Yacimiento arqueolóxicos

Pela redolada de Granátula pueden visitase dos xacimientos arqueolóxicos bien importantes: La Encantada, de la Edá del Bronce, de tipu “castellón” por tar asitiáu n'altor; caltién muralles defensives, viviendes o silos y alluga una cueva cola lleenda d'un llagartu o culiebra que se tresforma na Trocanta o Encantá cada nueche de San Xuan.

Y el Xacimientu arqueolóxicu de Oreto y Zuqueca, con restos que tomen dende dómina prerromana a la Edá Media, como la necrópolis visigoda, el Bautisteriu paleocristianu y los Baños islámicos, los más antiguos dataos na Península Ibérica.

Patrimoniu artísticu

Al pie de esti xacimientu puede almirase el Santuariu de la Patrona de la llocalidá, la Virxe de Oreto y Zuqueca, ermita románica del sieglu XIII, declaráu Bien d'Interés Cultural. El Santuariu de la Patrona ta conformáu por un conxuntu d'edificios na so mayor parte del sieglu XIII, magar caltién arcos, piedres y pilastres de dómines anteriores, especialmente visigoda. Nes sos cercaníes perdura'l Ponte romana de Baebio Publio Venusto (sieglu I), visible cuando baxa'l volume d'agua del banzáu del Jabalón.

Pasiando pol nucleu urbanu puede visitase la Ilesia de Santa Ana, del sieglu XIV al XVIII, cola imaxe de la Virxe de Oreto y Zuqueca (sieglu XIII) o la torre y artesonado del coru (sieglu XVI). Cerca atópase'l Palaciu de los Torrubia (sieglu XVIII), declaráu Bien d'Interés Cultural, típicu palacete manchegu de trés plantes y patiu con columnes, y la Casa Mudéxar amiesta (sieglu XV). La llocalidá caltién la mayoría de los edificios de la vida ya instituciones de la Edá Moderna, sieglos XVII y XVIII, como la Casa de la Inquisición, les Tercies, la Posada de la Sindical o'l Pósito.

El visitante puede averase a la casa onde nació en 1793 el xeneral y políticu Baldomero Espartero y la so estatua ecuestre o afayar xunto al cascu urbanu la Fonte Agria o les construcciones populares como les cases de campu, pontes, nories... y los singulares carapuchetes, a manera de cabañes de piedra.