Semeyes de la Guerra de Corea.

La Guerra de Corea foi una guerra ente Corea del Norte (col sofitu de China y la Xunión Soviética) y Corea del Sur (col sofitu de les Naciones Xuníes, y principalmente d'Estaos Xuníos). La guerra entamó'l 25 de xunu de 1950, cuando Corea del Norte invadió Corea del Sur tres dellos enfrentamientos na frontera y una insurrección nel sur. La guerra finó, de forma non oficial, con un armisticiu, el 27 de xunetu de 1953.

Tres de la rendición de Xapón al final de la Segunda Guerra Mundial, el 15 d'agostu de 1945, Corea foi dividida en dos zones d'ocupación, quedando establecida la llende ente elles nel paralelu 38ºN. Los soviéticos alministraben la metá septentrional, y Estaos Xuníos la meridional. En 1948, de resultes de les tensiones de la Guerra Fría, les dos zones d'ocupación convirtiéronse n'esaos soberanos: el norte convirtióse nún estáu socialista totalitariu gobernáu por Kim-Il-Sung, y el sur nún estáu capitalista autoritariu dirixíu por Syngman Rhee. Los dos gobiernos reclamaron pa sigo la condición de únicu gobiernu llexítimu de Corea, y dengún aceptó la llende ente ellos como una frontera permanente.

Soldaos norcoreanos del Exércitu Popular de Corea cruciaron la frontera el 25 de xunu de 1950, avanzando pel territoriu surcoreanu. El Conseyu de Seguridá de les Naciones Xuníes denunció esti movimientu como una invasión, y autorizó la formación del Comandu de les Naciones Xuníes en Corea y l'unviu de soldaos pa repeler la invasión. Estes decisiones foron tomaes ensin participación de la Xunión Soviética y la República Popular China, que sofitaben a Corea del Norte. Ventiún países aportaron soldaos pal exércitu de les Naciones Xuníes, magar que'l 90% de los soldaos aportolos Estaos Xuníos.

A los dos meses d'entamada la guerra l'Exércitu de Corea del Sur y les fuerces estauxunidenses tresportaes de forma urxente a Corea taben a piques de ser derrotaos, y retiráronse a una pequeña zona asitiada tres d'una llinia defensiva, conocida como Perímetru de Pusan. En setiembre de 1950 les tropes de la ONX llanzaron una contraofensiva anfibia en Incheon, dexando aisllaos en territoriu surcoreanu a munchos soldaos norcoreanos; los que consiguieron escapar al embolsamientu y la captura foron forciaos a retroceder hacia'l norte. Les fuerces de la ONX invadieron Corea del Norte n'ochobre, avanzando rápidamente hacia'l ríu Yalu, llende de China y Corea del Norte. En rempuesta al avance soldaos chinos del Exércitu Popular de Voluntarios cruciaron el Yalu y entraron en guerra. Este movimientu sospresivu de China forció una retirada de la coalición multinacional. Los soldaos chinos entraron en Corea del Sur pa finales d'avientu.

Nos siguientes meses Seúl foi capturada cuatro veces, y finalmente les tropes comunistes foron forciaes a retirase hasta'l paralelu 38, la frontera d'anantes de la guerra. El frente estabilizose, y los dos caberos años de guerra convirtiéronse nuna guerra de desgaste. L'escenariu principal foi l'aéreu: Corea del Norte sufrió les consecuencies d'una campaña de bombardeos masivos, y hebo combates aéreos, los primeros ente caces a reacción, ente aviones de los dos bandos, nos que participaron, de forma encubierta, pilotos militares soviéticos.^[1]

La llucha finó'l 27 de xunetu de 1953, fecha de la robla del Alcuerdu d'Armisticiu de Corea. Esti documentu afitó la creación de la Zona Desmilitarizada de Corea, una fastera despoblada alredor del paralelu 38 que separta los dos países, y acordó les condiciones d'un intercambiu de prisioneros. Sicasí, nunca nun se firmó un tratáu de paz y, poro, les dos Corees siguen entá téunicamente en guerra. N'abril de 2018 los cabezaleros de los dos países aconceyaron na Zona Desmilitarizada y alcordaron trabayar nos términos d'un tratáu que ponga fin de forma formal a la guerra.

La guerra de Corea foi una de les que más destrucción causaron na época moderna, con trés millones de víctimes y una proporción de víctimas civiles del total mayor que la de la Segunda Guerra Mundial o la guerra de Vietnam. Provocó la destrucción de casi toles principales ciudaes del país y dambos bandos masacraron a los contrarios: el gobiernu surcoreanu asesinó en masa a miles de sospechosos de comunismu, y el norcoreanu torturó y mató de fame a los sos prisioneros de guerra. Coles dos Corees lluchando col sofitu de potencies estranxeres, la Guerra de Corea foi una guerra subsidiaria. Dende'l puntu de vista de la ciencia militar, combinó estratexes y táutiques de la Primera y la Segunda guerres mundiales: empezó con una campaña móvil de rápidos ataques d'infantería siguíos por incursiones de bombardeos aéreos, pero convirtióse nuna guerra estática de trincheres dende xunetu de 1951.

Referencies

Enllaces esternos

• Wikimedia Commons acueye conteníu multimedia sobre Guerra de Corea .