Helen Holmes
Vida
Nacimientu Chicago, 19 de xunu de 1893
Nacionalidá Bandera de Estaos Xuníos d'América Estaos Xuníos
Llingua materna inglés
Muerte Burbank, 8 de xunetu de 1950 (57 años)
Sepultura Forest Lawn Memorial Park
Causa de la muerte enfermedá cardiovascular
Familia
Casada con J.P. McGowan ( – 1925)
Estudios
Llingües falaes inglés
Oficiu actriz, direutora de cine, actriz de teatru, especialista de cine, actriz de cine
IMDb nm0391847
Cambiar los datos en Wikidata
Helen Holmes en Baltimore and Ohio employees magazine, 1912.

Helen Holmes (19 de xunu de 1893, Chicago – 8 de xunetu de 1950, Burbank) foi una actriz cinematográfica d'Estaos Xuníos de la dómina del cine mudu.

Entamos

Anque nun hai rexistru oficial sobre'l so llugar de nacencia, Helen Holmes afirmaba nacer en South Bend (Indiana), pero criase en Chicago, Illinois. Empezó a trabayar como modelu fotográfica, anque finalmente dedicóse a la interpretación, actuando nel teatru y debutando en Broadway en 1909.

A los 17 años d'edá, Holmes treslladóse fora de California con cuenta de curiar del so hermanu, enfermu de tuberculosis. Al finar el so hermanu, la so amiga Mabel Normand, actriz de fama y que se treslladara a Hollywood en 1912 pa trabayar nos Keystone Studios propiedá de Mack Sennett, convencióla pa trabayar nel cine na mariña oeste de los Estaos Xuníos.

Kalem Film Company

Holmes empezó la so carrera cinematográfica en 1912 con un pequeñu papel pa Keystone preparáu por Mabel Normand. Nun fixo demasiaes actuaciones pa Keystone y, anque curiosa, escarecía de la guapura glamorosa d'otres estrelles, polo que se vio apostrada a papeles secundarios hasta finales de 1913, cuando robló contratu col nuevu estudiu en Hollywood de Kalem Company.

El primer filme de Helen Holmes en Kalem foi dirixíu por J.P. McGowan, con quien empecipiaría una rellación sentimental qu'acabaría en matrimoniu. Nos sos dos primeros años con Kalem Studios, Holmes actuó en más de trenta curtios nos que se ganó la notoriedá gracies a la so habilidá atlética pa interpretar escenes de riesgu físico.

Nuna dómina na que'l sufraxu femenín taba nel candeleru, en marzu de 1914 el competidor de Kalem Studios, Pathé, estrenó un serial d'aventures tituláu The Perils of Pauline. Protagonizáu por Pearl White nel papel d'una coraxosa y desacobardada heroína, esta producción foi nun enorme ésitu de taquilla. Como resultáu d'ello, Kalem Studios por efeutu Bandwagon en payares de 1914 estrenó'l so propiu serial d'aventures, The Hazards of Helen.

Escoyida como estrella de la serie, nos ventiséis episodios nos que trabayó, Helen Holmes fixo casi toles escenes peligroses. Interpretando a una heroína independiente, intelixente y atélite, en delles de les sos escenes Helen faía coses como saltar a un tren en marcha escorriendo a un malváu lladrón de trenes. Anque dacuando'l guión dexaba que Helen fuera rescatada por un curiosu héroe masculín, na mayor parte de los capítulos yera ella la que s'enfrentaba a los malvaos llevándolos ante la xusticia.

The Hazards of Helen convirtió a Holmes nuna gran estrella, y ella y el so home decidieron capitalizar la so fama y abandonar Kalem pa trabayar pa la productora de Thomas Harper Ince y p'Universal Studios. Tres unos pocos filmes, Holmes y McGowan formaron Signal Film Productions, rodando les sos propies películes d'aventures. Ente finales de 1915 y entamos de 1917, fixeron xuntos una docena de filmes que tuvieron un ésitu razonable, pero problemes financieros y de distribución obligaron a Holmes a nun actuar de nuevu hasta 1919, nesta ocasión como estrella d'otra compañía. Solamente filmó una película tantu en 1919 como en 1920, y namái dos en caún de los trés años siguientes. Sicasí, ente 1924 y 1926 Helen Holmes fixo 18 curtios d'aventures, pero la so popularidá empezaba a menguar nun mercáu enchíu con filmes con heroínes femenines.

Amás de lo anterior, na década de 1920 Holmes actuó en dellos filmes de xéneru wéstern xunto al actor y estrella del rodiu Jack Hoxie.

A lo llargo de la so carrera Helen Holmes trabayara dacuando nel teatru, y al términu del so matrimoniu volvió a la escena, faciendo la so última interpretación en Broadway en 1935. Finalmente casóse col especialista cinematográficu Lloyd A. Saunders y, como resultáu de la popularidá alcanzada poles películes del perru Rin Tin Tin, dambos dedicáronse al entrenamientu d'animales pal so usu nel cine.

Tres la so retirada del cine, Helen rexentó un pequeñu negociu d'antigüedaes en San Fernando (California), llegando a tener una estensa coleición de muñeques pocu frecuentes.

Helen Holmes finó en 1950 como resultáu d'un fallu cardiacu, trés cinco años d'enfermedá. El fallecimientu tuvo llugar na so casa en Burbank (California). Tenía 58 años d'edá. Foi soterrada nel Campusantu Forest Lawn Memorial Park de Glendale (California).

Referencies

  • Los Angeles Times, Helen Holmes, Silent Film Actress, Dies, July 10, 1950, Page A3.
  • The New York Times, Helen Holmes, July 10, 1950, Page 21.

Referencies

    Enllaces esternos

    This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.