Dicires
Datos
País d'orixe	España
Emisión
Emisora	A7
Varios

Dicires foi un programa que s'emitió pela canal A7. Tratábase d'un diccionariu audiovisual del asturianu que constaba de 120 microespacios con una duración d'ente 20 y 40 segundos, lo que permitía la repetición del programa cinco veces al día. El programa estrenóse en marzu del 2011 y emitióse nestos horarios: enantes de Mirasturies: el pasáu recién, a les 09:45; enantes de la primer edición de TPA Noticias, que principia a les 14.00; enantes del programa Conexión Asturias, a les 18:00; enantes de la segunda edición de TPA Noticias, que principa a les 20.30; y enantes de la tercer edición de TPA Noticias, que s'emite a les 00.30.

Dicires yera una producción de TPA en collaboración con Ediciones Trabe y contó col asesoramientu llingüísticu del escritor Antón García y la realización de Juan Tizón y Sofía Castañón. Cada programa incluyía esbilla de términos propios del asturianu y del gallegoasturianu. Les pallabres incluyíes taben escrites y pronunciaes n'asturianu y traducíes, al final de cada espaciu, al castellanu, inglés, árabe, rusu y chinu. Na parte final de cada episodiu delles cares pronunciaben nes sos llingües la pallabra asturiana a la que se refería'l spot.

Esta serie taba realizada n'alta definición y tenía un formatu reconocible qu'incluyía delles propuestes estilístiques onde cada pallabra definíase con una imaxe, una aición, un soníu, un diálogu, una suxerencia poética o una música. A la hora d'ilustrar les pallabres, combinábense imáxenes de dellos ambientes d'Asturies grabaes espesamente pa la serie: rural y urbanu, mineru y marineru, y mozu y adultu. Amás, l'espaciu quería apartase de los paisaxes típicos asturianos y potenciar la imaxe actual y moderna del país.

Referencies

Enllaces esternos

• Wikimedia Commons tien conteníu multimedia tocante a Dicires.