La promesa naranxa

Fixo'l so debú como profesional nel añu 2002 col equipu Euskaltel-Euskadi col que ganó'l Tour de l'Avenir en 2003.

Nel Discovery de Bruyneel

En 2006 pasó al equipu americanu Discovery Channel de Johan Bruyneel (l'equipu y el direutor colos que Lance Armstrong ganara'l Tour de Francia en siete causes consecutives: 1999-2005). Nel so debú na formación estauxunidense consiguió ganar una etapa y la clasificacioón del monte na Vuelta a España , rematando 12ᵘ na clasificación xeneral.

En 2007 foi unu de los gregarios d'Alberto Contador mientres el Tour de Francia, quien finalmente llogró'l maillot mariellu de ganador de la xeneral. Egoi, 61ᵘ na xeneral, xubió al podiu de los Campos Elíseos xunto al restu de los sos compañeros al proclamase tamién ganadores na clasificación por equipos.

A pesar de los ésitos alcanzaos pol equipu, la retirada de Discovery Channel como patrocinador principal y l'imposibilidá de topa-y un relevu favoreció la desapaición de la formación. Fízose oficial entós que volvería vistir el maillot naranxa del Euskaltel-Euskadi.

Torna al Euskaltel

En 2008 empecipió la so nueva andadura nel equipu de casa ganando la clasificación del monte na Vuelta País Vascu, la carrera de casa de la formación vasca. En setiembre asitióse líder de la Vuelta a España, portando'l maillot oru mientres cuatro xornaes, siendo asina'l primer ciclista del Euskaltel-Euskadi en ser líder nuna de les grandes vueltes, hasta la etapa con final nel Angliru (onde foi desbancado del lideralgu por Alberto Contador, a lo postrero ganador final d'esa Vuelta). Egoi Martínez foi finalmente novenu na xeneral, llogrando la so meyor clasificación hasta entós nuna carrera de tres selmanes.

Egoi Martínez, xubiendo La Colombiere na 17ª etapa del Tour de Francia.

En 2009 empecipió llueu la temporada. Asina, en marzu ganó'l monte de la Tirrenu-Adriatico, y díes dempués dexóse ver na xubida al Poggio (un recuestu asitiáu cerca de la meta) na Milán-Sanremo. N'abril ganó la clasificación de meter volantes de la Vuelta al País Vascu. Dempués realizó un parón pa preparar el Tour de Francia, incluyendo unos díes d'entrenamientos nos Pirineos. Na Grande Boucle tuvo una destacada actuación, al convertise nel líder provisional del monte tres la última etapa pirenaica (gracies a la so presencia nuna fuga entemedia que-y dexó sumar los puntos necesarios nel Tourmalet), siendo asina'l primer ciclista del Euskaltel en llucir el maillot de llunares colloraos. En metiéndose nuna nueva fuga pa defender la so maillot, díes dempués Franco Pellizotti (Liquigas) -y desbancó en dicha clasificación, siendo l'italianu quien finalmente se proclamó rei del monte y xubió por tanto al podiu de París, ente que Egoi tuvo que conformase col segundu puestu. Pero más tarde, Franco foi descalificáu y el maillot de llunares pasó a ser de Egoi.

Despidida

El 28 d'avientu de 2013 anunció la so retirada del ciclismu tres doce temporaes como profesional y con 35 años d'edá.^[1]