Iniciu

Nacíu na ciudá de Nueva York, Davenport crióse en Filadelfia. Pertenecía a una familia d'actores teatrales, siendo'l so padre l'afamáu intérprete Edward Loomis Davenport, y la so madre, Fanny Vining, una actriz inglesa descendiente del renomáu actor teatral irlandés del sieglu XVIII Jack Johnson. La so hermana yera la tamién actriz Fanny Davenport. El debú de Davenport n'escena tuvo llugar con cinco años d'edá, na obra Damon and Pythias.

Carrera cinematográfica

En 1913 foi fundador, xunto al actor Eddie Foy, de l'Actors Equity Association, un sindicatu d'actores estauxunidenses, y en 1914, a los 48 años d'edá, empecipió la so carrera nel cine debutando col filme mudu Too Many Husbands. Esi mesmu añu trabayó añu con Rose Tapley en Fogg's Millions, el primeru d'una serie de curtios cómicos. Amás, enantes del entamu de la Primer Guerra Mundial, dirixó once títulos, ente ellos dellos de los filmes de la serie Mr. and Mrs. Jarr.

Dalgunos de los filmes más famosos nos qu'actuó fueron The Bride Came C.O.D., rodáu nel Valle de la Muerte, The Life of Emile Zola, You Can't Take It With You, Gone with the Wind, The Hunchback of Notre Dame, Foreign Correspondent, Kings Row, The Ox-Bow Incident, The Bachelor and the Bobby-Soxer, y Meet Me in St. Louis.

Vida personal

En 1893 casóse cola actriz Alice Davenport, cola que tuvo una fía, Dorothy Davenport, que tamién foi actriz. En divorciándose en 1896, esi mesmu añu casóse con otra actriz, Phyllis Rankin^[3]. El nuevu matrimoniu tuvo cuatro fíos, toos actores: Arthur Rankin (padre d'Arthur Rankin Jr., fundador del estudiu d'animación Rankin/Bass), Ned Davenport, Ann Davenport, y Kate Davenport^[3]. Por cuenta del so matrimoniu con Rankin, foi cuñáu de Lionel Barrymore, que taba casáu cola hermana de Phyllis, Doris Rankin. El padre de Phyllis Rankin, McKee Rankin, fuera'l principal actor del Teatru Arch Street, que foi dirixíu pola güela de Lione, Louisa Lane Drew.

En finando la so esposa, Harry Davenport treslladóse a Los Angeles, California, onde vivió colos sos fíos enantes de finar en 1949 por causa de un infartu agudu de miocardiu. Tenía 83 años d'edá. Foi soterráu nel Campusantu Kensico de Valhalla (Nueva York).