Ermu
Bioma y accidente xeográficu
tierras áridas y semiáridas (es) , paisaxe, Ecosistema y Hábitat

L'ermu^[1] o desiertu^[2] ye un terrenu despobláu, ensin vexetación o con mui poco y onde hai muncha diferencia de temperatura del día a la nueche (hai variaciones d'hasta 50ºC). Nesti terrenu les precipitaciones son enforma escases.

Alternativamente, tamién se define ermu como un terrenu que nun pue dar frutu, que nun pue dar collecha, despobláu. Según esta definición, tamién son ermedales, otros climes más fríos como l'árticu o la tundra, magar que lo avezáu ye rellacionar ermu con climes caldios y enllenos de sable.

Al aviesu de lo que la xente camienta sobro l'ermu o desiertu, nun suel ser too sable, l'ermu d'El Sáḥara por exemplu, namái un 22% del terrenu ta ocupáu peles dunes y el sable, mientres que la llera y la grava representen el 68%. El 10% restantes son montes.

Tien reputación nun abellugar vida, pero eso depende de la clas d'ermu; en munchos hai vida abondo, la vexetación adáutase al pocu mugor y la fauna escuéndese pel día pa caltener esti mugor. Los ermedales representen la zona orográfica más grande del planeta: la so superficie total ye de 50 millones de quilómetros cuadraos, alrodiu d'un terciu de la superficie terrestre.

Gran parte de los ermos allúguense en zones carauterizaes poles altes presiones constantes, condición que nun favorez la lluvia. Ente los ermos d'estes zones podemos solliñar: el Sáḥara y el de Kalahari n'África y los ermos d'Australia.

Climes desérticos

Los ermos tan distribuyíos ente distintes zones:

• Zones semiárides: tienen una media de precipitaciones de ente 150 y 300 mm añales. Suelen tar allugaes nos arabengos de los ermos y abarquen alrodiu del 15 % de la superficie de tierra del planeta
• Zones árides: son precipitaciones añales de 0 a 150 mm y abarca el 16 % de la superficie de tierra del planeta
• Zones hiperárides: son tan seques que a vegaes nun llueve n'años. Estes abarquen el 4 % de la superficie terrestre.

Referencies