Hexanchus griseus
bocadulce buxu
Estáu de caltenimientu
Cuasi amenazáu (LR/NT)
Cuasi amenazáu (IUCN 2.3)
Clasificación científica
Reinu: Animalia
Filu: Chordata
Clas: Chondrichthyes
Subclas: Elasmobranchii
Orde: Hexanchiformes
Familia: Hexanchidae
Xéneru: Hexanchus
Especie: H. griseus
(Bonnaterre, 1788)
Distribución
Consultes
[editar datos en Wikidata]

El bocadulce buxu[1] (Hexanchus griseus) ye una especie de tiburón de la familia Hexanchidae. Habita les agües fondes, columbráu a fondures próximes a los 2000 m, qu'apenes evolucionó de los sos ancestros del periodu Xurásicu hai unos 190 millones d'años.[2]

Descripción

Les sos seis apertures branquiales a cada llau de la cabeza, más próximes ente sigo na zona ventral, indiquen que n'efeutu trátase d'un escualu bien primitivu, pues les especies de tiburones más evolucionaos presenten cinco apertures branquiales.

Bocadulce. Detalle de les seis branquies.

El bocadulce llega a midir hasta 4,8 m de llargor y pesar más de 1000 kg -el mayor exemplar prindáu rondó los 1000 kg nes mariñes d'Alicante-.. Tien un cuerpu robezu y la cabeza ancha y achaplada cola cara curtia y arrondada.[3] La boca, ventral y arrondada, tien los dientes del quexal cimeru nuna filera, y los del quexal inferior, en 6 fileres, con forma de peñe.

Los sos güeyos son grandes, elípticos y verdosos, fluorescentes en vida y ensin membrana nictitante, anteriores a la boca. Tien una aleta dorsal atrasada, próxima al caudal. El so color ye pardu buxu o verdosu, con banduyu más pálidu y aletes escures, lo que lu dexa mimetizase nes escures agües de les fondures.

Distribución y hábitat

Trátase d'una especie de vezos solitarios y d'ambientes bentónicos amestaos a les agües de les plataformes continentales ya insulares. Atópase-y nes mariñes oceániques tropicales y templaes -dende Islandia a Namibia, tando presente nel Mediterraneu- a fondures d'hasta 1875 m, anque en determinaes dómines del añu, xube pela nueche hasta ambientes mariniegos, y ye posible velu a pocos metros de la superficie.[4]

Comportamientu

Nun ye una especie peligrosa pal ser humanu, y los escasos ataques rexistraos a humanos foron porque lu provocaron primeramente. La so carne comercialízase fresco o conxelao pa consumu -anque considérase semitóxica polos sos fuertes efeutos laxantes- y tamién pa producción d'aceite y alimentación de peces.[2]

Bocadulce.

Alimentación y reproducción

Aliméntase de pexes, crustáceos, otros tiburones, y tamién puede presentar vezos carroñeros. Les femes son fértiles al llegar a los 4,5 m y los machos a los 3,6 m. La dómina de reproducción ye ente ochobre y mayu. Ye un tiburón ovovivíparu, pudiendo tener de 20 a 100 embriones ente los que se produz canibalismu intrauterín. Los naciellos miden unos 70 cm.[2]

Ver tamién

  • Taxonomía de los tiburones
  • Hexanchus nakamurai (Tiburón de seis agalles de güeyu grande)

Referencies

  1. ↑ URL de la referencia: http://www.sabencia.net/nomenclator.php.
  2. 1 2 3 ZCO-1999. «La cañabota gris, el tiburón prehistórico de las profundidades». Consultáu'l 4 d'ochobre de 2011.
  3. ↑ Asturnatura. «Hexanchus griseus». Consultáu'l 4 d'ochobre de 2011.
  4. ↑ "Hexanchus griseus". En FishBase (Ranier Froese y Daniel Pauly, eds.). Consultáu n'octubre de 2011. N.p.: FishBase, 2011.

Bibliografía

  • El léxico de la fauna marina en los puertos pesqueros de Asturias Central, Emilio Barriuso, Uviéu 1986. IDEA. 

Enllaces esternos

This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.