Ilesia de San Xuan el Real
ilesia parroquial católica y basílica menor
Llocalización
País España
Autonomía Principáu d'Asturies
Provincia provincia d'Asturies
Conceyu Uviéu
Parroquia Uviéu
Ciudá Uviéu
Coordenaes 43°21′54″N 5°51′03″W / 43.365°N 5.8508°O / 43.365; -5.8508
Ilesia de San Xuan el Real alcuéntrase n'Asturies
Ilesia de San Xuan el Real
Ilesia de San Xuan el Real
Ilesia de San Xuan el Real (Asturies)
Historia y usu
Apertura1902
Orixe del nome Xuan Bautista
Relixón Ilesia Católica
Diócesis Archidiócesis d'Uviéu
Dedicación Xuan Bautista
Arquiteutura
Arquiteutu/a Luis Bellido (es) Traducir
Estilu neorrománicu
arquiteutura ecléctica
Web oficial
Cambiar los datos en Wikidata

La Ilesia de San Xuan el Real (conocida popularmente como la Catedral del Ensanche)[1] asítiase na ciudá asturiana d'Uviéu concretamente ente les cais Campoamor, Doctor Casal y Melquiades Álvarez.

Carauterístiques

D'estilu neorrománicu, trátase d'un de los templos historicistes más representativos d'Asturies. La so construcción aníciase en 1912 nún solar que fuera ocupáu por otra ilesia, demolida en 1882, con diseñu del arquiteutu Luis Bellido siendo finalizada en 1915. Esti arquiteutu recibiera una distinción honorífica na Esposición Xeneral de Belles Artes de 1906. Reemplazó a otra, d'igual adoración, valtada en 1882 y asitiada na que continúa siendo Cai de San Xuan.

Presenta planta de cruz llatina, transeptu espaciosu, capielles llaterales y cúpula d'escomanaes dimensiones, elevada sobre pechines y recubierta esternamente con cerámica brillante de color bermeyu. L'esterior, atrautivu pola so variedá policromática (particularmente, la piedra rosa nel frente) y la bayura de volúmenes, ufre espléndida fachada, con dos torres-campanariu cuadraes custodiando un acentuáu fastial nel que s'abre la portada neorrománica y un ventanal de gran tamañu.

Nel interior, destaquen les columnes de gran atrautivu ornamental; les vidreres modernistes (1914), encomendaes a José Maumejean; los cuatro grandes frescos de la cúpula y los trés ábsides, debíos a Félix Granda; los altares, escultures y confesionarios ideaos por esti artista y salíos del so taller; la pila bautismal, en mármol blanco, con trabayu en relieve de Cipriano Folgueras Doiztúa; o la capiella de Les Ánimes, nel llau izquierdu. Del antiguu templu parroquial proceden escelentes imáxenes: un Crucificáu, dieciochescu; Xesús Cautivu, obra d'Antonio Borja, más otres barroques del XVIII, como l'Éstasis de San Antonio o La Dolorosa.

El 16 d'ochobre de 1923 celebróse nesta ilesia la boda de Francisco Franco con Carmen Polo, siendo padrinos el rei Alfonsu XIII, representáu pol xeneral Antonio Olsada qu'ostentaba'l cargu de gobernador militar d'Asturies y Pilar Martínez-Valdés, tía de la novia. Asinamesmo, la única fía del matrimoniu, Carmen Franco y Polo, foi bautizada nesti mesmu templu.

Referencies

  1. ↑ Rosalía Agudín (25 de xunu de 2023). «La 'Catedral del Ensanche' rinde honores a San Juan Bautista» (castellán). Consultáu'l 10 d'agostu de 2023.

Enllaces esternos

This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.