| L'Angliru | |
|---|---|
| Angliru (es) | |
| puertu de monte y monte | |
 | |
| Situación | |
| País |  España |
| Autonomía |  Principáu d'Asturies |
| Cordal | Cordelera Cantábrica |
| Coordenaes | 43°13′17″N 5°56′32″W / 43.22139°N 5.94222°O |
  L'Angliru L'Angliru (Asturies) | |
| Datos | |
| Altitú | 1570 m |
 | |
L'Angliru ye un puertu de monte a 1.570 msnm d'altitú nel conceyu de Riosa, Asturies. Ye una zona de camperes y bebederu de ganáu, que recibe'l nome por sinécdoque del llagu L'Angliru y que ta asitiada nel corazón de la sierra del Aramo.
Constitúi un espaciu natural de gran guapura allugáu ente delles de los visos más importantes d'esta sierra, como son El Gamonal, El Moncuevu y El Barriscal. Hasta esti enclave llega la carretera llocal procedente de La Vega de Riosa, lo que fai que seya ésta la forma más direuta d'aportar al picu Gamonal (1.712 m).
Cómo llegar
La forma más cenciella de llegar ye al traviés de la N-630 esviándose escontra la derecha pela AS-231 según se vien d'Uviéu, pásense les poblaciones de Les Maces y La Foz hasta que se llega a La Vega (capital del conceyu) onde se toma la esviación a la derecha —carretera RI-2 escontra Grandiella— y empieza yá l'ascensión.
Ciclismu
De ser conocíu namái polos ganaderos llocales y escursionistes, pasó a cobrar fama internacional cuando foi incluyíu como final d'etapa na Vuelta Ciclista a España de 1999, dada la gran dureza de l'ascensión, que llega en dellos tramos pindios a máximes del 23,5% na Cueña les Cabres, unu de los puertos de monte asfaltaos más difíciles del ciclismu mundial. Ello ye que L'Angliru ta consideráu como'l visu de mayor dureza mundial xubíu en carrera, xunto col Mortirolo (que nunca foi final n'alto y, poro, "difícil" midir la so incidencia en carrera) y el Zoncolan n'Italia.
En 1996 l'asturianu y direutor d'información del equipu ONCE, Miguel Prieto, dempués de visitar El Gamonal púnxose en contautu cola empresa organizadora de la Vuelta Ciclista a España (Unipublic) proponiendo dicha ascensión como final d'etapa. Esta propuesta nun cai embaxo, tando como taba nesi momentu La Vuelta buscando un final d'etapa que-y diera sonadía, resonancia y dureza como yera l'ascensión a los Llagos de Cuadonga. En 1997 el Conceyu de Riosa iguó la carretera y en 1999 foi per primer vegada final d'etapa.
La mítica victoria de Chava Jiménez saliendo de la borrina y adelantrando al rusu Pável Tonkov nos últimos metros asitió a L'Angliru nel ciclismu internacional. Darréu ganaron: Gilberto Simoni (2000), Roberto Heras (2002), Alberto Contador (2008), Juanjo Cobo (2011) y Kenny Elissonde (2013), reconocíos escaladores a nivel mundial, lo que demuestra la so dificultá. Anguaño a la entrada de la carretera que lleva a la cume asitióse un cartelu que diz: "L'Angliru, l'Olimpu del Ciclismu".
Toles ascensiones profesionales vinieron acompañaes primeramente del altu del Cordal, de 1ª categoría, col últimu quilómetru y mediu a más del 12% de rimada media lo que xuníu al so peligrosu descensu (onde se cayeron corrredores como Abraham Olano ya Igor Antón) fai que'l grupu principal llegue escoyíu a cuerpu de L'Angliru aumente la yá de por si durez del puertu por cuenta de esa gastadura previa.[1][2]
Notes y referencies
- ↑ altimetrias.net (ed.): «CORDAL, EL por Pola de Lena». Consultáu'l 5 de setiembre de 2011.
- ↑ plataformarecorridosciclistas.org (ed.): «15ª ETAPA (Domingo 4 Setiembre): AVILÉS – ALTO DE L'ANGLIRU (142,2 km).» (31 d'agostu de 2011). Consultáu'l 6 de setiembre de 2011.
