| Darréu | |
|---|---|
| Fundación | 2004 |
| Sede | Uviéu |
| Ideoloxía política | socialismu, nacionalismu asturianu y Ecoloxismu |
| Páxina web | mocedarevolucionario.blogspot.com |
 | |
.jpg.webp)
Darréu, Mocedá d'Izquierda Soberanista, ye una organización política asturiana de mocedá.
Definición
Darréu defínese soberanista y d'izquierda, asumiendo "les teoríes que defenden el poder de la clas obrera moza pa llevar a cabu la so actividá revolucionaria y avanzar faza’l socialismu y la emancipación nacional, siguiendo los principios básicos d'esta vertiente ideolóxica". Naz col enfotu de ser la organización política referente tantu del soberanismu como del independentismu asturianos d'izquierda na estaya de mocedá.
Ye una organización horizontal y asamblearia na que puen participar toles moces y mozos que compartan los sos entamos mínimos hasta los 30 años.
Funcionamientu
Nos sos oríxenes, Darréu tuvo venceyao a la organización política Andecha Astur, actuando como la so estaya de mocedá y contribuyendo asina a l'enanche d'esi movimientu políticu. Sicasí, el 20 d'Avientu de 2014, Darréu decidió frayar los llazos formales con Andecha Astur tres varios años de rellaciones inesistentes, afitándose asina como una organización soberana na teoría y na práutica.
Según señalen, Darréu quier sirvir como una estructura que trabaye la estaya de la mocedá dientro del ampliu movimientu que constitúi'l soberanismu asturianu, compuestu por distintes plataformes, organizaciones, estructures ya iniciatives.
L'órganu principal d'organización ye la Xunta Nacional, onde periódicamente la militancia toma les decisiones más inmediates. Tamién cunten como ferramienta organizativa y de toma de decisiones col Conceyu Nacional, órganu congresual que n'avientu de 2014 desendolcó la so quinta edición.
Actividá
Ente los actos propios de Darréu destaquen los conciertos conmemorativos de la revolución d'ochobre ("Asturies nun escaez") qu'en 2006 pasen a integrase nel Día de la Mocedá Revolucionario xornada de vindicación social de la mocedá onde amás del conciertu en 2006 destacó la manifestación baxo'l lema "Futuru n'Asturies".
Depués d'un periodu de trés años ensin organizar esti eventu -tres la suspensión del últimu momentu de la edición que diba celebrase en Llangréu-, en 2014 tornó a desendolcase n'Uviéu, con charres, meses redondes, alcuentru internacionalista, ruta histórica, o'l XI Asturies Nun Escaez, históricu pola torna a los escenarios d'Avientu, 14 años depués de la so dixebra.
La Mocedá d'Izquierda Soberanista vien amás desendolcando periódicamente campañes alrodiu distintos temes y problemátiques: "Nun bebas Coca-Cola", "Stop emigración forciada de la mocedá", les aiciones escontra les Feries d'Abril n'Asturies, o la reivindicación llingüística o nacional mediante l'activismu na cai, son dalgunes de les cuestiones trataes al traviés d'estes iniciatives.
Darréu participa amás en distintos actos y movilizaciones que se desendolquen n'Asturies: movilizaciones de coleutivos como Asturies en Pie, Asamblees de Trabayadores en Llucha, o Corriente Sindical d'Izquierda; o los actos que tolos años tienen llugar pol 8 setiembre o'l 25 mayu. A too ello amesten el so sofitu nel tarrén estudiantil a la Xunta Estudiantil Asturiana, organización que señalen como'l so referente d'aición y participación nesa estaya.
Publicaciones
La organización xuvenil editó la yá desapaecía revista Írguite, integramente n'asturianu y con conteníos culturales y políticos.
Anguaño l'actividá de Darréu refléxase nel so blogue: mocedarevolucionario.blogspot.com
