Les pintures de la Ilesia

Les pintures al frescu d'esta ilesia fueron retiraes del so allugamientu orixinal pol obispáu d'Urgell na década de 1930 col fin de llevales a Barcelona. Darréu adquiriolas un coleicionista francés y fueron vendíes al barón Cassel van Dorn, d'orixe xudíu. Les pintures fueron requisadas pol Gobiernu nazi y formaron parte del fondu artísticu del Tercer Reich. Dempués de la Segunda Guerra Mundial unviaronse a Berlín, onde fueron restauraes a partir del 1989. El compromisu alemán de restituyir les pieces d'arte expoliadas polos nazis a los sos llexítimos propietarios, dexó al gobiernu andorranu llegar a un alcuerdu cola República Federal d'Alemaña y la comunidá d'herederos del barón Cassel van Doorn y la Fundación Prusiana para'l Patrimoniu Cultural que dexó la torna de les pintures nel so territoriu d'orixe mientres el 2008. Les pintures fueron mercaes por 4 millones d'euros, preciu qu'inclúi los costos de la importante restauración a que fueron sometíes va una década en Berlín.^[2]

En 2017 el Gobiernu d'Andorra anunció la construcción d'un edificiu amiesto a la ilesia, ónde van ser espuestes finalmente estes pintures.^[3]

Arquiteutura

La estructura del templu presenta una única nave de planta rectangular de considerables dimensiones si la comparamos con otros edificios más o menos coetaneos qu'hai nos valles d'Andorra, rematada al este por un ábside rectangular cubiertu en bóveda de cañón, portada y pórticu nel muriu sur de la nave. Paez que la nave y el presbiteriu de la ilesia fueron construyíos nel momentu de fundación del edificiu, y la comunicación ente estes dos partes del templu realízase al traviés d'un arcu de mediu puntu devasáu.

L'edificiu sufrió unos importantes cambeos nel sieglu XII, nel ámbitu arquiteutónicu añader un campanariu de planta circular y 17,67 metros d'altor, tien cuatro pisos con dos pares de ventanes geminaes con decoración lombarda en cada unu d'ellos y ciérrase con un techu cónicu, y tamién modificaronse la portada del templu, desconozse cómo sería la puerta orixinal, pero anguaño apuértase al interior al traviés d'una puerta con arcu de mediu puntu decorada con una arquivolta de dientes de sierra y una cruz de piedra sobro la clave del arcu.

La cubierta de la nave ye realizada con armadura de madera y los teyaos son de cayuela.

El pórticu pela so parte, ye l'elementu arquiteutónicu construyíu más apocayá, paez que podría ser fechu escontra'l sieglu XVIII.

Pintures

Nesta ilesia puede alcontrase un exemplu d'una escelente decoración mural del arte románicu más xenuín. Nel momentu de la execución d'estes pintures nel Obispáu d'Urgell y en toa Cataluña había una llarga tradición de decoraciones pictóriques nes ilesies. Les obres calteníes amuesen que darréu detrás del altar, nel ábside principal, nun se pintaron programes narrativos, sinón preferentemente visiones de Dios, atopamos sobremanera la Maiestas Domini, los apóstoles y María, eleición bien frecuente na rexón pirenaica, pero na ilesia de Santa Coloma diverxe de la distribución habitual. La cabecera ye rectangular, la figura maxestosa de Cristu taba na parte esquierda y non a la central. Iconográficamente la composición rellacionase n'esencia col Apocalipsis y con Pentecostés.