Eleiciones de 1979

Tres el golpe d'estáu de 1979, mientres la preparación de les eleiciones xenerales del 18 de xunu, el candidatu del nkrumahista Partíu Nacional del Pueblu, al que pertenecía Limann, Imoru Egala foi inhabilitáu pa exercer cargos públicos por dolce años pol Conseyu Revolucionariu de les Fuercies Armaes (AFRC), polo que Egala nomó a Limann, que yera una figura desconocida inclusive dientro del so propiu país, como candidatu a la presidencia, con Joseph W.S. de Graft-Johnson como compañeru de fórmula. A pesar de ser casi un completu desconocíu, Limann llogró la victoria en primer vuelta col 35% de los votos, programándose una segunda vuelta ente él y Victor Owusu, del Partíu del Frente Popular, pal 9 de xunetu. El PNP llogró mayoría absoluta nel Parllamentu con 71 de los 140 escaños. Limann trunfó na segunda vuelta col 62% de los sufraxos.^[2] Sicasí, la llexitimidá del nuevu gobiernu viose amenorgada pola desaxeradamente baxa participación, menor al 40%.^[3]

Limann y Graft-Johnson, según los 140 parllamentarios electos, fueron juramentados el 24 de setiembre pa un mandatu de cuatro años.^[3]

Resume de gobiernu

A diferencia de los líderes electos anteriores del país, Limann yera un ex diplomáticu y una figura non carismática ensin siguidores personales. Como reparó'l mesmu Limann, el gobernante PNP incluyía persones con orientaciones ideolóxiques contradictories. Dacuando discrepaben fuertemente ente ellos sobre les polítiques nacionales, lo cual punxo en dulda la capacidá del nuevu gobiernu pa enfrentar la fuerte inestabilidá política que carecía la nación dende la cayida de Nkrumah.^[3] Al momentu d'asumir Limann el gobiernu, solo Ghana y Nixeria teníen gobiernos escoyíos democráticamente, ente que tolos países de la rexón yeren estaos de partíu únicu o dictadures militares.

Sicasí, l'amenaza más inmediata pa l'alministración de Limann foi'l AFRC, especialmente los oficiales que s'entamaron nel "Movimientu del 4 de xunu" pa supervisar a l'alministración civil. Nun esfuerciu por evitar que la AFRC mirara percima del so costazu, el gobiernu ordenó a Rawlings y a dellos otros oficiales del exércitu y la policía acomuñaos cola AFRC a retirase; sicasí, Rawlings y los sos asociaos siguieron siendo una amenaza latente, particularmente cuando la economía siguió'l so cayente. El primer presupuestu de Limann, pal añu fiscal de 1981, calculó la tasa d'inflación ghaniana nun 70% pa esi añu, con un déficit presupuestariu equivalente al 30% del PIB.^[3]

El Congresu de Sindicatos afirmó que los sos trabayadores yá nun ganaben lo suficiente pa pagar los alimentos, y muncho menos cualesquier otra cosa. Producióse una folada de fuelgues, munches consideraes illegales pol gobiernu, caúna de les cuales amenorgó la productividá y, poro, l'ingresu nacional. En setiembre, el gobiernu anunció que despidiríen a tolos trabayadores públicos en fuelga. Estos factores erosionaron rápido'l sofitu llindáu que'l gobiernu de Limann esfrutaba ente civiles y soldaos. El gobiernu cayó'l 31 d'avientu de 1981, n'otru golpe encabezáu por Jerry Rawlings.^[3]