Jiu-jitsu brasilanu
Intentu d'”estrangulamientu en triángulu” nos Campeonatos Mundiales de Jiu-jitsu.
Tamién Brazilian jiu-jitsu, BJJ, Gracie jiu-jitsu, GJ
Enfoque Mañes, sobre too en suelu
Contautu/durez Contautu plenu
País d'orixe Bandera de Brasil Brasil
Fundador Mitsuyo Maeda. Helio Gracie, Carlos Gracie
Prauticantes famosos Familia Gracie, Familia Machado, Fabio Gurgel, Marcelo Garcia, Fabricio Werdum, Ronaldo "Jacare" Souza
Paternidá Yudu Kodokan de primeros del sieglu XX
Deporte olímpicu Non
Cambiar los datos en Wikidata

El Jiu-jitsu brasilanu, conocíu tamién pola denomación inglesa de Brazilian Jiu-jitsu o BJJ, ye un arte marcial, deporte de combate, y sistema de defensa personal, centráu nes téuniques d'agarre y especialmente na llucha en suelu. Deriva del Yudu del Kodokan de primeros del sieglu XX, que pela so parte anició en delles escueles xaponeses (o ryu) de jujutsu a finales del sieglu XIX.

El Jiu-jitsu brasilanu enseña qu'una persona más pequeña o más feble pue ser pa defendese con ésitu d'un asaltante más grande y más fuerte usando palanques y téuniques acionaes, especialmente aplicando mañes articulares (sobre todiyos, rodiyes, moñeques, coldos, costazos, cervicales) y estrangulamientos (los sanguíneos sobre too) pa superar al otru. El Jiu-jitsu brasilanu pue entrenase pa campeonatos deportivos basaos n’agarres (con y ensin chaqueta) o d'artes marciales mestes (MMA), o pa la defensa personal. L’exercitamientu de los combates reglaos y llibres xuega un papel principal nel deprendimientu, concediéndose a l'aplicación práutica, especialmente en competición, un plus pal progresu y ascensión a traviés de los graos/cintos.

Historia

El Jiu-jitsu brasilanu nació en Brasil per aciu de la llegada, nos primeros años del sieglu XX, del cónsul xaponés Mitsuyo Maeda, conocíu pol nomatu de "Conde Koma", que, dempués de demostrar nel cursu de los sos viaxes les téuniques del yudu estilu Kodokan (ello ye, el que se prauticaba na primer escuela del fundador Jigoro Kano), del que sobre too dominaba l'aspeutu de la llucha en suelu, fundó un dojo onde’l tovía rapaz Carlos Gracie, fíu de Gastao, un ricu home de negocios, convertióse nún de los sos meyores estudiantes. Un hermanu pequeñu de Carlos, el renomáu Helio, engarróse en decenes d'alcuentros llexendarios (como’l famosu retu contra’l campeón de llucha llibre Waldemar Santana y el que tuvo contra ún de los meyores yudoques de tolos tiempos, Masahiko Kimura), amosó al mundu cómo la téunica escelente del Jiu-jitsu podía llevar al ésitu en combate tamién a una persona menuda como Helio Gracie.

Nos años 80 del sieglu XX, destacaos miembros de la familia Gracie emigraron a los Estaos Xuníos y organizaron torneos inter-estilos nos que desafiaben a lluchadores d'otros sistemes. El programa de televisión que retresmitía estos desafíos foi un ésitu y, inspiráu pol movimientu brasilanu de combates cuasi sin regles que llamaben "Vale Tudo" (“val too”), naz nos EXA’l renomáu Ultimate Fighting Championship, que se celebró per primer vegada en 1993. Amosóse asina al mundu la eficacia del jiu-jitsu brasilanu, que dominó claramente a los otros métodos nes tres primeres ediciones de 12.

El campeón de la familia Gracie escoyíu pa representar el so estilu de llucha foi Royce, ún de los fíos d'Helio: foi quien pa dominar, per aciu d'una gran habileza, a tolos lluchadores del tornéu, incluíos los más fuertes físicamente y mui bien más pesaos. Colos sos 80 kg. Royce Gracie peracabó (fizo que se rindieren) a los sos terribles oponentes usando palanques, estrangulamientos, llaves articulares, presiones doloroses y otres téuniques eficaces poco avezaes n’otres disciplines. Foi un ésitu atayante que fizo conocer al mundu lo qu'anguaño defínese de manera más xenérica como "jiu-jitsu brasilanu" (en cuenta de "Gracie jiu jitsu" como lu llamaben daquella), por honrar al país que tanto desendolcó l'"arte suave".

La gran sonadía afalada pola fuercia de los medios americanos de comunicación de mases llevó al “Jiu-jitsu brasilanu” a ser un deporte famosu per dayures, y dende entós el so espardimientu aumentó esponencialmente. Güei’l movimientu internacional del BJJ ta a esi efeutu en medría constante, per un llau como deporte recreativu en sí mesmu (nel los golpes tán torgaos), pero tamién como elementu fundamental de la preparación de los lluchadores de MMA (artes marciales mestes), deporte de contautu máximu deriváu del orixinal Vale Tudo brasilanu, qu'algamó la fama cimera col International Vale Tudo Championship.

Téunica

En realidá’l jiu-jitsu brasilanu, a pesar de lo que munchos piensen, nun ta mui lloñe del jujutsu xaponés (trescrito dacuando como ju-jitsu o jiu-jitsu) o la so forma moderna que nun ye otra que’l conocíu yudu. La verdadera diferencia, más que téunica, alcuéntrase nel métodu y na estratexa: el yudu, por casu, pola mor de la reglamentación, busca la victoria (Ippon) a traviés del valtu perfeutu o del bloquéu en suelu venti segundos o más pa llograr la rindición; esta restricción de tiempu fai que na práutica se privilexe más la llucha en posición vertical. En BJJ, per contrario, nun s’espera vencer valtando, lo que solo da una ventaya de dos puntos, colo que ye inevitable que’l combate siga la mayor parte del tiempu en suelu, onde nun ta prevista nenguna llende en casu d'unos segundos d'inactividá como asocede nel yudu o nes formes deportives del jiu-jitsu xaponés. Poro, pal BJJ ye meyor l'intercambiu de llucha en suelu, onde la posición "de guardia", col adversariu trabáu ente les propies piernes cuando se ta pámpana arriba, ye una de les principales carauterístiques del estilu, bien de veces puntu de partida p apalanques, estrangulamientos y inversiones de posición.

Les posiciones más avezaes a respeutive del yudu o’l jujutsu son la de montar a la rebalguina (que llamen "montada"; "tate shiho gatame" en xaponés), o garrar al encruz, pechu con pechu (la "cruzada"; "yoko shiho gatame" en xaponés). Posiciones desendolcaes de mou carauterísticu nel Jiu-jitsu brasilanu son la "monta a caballu per detrás", más conocida como "back mount", perfecta pa estrangular; y la guardia "en caparina", coles rodiyes p'alantre y los pies ente les piernes del contrariu, perbona pa facer inversiones y poner al oponente en desventaya. Otres posiciones típiques inclúin: la guardia controlando los brazos coles piernes (spider guard), la media guardia, la guardia De La Riva, la rubber guard. Partiendo d'elles, como queda dicho, pue facese un refileru inacabable d'acabaciones, palanques y estrangulamientos al envís de contrarrestar la fuercia física d'oponentes inclusive muncho más pesaos.

Ver tamién

Referencies

    Enllaces esternos

    This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.