La Federación Anarquista Ibérica (FAI) ye una organización fundada en 1927 na playa d'El Saler, Valencia, como continuación de dos organizaciones anarquistes, la portuguesa, Unión Anarquista Portuguesa y la española Federación Nacional de Grupos Anarquistas de España, teniendo d'esta forma un ámbitu d'actuación ibéricu. Anguaño la organización forma parte de la Internacional de Federaciones Anarquistes.
Dende la so fundación hasta la llegada de la dictadura franquista xuega un papel importante nel movimientu obreru español, sobre manera a través de la denominada trabazón cola CNT, ye dicir la presencia d'elementos faístes na organización anarcosindicalista. La intención yera que'l sindicatu nun s'alloñase de los postulaos de l'acracia. D'esta miente, na década de 1930 el sector faísta de la CNT opúsose al trentista.
La so organización tuvo sofitada sobre grupos pequeños d'afinidá anarquista d'activistes autónomos. La FAI permaneció como una organización secreta y illegalizada, incluso depués del reconocimientu de la so existencia dos años depués de la so formación. La so naturaleza oculta fia difícil xulgar la estensión numbérica de los sos miembros. Estímase que los miembros de la FAI xusto anantes de la Guerra Civil Española rondaba ente los 5.000 y 30.000. La cantidá de miembros medró notablemente a lo llargo de los primeros meses de la guerra.
La FAI foi tácticamente revolucionaria, con aiciones qu'incluyíen dende los robos de bancos pa l'adquisición de fondos, la constitución de biblioteques populares a la organización de güelgues xenerales. Sofitó esfuercios en contra de la dictadura de Rivera y la monarquía, y en 1936, contribuyó al establecimientu del Frente Popular a cambio de la lliberación de los numberosos presos llibertarios. Depués del alzamientu franquista, les organizaciones anarquistes entamaron a cooperar col gobiernu republicanu, non ensin contestación. A la vez puxó activamente pola Revolución Social Española de 1936 na que veía llevaos a la praxis les sos idees ácrates (colectivizaciones de tierres y industries, municipalismu llibertariu, etc.), aunque ello llevó a la par casos de represión na retaguardia republicana por parte de faístes (ante la oposición de destacaos militantes cenetistes) non sólo contra simpatizantes del facismu, sinón incluso contra republicanos moderaos, pequeños propietarios o la Ilesia.
A lo llargo de la dictadura franquista continuó clandestinamente, actuando xunto a les otres organizaciones y grupos del movimientu llibertariu español y depués de la llegada de la democracia fórmense grupos en varies llocalidaes que duren hasta anguaño, aceptando los postulaos ácrates clásicos, la so negativa a rexistrase llegalmente como asociación y manteniendo la independencia económica de cualquier institución. Sofita habitualmente les actividaes del anarcosindicato CNT-AIT y mantién rellaciones d'afinidá col mesmu, formando'l llamáu movimientu llibertariu históricu.
Referencies
Enllaces esternos
Wikimedia Commons acueye conteníu multimedia sobre Federación Anarquista Ibérica.
- Páxina de la FAI.
- Tierra y Libertad, periódicu de la FAI.