El Cantu
Alministración
País España
Autonomía Principáu d'Asturies
Provincia provincia d'Asturies
Conceyu Carreño
Parroquia Perlora
Partíu xudicial Xixón
Cambiar los datos en Wikidata

El Cantu[1] ye una entidá de población de la parroquia de Perlora, en Carreño.

L'INE establez que El Cantu ye una casería con 25 habitantes (12 homes y 13 muyeres). El so códigu de referencia ye 33 014 070800. [2]

Alcuéntrase a una distancia de Candás, capital del conceyu, de 4,50 km. Pal añu 2001 contaba con 12 viviendes, 11 principales y 1 non principal. [3]

Topónimu

Xosé Lluis García Arias fala d'esti topónimu de la siguiente mena:

"Amás de ‘piedra’ la pallabra asturiana cantu significa ‘arista’, ‘cima, o arista elevada común a les dos lladeres de la mesma elevación del terrén, que converxen pero pertenecen a distintu valle’. Términos derivaos serían cantexu ‘picachu’, cantollada ‘cayída estreldosa’, etc. El refraneru xeneralizó'l dichu popular pelos Santos, la nieve pelos cantos en clara referencia a que les primeres nieves apaecían al principiu payares.
La filiación etimolóxica d'esta pallabra, quiciá indoeuropea, paez tar en rellación cola raíz presente en cándanu que refier al color blancuzcu. El problema reside en que baxo la expresión cantu pueden confluyir dellos términos de oríxenes distintos como la pallabra probablemente céltica CANTUS ‘banda de la planta’, ‘círculu’ (TLG) tresmitida al traviés del llatín, y quiciá otra de orixe prerromanu, *KANTHO ‘ángulu, borde, esquina’, que se cree alcontráu na península en primitivos nomes de persona. De fechoye posible que se confundiera ente cantu ‘piedra’ y cantu ‘borde’ pola frecuencia de la piedra blanca nel llombu los montes (DCECH s.v. cantu I, II, III; 46 p. 76; 47 p. 18; 45 p. 147). Los nuesos llugares lleven esti nome con bayura (244 p. 58):
El Cantu (Vv, Cñ, Sr), Cantu Riba (Llv), Cantu Baxo (Llv), El Cantu Coyanca (Cñ), El Cantu la Cruz (Mi), El Cantu la Roza (Ra), El Cantu Perabeles (Sr), El Cantu’l Mediu (Lr), El Cantu la Vara (Cg, Ri), Cantu les Mates (Sr), Cantumolín (Pi, Mi), El Cantu’l Trechuru (Llg), El Cantu l'Oteiru (Pz)."[4]

Sitios d'interés

Ermita de San Andrés de Coyanca[5]

Anque l'edificiu ye modernu, reconstruyíu en 1940 dempués de la Guerra Civil Española, la construcción data del sieglu X, siendo tamién escuela de la parroquia dende finales del XIX.

Referencies

  1. ↑ «Espediente colos topónimos oficiales de Carreño». BOPA.
  2. ↑ Nomenclátor del INE, 2011
  3. ↑ Nomenclator de la SADEI
  4. ↑ Xose Lluis García Arias, "Toponimia Asturiana"
  5. ↑ Páxina del Ayuntamientu de Carreño

Enllaces esternos

This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.