L'hiperasturianismu o ultrasturianismu[1] ye un rexistru que ta carauterizáu pol emplegu de pallabres arcaiques, cultes ya invenciones llingüístiques col envís de crear un modelu de llingua asturiana que s'estreme lo máximo posible del castellán.

Pa dalgunes persones[2], esto respuende a cuestiones polítiques y/o un complexu d'inferioridá que foi frecuente nes primeres etapes del movimientu de recuperación llingüística n'Asturies y Galicia na década de los 80. En dambes comunidaes, el modelu d'asturianu y de gallegu foi avanzando a posiciones más normales y estandarizaes a midida que'l procesu d'estandarización y rexistros de la llingua facien lo mesmo.

Sicasí, entá hai xente qu'emplega esti modelu d'hiperasturianu que de xemes en cuando amuesa, al empar, una refuga de la normativa y un usu de pallabres inventaes.

A pesar d'estos casos, nun han considerase hiperasturianismos les pallabres escaecíes que por sustitución del castellán o por otres razones, nun conseña la norma estándar pese a tar rexistraes na cultura lliteraria y oral del asturianu. Bonos exemplos son óligu «garza real» en Cuideiru[3]. Palaz «palaciu», pallabra usada de contino por Fernán Coronas y acreitada na fala de Cadavéu[4]. Yeldu col significáu de «plancton» o «crill» que dicen en Llanes, y ta pervivu en Llastres na fras «Yeldu pa la ballena». Valluga «valleya» o ligüerda «frangüesu» en Cabrales, etc.

Diferencies respeuto al asturianu estándar

Pallabres inventaes o deformaes

  • Morrebundu pa Mortecín o Morrientu.
  • Munera pa Muiñeira ("molinera") (Munera apaez nun de los discos del conxuntu Llan de Cubel pa referise a la Gallegada)
  • Ñora de prensa pa Rueda de Prensa
  • Infracadarma pa infraestructura o encadarmar pa estructurar
  • Avenir pa Futuru
  • Domiñu pa Dominiu
  • Muerganización pa Organización
  • Fierrucarril pa Ferrocarril
  • Idioloxía pa Ideoloxía
  • Aprofitar pa Aprovechar
  • Bardión pa Osu
  • Ablaidu pa Llobu (dende'l galés *bleidd pente la tribu astur de los ablaidacos)

Pallabres con ortografía estremada de la oficial

  • Hiviernu pa Iviernu
  • Hespaña pa España
  • Gerra pa Guerra
  • Cordenada pa Coordenada
  • Institución pa Institución
  • Goviernu pa Gobiernu

Emplegu incorreutu de pallabres asturianes

  • Güeyar pa güeyar pero tamién pa mirar
  • So como sinónimu de «penriba de»/«tocante a» o la preposición «sobre» en cuentes de «pembaxo de» o la preposición «baxo»

Hiperasturianu en Lleón

Dacuando, l'emplegu del hiperasturianu en Lleón mezse con un emplegu deficiente de les estructures propies de la llingua, una forma qu'usen falantes non patrimoniales del idioma, ta falta de referencies orales y usa términos que son estraños a la llingua. Apocayá, hai denuncies tocante al emplegu del hiperasturianu en Lleón onde tamién s'axunten rasgos carauterísticos como la diéresis enriba la «i» y delles incorreiciones llingüístiques. Too ello, carauterístiques comunes de la politización de la llingua, propies del empiezu d'un movimientu de normalización llingüística.

Emplegu del hiperasturianu y los problemes qu'ocasiona na llingua

Dende les estayes académiques y sociollingüístiques coincídese en considerar perxudicial pa la llingua'l modelu hiperasturianu que pue dar una sensación de poca seriedá, artificialidá y, magar que non d'un mou direutu, desaniciar les formes y espresiones propies y tradicionales del asturianu.

Ver tamién

Referencies

  1. ↑ Cuestiones d'asturianu normativu, vol. I, Ramón d'Andrés, Publicaciones Ámbitu, Uviéu, 2001, ISBN 84-95640-17-1
  2. ↑ Cuestiones d'asturianu normativu, vol. I, Ramón d'Andrés, Publicaciones Ámbitu, Uviéu, 2001, ISBN 84-95640-17-1
  3. ↑ Fernando Álvarez-Balbuena García "Tres notes etimolóxiques pinyar, imu y l'oligo". Lletres Asturianes nu. 39. Ed. ALLA. Uviéu
  4. ↑ un xoxu chenu de paz val inda más qu'un palaz "Contribución a la gramática histórica de la lengua asturiana". X. Ll. García Árias. Ed. Universidá d'Uviéu 1988.
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.