Juan Antonio Suárez Victorero y Robledo | |
|---|---|
| Vida | |
| Nacimientu | 5 de marzu de 1774 |
| Nacionalidá |
 España |
| Muerte | 1857 (82/83 años) |
| Estudios | |
| Llingües falaes | castellanu |
| Oficiu | escritor |
 | |
Juan Antonio Suárez Victorero y Robledo (n. 5 de marzu de 1774 Llastres, Colunga - † 1857 Uviéu)
Militar lliberal y escritor asturianu que vivió ente los sieglos XVIII y XIX. En Llastres fizo los estudios elementales. Treslladóse a la Universidá d'Uviéu, onde algamó el grau de bachiller na Facultá de Filosofía y llueu na Facultá de Xurisprudencia onde suspendió el so aprendizaxe’n lleis pa pa correr l'aventura d'emigrar a América. Pasó a Lima, col so tíu José Robledo, que yera ellí coronel y direutor del Tribunal de Minería. Acabante’l sieglu XVIII tornó a España, en viaxe al curiáu dun gran caudal pal Tesoru.
Allugóse entós na so villa de nacencia, y demientres dos décades pocu sábese de la so vida. Nesa dómina participó nel movimientu lliberal nacíu cola francesada, y dedicóse a estudios de calter históricu y económicu, ensiendo miembru distinguíu de la Sociedá Económica d'Amigos del País d'Uviéu.
Cola revolución constitucionalista aniciada por Rafael del Riego’n xineru de 1820 axuntóse a esta causa, ensiendo ascendíu al grau de coronel. Collaboró nel periódicu que dirixía’n Madrid el dempués xeneral Evaristo Fernández San Miguel col títulu de El Espectador y quiciés n’otres publicaciones.
Al surdir la reaición absolutista de Fernandu VII en 1823, Suárez Victorero pasó a ser perseguíu, y como “íntimu collaciu del Divín Argüelles“ y partidariu como élli de les idées lliberales, corrió tamién la suerte de fuxir d‘España,
Emigró entós de nuevu a Lima, onde alcontró la proteición y l'abellugu del so tíu maternu José Robledo, que entá vivía nel país.
Col morrer de Fernandu VII tornó a España y allugóse’n Uviéu dedicándose con mayor enfotu a les lletres. Collaboró col periódicu El Asturiano (1836) y, años sero (1851-54), col Fomento de Asturias. Collaboró amás nel Diccionario... de Pascual Madoz, con noticies xeográfiques ya históriques de los pueblos asitiaos nel términu de la Villa.
Morrió n'Úviéu nel añu 1857. Condecoráu col títulu de Caballeru de la Orde del Santu Sepulcru de Xerusalén.
Suyes son les obres titulaes: Observaciones sobre muelles, pesquerías y otras materias, Lucero de la libertad, Historia de la villa de Lastres y Descripción geográfico-histórica del concejo de Colunga en el Principado de Asturias.
Referencies
Enllaces esternos
Wikimedia Commons tien conteníu multimedia tocante a Juan Antonio Suárez Victorero y Robledo.
