01-06-2021 07:18
Katherine MacDonald
Vida
Nacimientu Pittsburgh, 14 d'avientu de 1891
Nacionalidá Bandera de Estaos Xuníos d'América Estaos Xuníos
Llingua materna inglés
Muerte Santa Barbara, 4 de xunu de 1956[1] (64 años)
Familia
Fíos/es 2
Hermanos/es Mary MacLaren
Estudios
Llingües falaes inglés
Oficiu actriz, actriz de cine, productora, productora de cine
Premios
IMDb nm0531806
Cambiar los datos en Wikidata

Katherine Agnew MacDonald (14 d'avientu de 1891, Pittsburgh – 4 de xunu de 1956, Santa Barbara) foi una actriz y productora cinematográfica d'Estaos Xuníos.

Carrera

Nacida en Pittsburgh, Pennsylvania, empezó la so carrera como modelu na ciudá de Nueva York na década de 1910. En 1917 MacDonald treslladóse a Los Angeles, siendo la primer muyer productora cinematográfica de Hollywood, rodando nueve cintes pa la so compañía, Katherine MacDonald Pictures ente 1919 y 1921.

MacDonald túvola na llista de les actrices meyor pagaes en 1920, ganando unos 50.000 dólares per película con un contratu con First National. Algamó'l visu de la so popularidá ente 1920 y 1923, y dende 1922 a 1925 produció pa B.P. Schulberg.[2] Pese a ello namái foi considerada como un talentu menor dientro de la industria cinematográfica, anque la so figura valiéra-y el nomatu de "American Beauty (Guapura Americana)".[3]

El so primer papel d'importancia llegó col filme Shark Monroe (1918), trabayando con William S. Hart. Actuaría en distintos títulos de cine mudu, ente ellos The Squaw Man (1918), Mr. Fix-It (1918), Passion's Playground (1920), Beautiful Liar (1921), Stranger than Fiction (1921), y The Infidel (1922). Les sos cintes yeren davezu drames románticos, y a partir de 1923 MacDonald namái rodó tres películes, una en 1924, otra en 1925 y una postrera en 1926.

Vida personal

La carrera de MacDonald tuvo arrodiada pol discutiniu apaecíu na so vida privada. Tuvo una disputa pública cola so hermana, la tamién actriz del cine mudu Mary MacLaren. Les columnes de chismes, amás, alimentaron el ruxerrux d'una aventura de l'actriz col Presidente de los Estaos Xuníos Woodrow Wilson, pocu probable dáu'l ictus sufríu por él en 1919.

Mientres trabayaba como modelu en Nueva York, MacDonald conoció al so primer home, l'artista K. Malcolm Struss. Casóse en 1910, pero divorcióse en 1919. Posteriomente, en 1924, volvió casase, nesta ocasión con Charles S. Johnston, un mozu millonariu de Chicago col que tuvo un fíu, Britt. La pareya divorcióse en 1926.

En 1928 casóse con Christian R. Holmes, heriede de la compañía Fleischmann's yeast, pero'l matrimoniu acabó con un sensacional xuiciu por divorciu en 1931. MacDonald acusaba al so home de crueldá, y Holmes contraatacó afirmando que MacDonald tuviera aventures estramatrimoniales. MacDonald y Holmes tuvieron una fía, Ann.[3]

En dexando la industria del cine MacDonald dirixó un esitosu negociu de cosméticos ente finales de la década de 1920 y entamos de la de 1930.[3] Katherine MacDonald finó en Santa Bárbara (California) en 1956. Foi soterrada nel campusantu de dicha población.

A MacDonald concediéron-y una estrella nel Paséu de la Fama de Hollywood, nel 6759 de Hollywood Boulevard, pol so trabayu pal cine.

Referencies

  1. ↑ Afirmao en: Internet Movie Database. Identificador IMDb: nm0531806. Data de consulta: 20 xunetu 2016. Llingua de la obra o nome: inglés.
  2. ↑ www.imdb.com/name/nm0531806/
  3. 1 2 3 Larry Lee Holland, “Mary MacLaren and Katherine MacDonald” Films in Review (1985) p. 221-227

Enllaces esternos

This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.