa funcionar internamente de manera imperativa.
