Goico Aguirre
Vida
Nacimientu	Uviéu, 9 de xineru de 1906[1]
Nacionalidá	España
Muerte	Madrid, 27 de xunetu de 1987 (81 años)
Estudios
Llingües falaes	castellanu
Oficiu	escultor, pintor
Trabayos destacaos	Relieves del Instituto Nacional de Previsión (es)

Faustino Goicoechea Aguirre (9 de xineru de 1906, Uviéu – 27 de xunetu de 1987, Madrid) foi un pintor y escultor asturianu.

Biografía

Foi discípulu de Víctor Hevia na Escuela d'Artes y Oficios d'Uviéu. A los dieciséis años gana por concursu-oposición una beca pa la Escuela de Belles Artes de San Fernando. En 1926 concurre con bocetos y escultures a una esposición entamada pol Atenéu Obreru de Xixón; en 1927 algama'l títulu de profesor de dibuxu, y en 1929 la Diputación concéde-y una beca pa dir a estudiar a Roma. Al tornar d'Italia fai la so primera esposición n'Uviéu, en 1930, y depués de la buena impresión que causa marcharía a París, naguando por conocer de cerca les tendencies escultóriques del momentu. Algama ellí un importante éxitu na Galería d'Arte Contemporaneu, y yá con fama reconocida, presenta nel Atenéu d'Uviéu dalguna de les sos obres, que son bien aplaudíes. En 1933 ingresa nel profesoráu de segunda enseñanza, y ye destináu a Ḷḷuarca, pero los numberosos encargos que yá tien por entós oblíguenlu, dos años depués de tomada posesión, a renunciar a la plaza pa dedicase plenamente a la escultura. En Ḷḷuarca casaríase cola so prima Julia Suárez del Otero y Aguirre.

En 1935, nel so estudiu de la calle Santa Clara, n'Uviéu, posó pal pintor uvieín Magín Berenguer. Ye autor de los relieves qu'adornen la fachada de la entós llamada "Caxa de Previsión".

Desencadenada la Guerra Civil Española, Goico vio como se francía, ya casi pa siempre la so carrera de escultor. En Xixón fizo dibuxos y caricatures polítiques p'Avance qu'ellí se publica. Tamién lleva a cabu, nesa dómina, una importante producción como cartelista comprometíu cola causa republicana. El Gobiernu de Madrid nómalu delegáu provincial de Belles Artes, y dende esi puestu -recuerda Juan Antonio Cabezas- tuvo que llevar a Xixón la imaxe de la Virxe de Cuadonga qu'años depués apaecería intacta na embaxada d'España en París. Al cayer el frente d'Asturies foi xuzgáu y condergáu a muerte, pena que-y sería conmutada pola de reclusión, cumpliendo cinco años de prisión. Darréu treslladaríase a vivir a Madrid, onde se dedicaría preferentemente al dibuxu y la ilustración. En 1947, algama un importante éxitu nel Muséu d'Arte Contemporaneu de Madrid con una serie d'acuareles. La ilustración de llibros, les sos aportaciones a "España" de Tánxer y otros periódicos, los sos dibuxos pal cine y, sobre too, la cada vez más depurada producción d'acuareles, que, siempre con éxitu, llevó a munches esposiciones, constituyeron, n'adelante, les sos principales formes d'espresión.

Nel añu 1989, na sala Nogal d'Uviéu, celébrase una esposición-homenaxe con una coleición de 23 acuareles.

Referencies

Enllaces esternos