El Pieloro
Alministración
País España
Autonomía Principáu d'Asturies
Provincia provincia d'Asturies
Conceyu Carreño
Tipu d'entidá parroquia d'Asturies
Xeografía
Coordenaes 43°34′20″N 5°48′33″W / 43.5723°N 5.80905°O / 43.5723; -5.80905
El Pieloro alcuéntrase n'Asturies
El Pieloro
El Pieloro
El Pieloro (Asturies)
Altitú 131 m[1]
Llenda con Perlora, Llorgozana, Bocines, Cardo y Candás
Demografía
Población 180 hab. (2020)
Porcentaxe 1.77% de Carreño
0.02% de provincia d'Asturies
0.02% de Principáu d'Asturies
0% de España
Más información
Estaya horaria UTC+01:00
Cambiar los datos en Wikidata

El Pieloro[2] ye una parroquia de les doce del conceyu asturianu de Carreño.

Situación y comunicaciones

La parroquia d'El Pieloro alcuéntrase na fastera occidental del conceyu de Carreño, na so zona central. Llenda col conceyu Gozón al norte y al oeste, cola parroquia de Llorgozana al sur, cola de Perlora al este y cola de Candás al noreste.

La distancia media con Candás, capital del conceyu, ye d'unos 4 km (quedando a 3 km la casería d'El Raitán, como entidá más averada; y a 5 km la casería d'El Cellero, el nucleu más alloñáu).

El Pieloro ta atravesada pela carretera AS-110, que va de Candás a Tabaza.

La llinia F4 "Xixón-Cuideiru" de FEVE tien apeaderu en San Zabornín.

Territoriu y población

Tien un estensión de 5,83 km².

En 2011 tenía una población de 213 persones, 108 homes y 105 muyeres. [3]

Les entidaes de población de la parroquia son les siguientes:

ENTIDÁCATEGORÍAPOBLACIÓN (2011)
L'Alto la IlesiaAldega34
Los CalerosCasería9
El CelleroCasería3
La EspeñadaCasería4
La EstaciónLlugar10
LlanecesCasería14
El LlanoCasería22
El RaitánCasería42
El RendaliegoLlugar41
San ZabornínLlugar20
La XuncaCasería14

Topónimu

Diz Xosé Lluis García Arias [4], na estaya "La peregrinación":

""Al pie", "al piei" o "al pía" (del llatín AD PEDEM) son espresiones coles que se quier dar idea de proximidá o cercanía; son equivalentes, polo tanto, a otres del tipu "xunto a", "a la vera de" y hasta "debaxo de". En tal sentíu apaecen en:
El Pieloro (Cñ) ‘(al) pie de L’Oro’."

Sitios d'interés

Ilesia de Santa María d'El Pieloro[5]

Santa María d'El Pieloro ye'l templu románicu más importante del conceyu, declaráu Bien d'Interés Cultural.

La nave del cuerpu principal ta fechada nel sieglu XIII y, ente los sieglos XIII y XIV, construyóse la Capiella Mayor protogótica, que sustituyera l'ábside románicu. Nel sieglu XVI, llevantóse la capiella la Nuestra Señora de les Nieves, adosada al llau Sur de la Capiella Mayor. De dómina barroca son la construcción del campanariu y el pórticu, amás de la sacristía, onde taba la capilla de la Nuestra Señora de les Nieves.

La ilesia amburó cuando la Guerra Civil Española, perdiéndose la coleición de retablos barrocos qu'abellugaba: El Retablu de la Capiella Mayor (1716), el Retablu del Santísimu Cristu (1709), el Retablu de San Blas (1726) y el Retablu de la Nuestra Señora de les Nieves. En 1939, Luis Menéndez Pidal redautó el proyeutu de reconstrucción de la ilesia, que se fizo durante la década de 1940. Nueves restauraciones, mientres los años 80 y 90, dexaron la ilesia col aspeutu actual.

Asítiase nel barriu L'Alto la Ilesia.

Casa Lluisa[6]

Tamién nomada "Casa de los González Pola", ye una casa mariñana de piedra con portalón central, cola cocina y l'habitación caúna a un llau la entrada y la corte, cola teneda enriba, al fondu. Na fachada, l'escudu de los González Pola.

Asitiada nel barriu de San Zabornín, data del sieglu XVI. Dende l'añu 40, fuera chigre-tienda, hasta que morrió nos 80 l'últimu habitante, José Ramón Suárez, pa de l'actual propietaria de la casa Mª Luisa Suárez Suárez.

L'estáu de conservación ye permalu.

Fonte la Pipera[7]

Esta fonte y llavaderu alcuéntrase nel barriu de San Zabornín. Tien una estructura en forma de "L" y el cañu nel vértiz, tando rematada por un frontón. Tien cuatro llavaderes y un pilón que, tal vez, usárase como bebederu.

Bolera de batiente de San Zabornín[8]

Remocicada nel añu 2002, esta bolera tien instalaciones qu'inclúin una pista tillada con madera. Cuenta con illuminación propia pa facilitar el so uso nocherniegu.

Ye la sede de la Peña Bolística de San Zabornín y alcuéntrase nesti barriu.

Fiestes

  • 3 de febreru: San Blas.
  • Tercer domingu d'agostu: Fiestes Sacramentales.

Entidaes de la parroquia

  • Asociación de Ganaderos de "Santa María de Piedeloro", Escueles d'El Pieloro
  • Delegación de la Asociación Rexonal "Mujeres con Tiempo Propio", Barriu Llaneces, 2
  • Peña Bolística Zanzabornín, San Zabornín, 4

Referencies

Enllaces esternos

This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.