La intrusión salina ye’l procesu pol cual l'agua salao flui p'hacia los acuíferos d'agua dulce. Esti fechu provoca la salinización de los acuíferos d'agua dulce, amás d'otres consecuencies ecolóxiques.

Actividaes humanes tales como’l bombéu d'agua soterraño dende pozos costeros d'agua dulce, la construcción de canales o la elevación del nivel del mar pol calentamientu global inducen a la intrusión d'agua salao.

Comportamientu hidrolóxicu

La mayor presencia de solutos nel agua del mar fai que presente una mayor densidá y presión que la de l'agua dulce. Esta estremancia de densidaes ye la responsable de la intrusión salina.

Nos acuíferos costeros comunicaos col agua del mar, ésta introduzse per baxo de l'agua dulce no que se vien a llamar cuña salina. Polo xeneral, la estensión p'hacia l'interior de la cuña d'agua salao ta llendada polos niveles d'agua dulce soterraño o l'altura de la columna d'agua dulce. El procesu algama un equilibriu cuando la columna d'agua dulce se fai mayor, la presión aumenta y consigue igualar a la intrusión d'agua de mar.

Cuando se fraya esti equilibriu, por reducción drástica del nivel freáticu d'agua dulce o por elevación del nivel mediu del mar, l'agua salao acaba elevándose y penetrando más nel acuíferu. Cuando esto asocede, l'agua salao inunda l'acuíferu salinizándolu. Resulta mui difícil de recuperar.

Rellación Ghyben-Herzberg

Les primeres formulaciones físiques de la intrusión salina foron feches pol W. Badon-Ghijben (1888, 1889) y A. Herzberg (1901), llamaes asina la rellación Ghyben-Herzberg. La espresión matemática encóntiase nel equilibriu de les presiones exercida pol agua dulce y salao. Na ecuación:

${\displaystyle z={\frac {\rho _{f}}{(\rho _{s}-\rho _{f})}}h}$

l'espesor de la zona saturada d'agua dulce, perriba’l nivel del mar, represéntase con h mientres que con z represéntase l'espesor de l'agua dulce per baxo’l nivel del mar. Dambos espesores tán venceyaos coles densidaes:

ρ_f ye la densidá d'agua dulce.

ρ_s ye la densidá d'agua salao.

L’agua dulce tien una densidá aproximao de 1.000 g/cm3 a 20ºC, mientres que la de l'agua salao ye aproximao de 1,025 g/cm3. Poro, la ecuación pue simplificase a

z = 40h.