Eleuterio Quintanilla
Vida
Nacimientu	Xixón, 24 d'ochobre de 1886[1]
Nacionalidá	España
Muerte	Burdeos, 18 de xineru de 1966[1] (79 años)
Estudios
Llingües falaes	castellanu
Oficiu	sindicalista, pedagogu
Miembru de	Confederación Nacional del Trabayu

Eleuterio Quintanilla Prieto, (24 d'ochobre de 1886, Xixón – 18 de xineru de 1966, Burdeos) foi un anarquista y pedagogu asturianu. Quintanilla foi una de les figures de mayor relieve intelectual y políticu nos ambientes obreros y sindicalistes de Xixón, popularmente yera conocíu por Quinta ente la xente y por Terio ente los sos alumnos.

Yera de familia obrera y numberosa. So pá yera conserxe del mercáu central d'hortalexes y so madre trabayadora na fábrica de tabacos. Estudió na escuela gratuita «La Cátedra» hasta los trece años, qu'entamó a trabayar como aprendiz de xocolateru, alternando'l trabayu coles clases nel Atenéu Obreru hasta adquirir una cultura amplia y dominiu n'idiomes. En 1908 llegará a ser presidente de la biblioteca popular del Atenéu.

Dende bien mozu sintióse llamáu poles idees llibertaries qu'en Xixón semó'l propagandista catalán Martín, que preparó'l tarrén a los sos seguidores. Ún d'estos foi Rogelio Fernández Fueyo (Rogelín el zapateru) qu'emplegaba la trestienda del so tallerucu como escuela d'anarquismu y pa otres enseñances; por exemplu, nesi taller recibió Quintanilla clases de gramática. Esta llamada de los ideales llibertarios afitóse pola amistá que caltién con Ricardo Mella, surdía en 1903 con ocasión d'una conferencia pronunciada por ésti nel Institutu Xovellanos.

Entama a collaborar col periódicu anarquista Solidaridad Obrera en 1909 y funda un añu más sero con Ricardo Mella Aición Libertaria, que s'asoleya a la vez en Vigo (onde vivía Mella) y Xixón hasta 1911, reapaeciendo en Madrid en 1913. Tamién collaborará en El Libertario

En 1911 acudió en representación d'Asturies al I Congresu de la CNT, en compañía de Pedro Sierra, representando a 1500 obreros de Xixón y La Felguera.

Tomó parte activa, nes primeres décades de sieglu XX, de coinflictos llaborales y mitines, polo que sufrió prisión y apaleamientos delles veces.

Hacia 1914 Quintanilla dexó'l so trabayu de xocolateru pa dedicase a la enseñanza na Escuela Neutra xixonesa, fundada en 1911. En 1917 intervendrá na preparación y nel desendolcu de la fuelga revolucionaria como miembru del comité asturianu.

Nel Congresu de la CNT de 1919 defenderá l'alianza cola UGT como primer pasu pa una futura fusión anque foi refugada la proposición. Tras la proclamación de la Dictadura de Primo de Rivera abandonó la llucha sindical direuta, anque siguió exerciendo una influencia nos llibertarios asturianos. En 1934 alentó l'Alianza Obrera.

Participó na masonería a través de la loxia Xovellanos númberu 337 de Xixón hasta 1933 cuando lu dan de baxa por falta d'asistencia y pagu de les cuotes. Quintanilla collaboró dende'l entamu de la nomada Guerra Civil española en llabores d'abastecimientu. Tres l'apición del periodicu anarquista CNT en Xixón, a entamos de 1937 escribirá dellos articulos sobro la "Non intervención". Dende 1937 perteneció al grupu Orto de la FAI, colo que dexa les sos actividaes na masonería.. En setiembre d'esti añu confiase-y la custodia del Tesoru artísticu de Asturies y Santander pal so treslladu a Francia. Yá en Barcelona tres la cayía d'Asturies, presidió'l Conseyu Nacional de la Infancia Evacuada dependiente del ministeriu d'Istruición publica y sanidá, del que yera ministru Segundo Blanco.

Eleuterio Quintanilla asistió como conseyeru téunicu a la Conferencia Internacional del trabayu de Xinebra en 1938.

En 1939 saldrá d'España definitivamente al frente d'una colonia infantil. Morrió exiliáu en Burdeos el 18 de xineru de 1966.

Anguaño, una cai de Xixón lleva'l so nome.

Referencies

Enllaces esternos

• Anarquistes francmasones n'Asturies