Pelayu
monarca del reinu d'Asturies

718 - 737 - Favila →
Vida
Nacimientu valor desconocíu, circa 685[1]
Nacionalidá Reinu d'Asturies
Muerte Cangues d'Onís[2], 737[3] (51/52 años)
Sepultura Tumba de Don Pelayo (es) Traducir
Santa Cueva de Cuadonga
Familia
Padre Favila
Madre valor desconocíu
Casáu con Gaudiosa
Fíos/es
Hermanos/es Anónima (es) Traducir
Pueblu dinastía Astur-lleonesa
Estudios
Llingües falaes Llatín vulgar
Oficiu guerreru, aristócrata
Serviciu militar
Lluchó en Batalla de Cuadonga
Creencies
Relixón cristianismo niceno (es) Traducir
Cambiar los datos en Wikidata

Pelayu (circa 685, valor desconocíu – 737, Cangues d'Onís) foi'l primer monarca del reinu d'Asturies que rixó hasta la so muerte. El so orixe ye controvertíu, anque se-y atribúin los oríxenes más variaos. La Crónica Albeldense conviértelu nún noble godu («XV. ITEM ORDO GOTORUM OBETENSIUM REGUM. 1. Primum in Asturias Pelagius rg. in Canicas an. XVIIII. Iste, ut supra diximus, a Uittizzanc rege de Toleto expulsus Asturias ingressus.[5]). El testamentu d'Alfonsu III, del añu 869,[6] en que'l rei Magnu dona al presbíteru Sisnandu la ilesia de Santa María de Tenciana (Tiñana, Siero) que so tíu Alfonsu'l Castu ganara de les propiedaes pertenecientes a so bisgüelu Pelayu, vincula territorialmente a Pelayu col área central d'Asturies, anque ensin aportar datos sobro'l so llugar d'orixe. Frenó la espansión de los musulmanes haza'l norte, entamó la conquista cristiana y considérase tradicionalmente como'l fundador del reinu d'Asturies, anque investigaciones arqueolóxiques recientes suxeren que podría tenelo fecho sobre una organización política llocal anterior.[7]

La lleenda

Monumentu a Pelayu en Cuadonga

Según la lleenda, Pelayu yera un noble visigodu, fíu del duque Favila. Por cuenta de les intrigues ente la nobleza visigoda, el rei Witiza conspiró p'asesinar a so padre. Pelayu fuxó a Asturies, onde tenía amigos o familia. Darréu, al sentise inseguru na Península, coló como pelegrín a Xerusalén. Ellí permaneció hasta la muerte de Witiza y entronización de Rodrigu, del que yera partidariu. Con ésti, ocupó'l cargu de conde d'espatarios o de la guardia del rei y como talu combatió na batalla de Guadalete n'abril o mayu del añu 711. Tres la batalla abellugóse en Toledo y, a la cayida de la ciudá (714), mentes otros escapaben a Francia, elli volvió a Asturies, supuestamente custodiando l'ayalga del rei visigodu.

Les primeres incursiones árabes nel norte fueron les de Musa ibn Nusair (conocíu como Muza) ente los años 712 y 714. Entró n'Asturies pel puertu de Tarna, remontó'l ríu Nalón y tomó Lucus Asturum (Lugo) y dempués Xixón, onde dexó a cargu al gobernador Munuza. Les families dominantes del restu de les ciudaes asturianes capitularon y probablemente tamién la familia de Pelayu.

En 718 tuvo llugar una primera revuelta encabezada por Pelayu (al paecer porque Munuza casárase pola fuercia con so hermana Adosinda), que fracasó. Detuvieron y unviaron a Pelayu a Córdoba. Sicasí, consiguió escapar y volver a Asturies, onde encabezó una segunda sulevación, refuxándose nos montes de Cuadonga y Cangues, onde se caltenía la resistencia.

En 722 Munuza unvió a un xeneral, Al Qama, a someter a los sulevaos. Al Qama empobinóse contra Bres (Piloña), onde s'atopaba Pelayu. Ésti marchó coles tropes hasta'l monte Auseva, nel valle de Cangues y ellí, na Batalla de Cuadonga, aniquiló al destacamentu d'Al Qama que venía de la península p'ayudar a sofocar definitivamente la resistencia nos montes cantábricos.

Tres la batalla, el gobernador militar al mandu de la metá norte de la península Ibérica, Munuza, que tenía como base Xixón, tentó escapar d'Asturies y algamar la seguranza de les sos posiciones na meseta, pero foi prindáu y executáu xunto col so séquitu y tropes nún valle del centru d'Asturies.


Reinu d'Asturies (718-925)
Predecesor:
Nun hubo		 Rei d'Asturies
718 - 737		 Socesor:
Favila


Ver tamién

Referencies

  1. ↑ Identificador de la Gran Enciclopedia Rusa Online: 2709531.
  2. ↑ Afirmao en: Diccionario biográfico español. Identificador DBE: 4725/pelayo. Data de consulta: 22 mayu 2020. Editorial: Real Academia de la Historia. Llingua de la obra o nome: castellanu. Data d'espublización: 2011.
  3. ↑ Identificador de persona en The Peerage: p15271.htm#i152705.
  4. 1 2 Afirmao en: The Peerage. Llingua de la obra o nome: inglés. Autor: Darryl Lundy.
  5. ↑ "LLISTA DE LOS REIS GODOS D'UVIÉU. 1. El primeru n'Asturies foi Pelayu. Reinó en Cangues 18 años. Ésti, como enantes diximos, llegó a Asturies espulsáu de Toledo pol rei Witiza." Crónica Albeldense (CSIC Institutu d'Historia).
  6. ↑ RISCO, Fr. Manuel, España Sagrada, tomo XXX-VII, Madrid, 1789
  7. ↑ Noticia en La Voz de Avilés

This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.