Faru de Bustu
Alministración
Allugáu en	El Cabu Bustu (Valdés)
Entidá alministrativa	Valdés
Estáu	España
Coordenaes	43°34′09″N 6°28′11″W / 43.569291°N 6.469636°O / 43.569291; -6.469636
Cuerpu d'agua	Océanu Atlánticu Norte
Inauguración	1 d'abril de 1858
Información téunica
Orde	3º
Altor	9 metros
Altor focal	86 metros
Alcance	25 milles náutiques
Lluz carauterístico	[(L 0 3 oc 2 9)3 veces]L 0 3 oc 10 1
Carauterístiques de la lluz	Óptica catadióptrica xiratoria enriba un flotador de mercuriu allumada por una llámpara de 1.500 W, con otra de reserva que funciona con un grupu electróxenu diésel. Planu focal sobro’l ras mediu de la mar: 73 m Planu focal sobro’l tarrén: 10 m Algame con bon tiempu: 35,8 milles Algame con burriana: 16 milles Rellumos: Grupos de cuatro rellumos cada 20 segundos
Señales sonores	Non

El faru de Bustu ta allugáu nel cabu homónimu, que s'asitia nel conceyu asturianu de Valdés. El cabu, que se mete pal mar en direición NO-SE dende la marxe derecha de la boca'l ríu Esva na playa de Cueva, pertenez a la formación xeolóxica conocida como rasa costera cantábrica, y acueye, na so fastera oriental, importantes xacimientos humanos prehistóricos. Amás d'ellos, nesta llanada nun hai más qu'una entidá de población: l'aldea de Bustu, que ta a 1,5 km del faru.

El faru construyóse, dientro del Plan de Alumbrado Marítimo de las Costas Españolas de 1847, col envís d'allumar el cachu de costa que había en solombres dende'l cabu Peñes hasta'l d'Estaca de Bares (La Coruña), y foi inauguráu el 1 d'abril de 1858. L'edificiu orixinal yera rectangular, con dos cuerpos cuadraos destinaos a vivienda xuníos por otru central con un porche cubiertu. Teyaba en pizarra, a cuatro agües nos cuerpos llaterales, y tenía la entrada na fastera Sur. En 1920 se-y dio la so forma d'anguaño, de "U", al pesllar definitivamente'l porche. Años dempués, primero de la Guerra Civil, el faru fizo les veces d'escuela del pueblu y el so fareru les de maestru.

La torre orixinal, que taba apegada al edificiu na metá de la fachada norte, yera, como puede vese nes semeyes que queden d'ella, perguapa. Yera cuadrada y remataba con un balcón con baranda de fierro. Perriba d'ella taba'l torruxón, decagonal, sobro'l que taba la llinterna. La nueva, de 1962, ye igual que la de Tapia: un prisma cuadráu fecho n'azulexos de color crema, con azulexinos grises qu'escriben la pallabra Busto na cara que da pa la mar.

La llinterna, como la óptica orixinal, yera de la casa francesa Sautter. Funcionaba a lo primero con aceite d'oliva, y dempués con parafina y petroleu. En 1917 foi lletrificada. Tocántenes a la óptica, la primera tenía un sector encarnáu, y camudose en 1935 por otra de la casa Pintsch. Camudose otra vuelta más en 1962, por una catadióptrica que xira enriba d'un flotador de mercuriu per aciu d'un reló de La Maquinista Valenciana. Ésta ye de tercer orde, y tien una distancia focal de 375 mm. Tien la forma d'una escafandra de buzu, y reflexa la lluz d'una llámpara de 1500 W. Pa cuando marcha la corriente hai otra de reserva, qu'alluma gracies a dos grupos electróxenos diésel donaos pol plan Marshall dempués de la Segunda Guerra Mundial.

Nel faru hai, tamién, una estación meteorolóxica automática.

Referencies

Enllaces esternos

• Wikimedia Commons acueye conteníu multimedia sobre Faru de Bustu.
• (castellán) Faros de Asturias
• (castellán) El faru d'El Cabu Bustu na web d'El faro de Luisu
• (castellán) El yacimiento del cabo Busto (Valdés, Asturias). Una secuencia del Pleistoceno Medio en el Norte peninsular, de José Adolfo Rodríguez Asensio

Bibliografía

• Menéndez Solar, Belén, Faros del litoral asturiano. Uviéu, Conseyería de Fomentu del Principáu d'Asturies, 1997.
• Sanz, Eduardo, Faros de Asturias. Xixón, Silverio Cañada Editor, 1990.