Torre Juche, en Pyongyang

El juche (en coreanu: 주체, /tɕutɕʰe/, treslliterao a vegaes Chuch'e) ye la base ideolóxica del estáu de Corea del Norte. Una frase atribuyida al líder norcoreanu Kim Il-sung define'l jucheísmu del siguiente mou: "En poques pallabres, la idea juche significa que los propietarios únicos de la revolución y de la construcción posterior son les mases".

Fundamentos

El juche ye un sistema filosóficu y ideolóxicu que'l so desenvolvimientu se-y atribúi al propiu Kim Il-sung. El so fíu y continuador na xefatura d'Estáu de Corea del Norte, Kim Yong-il, ye oficialmente l'encargáu de la so interpretación. Vien a ser una adautación del comunismu leninista a la cultura coreana y a les necesidaes propies del gobiernu de la República Democrática Popular de Corea. Ta consideráu una cadarma argumental defensiva, tanto énte la disidencia, como pa refugar influyencies esternes, incluso dende los gobiernos de corte comunista.

La so idea cimera ye que l'individuu ye responsable del so propiu destín. Esa máxima, nun sistema revolucionariu, tresllada a la suma d'individuos que componen les mases populares l'autoría de la revolución y el so desenvolvimientu. D'esa mena, caún de los norcoreanos tien la so estaya de responsabilidá nel destín de la coleutividá. La revista norcoreana "Korean Review" señala que "L'afitamientu del jucheísmu significa adoptar el xeitu de maestru de la revolución y reconstrucción del to propiu país. Esto significa un proceder independiente y creativu de caún cola fin d'atopar les soluciones a los problemes que puean apaecer nel procesu de revolución y construcción".


Asina esplicaríase la principal aplicación práutica de la teoría kimilsunguista, cuyu enfotu cimeru sería "facer posible l'afitamientu de los finxos políticos del Estáu pente'l desendolcu d'una indestructible cohesión y xunidá política ya ideolóxica". Esa afirmación xustifica darréu la llucha escontra la disidencia y la influyencia estranxera. Si bien la "xunidá ideolóxica y política" favoratible a la revolución daría puxu a delles desviaciones de la llinia marcada gracies a la premisa del proceder "independiente y creativu" que podríen sumase a les direutives revolucionaries, lo cierto ye que la doctrina y la bibliografía xucheístes esponen abondo les funciones deseyables de cada coleutivu revolucionariu. Asina, los medios de comunicación han asoleyar los avances que se produzan na revolución y construcción del "paraísu de los trabayadores", colo que se refuguen aquelles informaciones y actitudes que puean suponer un pasu atrás nel desendolcu de la revolución.

Teóricos

La ideoloxía jucheísta, o "kimilsunguista", toma'l nome d'una teoría filosófica tradicional coreana, el juche. Dizse que la idea juche foi inspirada a Kim Il-sung pol monte Paektu, una cume mítica pa los coreanos y tou un símbolu de la nación. Kim Il-sung foi l'ideólogu y promotor, con decenes de volúmenes espublizaos. Otros, como Wang Yan Yop, entamaron la xera de da-y un sentíu práuticu a la obra magna del "Gran Líder", (anque dempués protagonizare una de les más célebres deserciones de la R.P.D.C.). Kim Il-sung, como'l so fíu Kim Yong-il, son dafechu consideraos como los auténticos responsables del desendolcu de la doctrina juche, el primeru afitándola, el segundu actualizándola según los nuevos retos de la revolución. Kim Il-sung espoxigó una doctrina autodefensiva, contrapuesta a la "dependencia" que de los Estaos Xuníos tendríen, por exemplu, los surcoreanos. El jucheísmu ximelga la bandera de la soberanía nacional popular, que pon los finxos d'un sistema políticu al marxe d'influyencies esternes que puedan dixebrar el bon desenvolvimientu de la transición al comunismu. Desta mena, Kim Yong-il siguió configurando una doctrina que daba un sentíu ideolóxicu a lo que na práutica ye'l réxime de Corea del Norte.

Cites

En 1975, tres d'aprobase la constitución norcoreana de 1972, Kim Il-sung asoleya ¡Juche!, obra na qu'afita la base de la teoría que da sentíu ideolóxicu a la estructura estatal norcoreana. Delles muestres del pensamientu kimilsunguista son les siguientes frases incluyíes nel llibru.

"Tamos faciendo la revolución coreana. Y tolo que-y afecta, los coreanos saben cómo lo afrontar meyor que naide. L'aspeutu fundamental de la revolución coreana, y que los coreanos decidimos, ye que la nuesa fuercia ye'l factor decisivu na nuesa victoria".
"Nengún foriatu pue danos la receta de qué facer cola nuesa revolución. Pa poder llevala a bon fin con ésitu, los coreanos, ellos mesmos, deben utilizar el so cerebru, resolver los problemes col so enfotu, un enfotu que debe asitiase conforme a los intereses de la revolución coreana".
"El nuesu partíu adoptó con fuercia la idea del juche, pa resolver los problemes de la revolución y la construcción del socialismu con independencia, acordies a les condiciones propies del nuesu país, colos nuesos propios enfotos; y nosotros, tol pueblu, formaremos un piñu alrodiu del espíritu d'una autoafirmación que mos llama a andechar na revolución y construcción del socialismu y el comunismu nel nuesu país, colos nuesos enfotos y los recursos del nuesu país, separtándonos de la idea de depender d'otros".

El juche nel esterior

L'únicu intentu d'implantar el kimilsunguismu fuera de la República Democrática Popular de Corea foi pola parte de la Rumanía de Nicolae Ceaușescu, ensin ésitu. Los intentos de Corea del Norte d'esparder el juche como fórmula p'algamar el comunismu zarráronse dafechu pocos años dempués de la so puesta en marcha nel país. Anguaño, atópense dellos grupos d'estudiu del jucheísmu en países como Reinu Xuníu, España, Brasil, Xapón, Perú o Australia, ente otros.

L'almanaque juche

Tres de l'aprobación de la constitución de 1972, Corea del Norte oficializó el calendariu juche, basáu nel calendariu gregorianu y que finxa l'añu unu en 1912 dempués de Cristu, añu de la nacencia de Kim Il-sung. Corea del Norte finxaba asina'l so propiu calendariu revolucionariu, que s'anicia nel añu en que naz la so cadarma ideolóxica, el juche (reforzando asina la identificación de la ideoloxía estatal cola figura del "Gran Líder" Kim Il-sung). Polo xeneral, nos testos coreanos figuren en primer llugar l'añu juche y dempués el cristianu: Juche 97 (2008).

Referencies

    Enllaces esternos

    This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.