Islla de la Juventud
Alministración
País insularBandera de Cuba Cuba
ISO 3166-2 CU-99
Tipu d'entidá islla
Capital Nueva Gerona
Nome llocal Isla de la Juventud (es)
Xeografía
Coordenaes 21°45′N 82°51′W / 21.75°N 82.85°O / 21.75; -82.85
Superficie 2419 km²
Altitú media 20 m
Demografía
Población 86 420 hab. (2010)
Densidá 35,73 hab/km²
Más información
Estaya horaria UTC−05:00
gerona.inf.cu
Cambiar los datos en Wikidata
Situación de la islla de la Xuventud nel golfu de Batanabó, al suroeste de la islla de Cuba.

La Islla de la Juventud (anantes Isla de Pinos) ye una islla de Cuba, la segunda mayor del país y la quinta más grande del archipiélagu de les Antilles Mayores. Tien una estensión de 2.200 km² y conforma, xunto con más de 600 cayos ya isllotes, l'archipiélagu de los Canarreos. Esti asitiase nel mar Caribe, al suroeste de Cuba, xunto al golfu de Batabanó, a unos 60 km de la islla de Cuba y a unos 142 km de la ciudá de L'Habana. La so población ye d'alredor de 87.000 habitantes.

Alministrativamente ye, xunto colos cayos axacentes, un conceyu especial dende 1976. Les sos escases dimensiones y población facíen que fora pequeña pa ser una provincia, y amás pol so carácter insular considerose conveniente subordinar la so alministración direutamente al gobiernu central. Les principales poblaciones son la cabecera municipal, Nueva Gerona, Santa Fe y La Demajagua (antigua Santa Bárbara). La so economía básase principalmente nel cultivu de cítricos, la estracción de mármole, na pesca y na producción de cerámica, utilitaria ya artística.

Historia

Cárcel Modelu de la islla de Pinos, anguaño escuela y centru d'investigación y cárcel política nos años centrales del sieglu XX.

Sábese perpoco de la historia de la islla anantes de la llegada de los españoles, magar qu'hai un complexu de cueves cerca de la playa de Punta del Este nel que se conserven 235 dibuxos fechos polos nativos. Sería Cristobalo Colón, demientres el so segundu viaxe al Nuevu Mundu, el que la descubriera pa los europeos; llamóla La Evangelista el 13 de xunu de 1494, y reclamola pa España. Esti nome nun foi l'únicu de la islla nos sieglos siguientes, una y bones foi conocida tamién como islla de Cotorras, islla de Tesoros ya islla de Pinos.Esti caberu apaez por primer vegada nel mapa de Diego Rivera de 1529, y sigue usándose davezu anguaño polos sos habitantes, que se nomen a sigo mesmos pineros. El 11 de marzu de 1596 hebo na so rodiada una batalla ente la flota española, mandada por Bernardino González d'Avellaneda y Juan Gutiérrez de Garibay, y los restos de la espedición inglesa escontra l'América española que dirixera Francis Drake, muertu yá d'aquella de disentería. De resultes d'ella los españoles capturaron dos buques ingleses, y el restu afuxeron definitivamente de les posesiones españoles nel Caribe.

Nel sieglu XIX la metrópolis española decide colonizala, y fúndase la so capital, Nueva Gerona, el 17 d'avientu de 1830. Tres de la so derrota na guerra hispano-estauxunidense de 1898 España renunció a la so soberanía sobre la islla. La Enmienda Pratt de 1901, que definió les llendes de Cuba según los intereses d'Estaos Xuníos, nun definió l'estatus de la islla, y esto provocó conflictos ente los dos países. Pol tratáu Hay-Quesada de 1904 Estaos Xuníos reconoció la soberanía de Cuba sobro la islla, y pese a los intentos xudicilales de baltalu por parte de 400 ciudadanos y compañíes estauxunidenses, que controlaben el 95% del territoriu de la islla, el Senáu d'Estaos Xuníos ratificó finalmente'l tratáu el 13 de marzu de 1925, finando cola disputa. De magar, y hasta 1976, la islla perteneció a la provincia de L'Habana, y nesi añu la islla algamó l'estatus de conceyu especial. Tres del asaltu al Cuartel Moncada, en 1953, Fidel Castro y otros participantes nel asaltu foron encarcelaos nel Cárcel Modelu de la islla hasta que, en mayu de 1955, foron lliberaos gracies a una amnistía xeneral.

El 3 d'agostu de 1978 Fidel Castro presidió la ceremonia oficial de cambiu de nome de la islla, cumpliendo asina una promesa que ficiera en 1967: «Llamémosla islla de la Juventud cuando la xuventú tenga fecho coses grandes col so trabayu equí, cuando tengan revolucionáu el so mediu ambiente, cuando vexan los frutos del so llabor y tengan revolucionao la sociedá equí.», Y ello porque miles de xóvenes d'estremaes partes de Cuba y del mundu estudiaben n'escueles nel campu y trabayaben, al tiempu, en plantaciones de cítricos.

Na islla estudien anguaño pedagoxía, medicina y otres carreres universitaries, y tamién estudios secundarios, unos 2.300 estudiantes d'estremaos países del mundu.

Referencies

    Enllaces esternos

    This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.