Juan Martínez Abades
Vida
Nacimientu Xixón[1], 7 de marzu de 1862
Nacionalidá España [2]
Muerte Madrid[3], 19 de xineru de 1920 (57 años)
Estudios
Llingües falaes castellanu
Oficiu pintor, compositor de cantares
Cambiar los datos en Wikidata

Juan Martínez Abades (7 de marzu de 1862, Xixón – 19 de xineru de 1920, Madrid) foi un pintor y músicu asturianu.

Biografía

Cursa los sos estudios nel Institutu Xovellanos y dende l'entamu manifiéstanse nél unes grandes cualidaes pal dibuxo y pa la música, questudia col maestru Passutti. Ingresa en 1880 na Escuela Superior de Pintura, Escultura y Grabáu, y al mesmu tiempu, asiste al estudiu del escultor José Grajera, que lu adoctrina nel estudiu de les formas clásiques. En 1881 oposita a beca pola Diputación d'Asturies, y pese a algamar el númberu uno, nieguen-yla en beneficiu d'un recomendáu. En 1884 preséntase a la Esposición Nacional de Belles Artes con un cuadru de grandes dimensiones, La muerte de Mesalina, que ye aponderáu pola crítica. En 1886 pasa les vacaciones en Xixón y ye a partir d'entós cuando entama la so preferencia por un xéneru bien concretu, la marina, pa la que-y sirve d'inspiración el muelle local, y na que sería una de les primeres figures d'España. No tocante a la dársena xixonesa, Martínez Abades recueye l'aspectu que tenía al pasar de ser un puertu pesqueru y comercial a concentrar un importante movimientu de carbón, con terminales de los ferrocarriles de Llangréu y del Norte [4]

Los éxitos iniciales anímenlu a participar en toles esposiciones s'entamen, máxime depués d'algamar un premiu na clase de Collorío de la Escuela de Pintura, Escultura y Grabáu. La so próxima meta ye Italia, con visites a Roma, Venecia, Nápoles, Xénova, Milán y Florencia, nes que tien ocasión de depurar el so arte y estudiar el ricu folklore italianu. Frutu d'esa esperiencia son los cuadros qu'envía a la Nacional de 1890: Agües de Xixón y El viáticu a bordo; el segundu, algama una segunda medaya y en 1891, ofrezse al públicu na Esposición Internacional de Belles Artes que s'entama en Berlín. Nesi mesmu añu pasa a residir definitivamente en Madrid, pasando a ilustrar munches páxines de Blanco y Negro, a partir de 1893. La so sonadía diba n'aumento y munches de les sos obres figuren en coleiciones de L'Habana, Buenos Aires, Bilbao, Barcelona, San Sebastián, Madrid y Méxicu, a la vez que'l so espíritu viaxeru lu impulsa a recorrer una buena parte d'España, con preferencia de les zones llitorales. El Muséu de Belles Artes d'Uviéu o el Muséu Casa Natal de Xovellanos de Xixón, tienen espuesta obra de Martínez Abades.

En 1901 conságrase definitivamente, al presentar a la Nacional una riestra d'ocho cuadros pol qu'algama la Primera Medaya y la Encomienda de Sabela la Católica. Nel Madrid d'entamos de sieglu tien ocasión de tratar a les personalidaes más destacaes de la intelectualidá y, depués d'esponer en munches ocasiones y siempre con afalagos por parte de la crítica y el públicu, entama a simultanear la pintura cola composición de cantares folkloricos asturianos de tipu señardosu, como Cabraliega, La paxarina, Duerme, neñina, La pandereta y otres munches, que-y sirivieron pa afrontar una nueva xera, la del cuplé, cola qu'algamaría importantes trunfos. Mieres del Camín, estrenada nel Teatru Apolo, franció la marcha d'una llarga riestra d'éxitos, de los que dellos seríen universales, como: ¡Ladrón...!, Amor de muñecos, Agua que no has de beber, Flor de té, Mimosa, Malantraña, etc.

Nel añu 1913, na sala Iturrioz de Madrid, entamóse una gran esposición antolóxica de la so obra, siendo nuevamente reconocíu pola crítica y el públicu [5]

Referencies

  1. ↑ URL de la referencia: https://www.museodelprado.es/aprende/enciclopedia/voz/martinez-abades-juan/80de1528-d42a-48c0-bfe3-9e7d33ccdec8. Data de consulta: 2 xunetu 2017.
  2. ↑ URL de la referencia: https://datos.gob.es/es/catalogo/e00123904-autores-espanoles-en-dominio-publico-fallecidos-desde-1900.
  3. ↑ Data de consulta: 16 ochobre 2016. URL de la referencia: https://rkd.nl/explore/artists/104.
  4. ↑ Javier Barón Thaidigsmann ICONOGRAFÍAS DE TRABAJO INDUSTRIAL EN LA PINTURA ASTURIANA DE LA RESTAURACIÓN, consultao'l 07.03.2011
  5. ↑ Blogue consultáu'l 08.03.11
  6. ↑ Gathering Seaweed on the Banks of the Berbés, Vigo Museo Carmen Thyssen Málaga.
  7. ↑ Exterior Port and Abra of Bilbao with Punta Galea Museo Carmen Thyssen Málaga.
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.