Cuno Corquera
Vida
Nacimientu Ables, 1918
Nacionalidá España
Muerte 2002 (83/84 años)
Estudios
Llingües falaes asturianu
Oficiu escritor
Cambiar los datos en Wikidata

Secundino Hevia Rodríguez (1918, Ables – 2002), conocíu col alcuñu de Cuno Corquera, foi un escritor llanerense n'asturianu perteneciente a la denominada Xeneración de Posguerra (a la que tamién pereteneceríen autores como Antón de la Braña, Llorienzu Novo Mier, María Xosefa Canellada, etc.)

Biografía

Cuno Corquera nació nuna de les caseríes de la zona del castañéu de Corquera (d'au tomaría'l so nomatu), na parroquia d'Ables, conceyu de Llanera, el 3 de marzu de 1918. Pertenciente a una familia obrera, estudió hasta los 14 años, anque siempre se consideró un autor autodidacta.

Participó na Guerra Civil, conflictu nel que perdió al so pá, y al poco d'acabar la contienda entamó a trabayar na empresa Unión Española de Explosivos en Cayés (Llanera), onde trabayaría hasta la so xubilación por enfermedá en 1974 compaxinándolo col trabayu na casería

La so vocación yera la de la enseñanza, anque les circunstancies nun-y permitieron ser como él quería maestru nacional. Nel so pueblu exerció igualmente nos años 40 enseñando a los neños del llugar a falta d'un maestru oficial. Siempre mostró interés pola cultura y la so difusión, y asina na década de 1950 funda na so parroquia grupos de teatru aficonáu colos que representa ente otres obres d'autores asturianos de corte costumista como Pachín de Melás, Anxelu, etc. Entama tamién per esa dómina a lleer a poetes como Teodoro Cuesta, Antonio García Oliveros, Pepín de Pría, y faise escritor siguiendo los sos modelos de poesía festiva y popular (“escribo n'esta forma en que lo faigo yo, dende 1954”[1]).

Xunto a esti llabor lliterariu, tamién como escritor, exerce de corresponsal en Llanera de la revista El Progreso de Asturias, editada en La Habana, hasta l'añu 1961 en que desaparez la publicación

Alloñáu de los circuitos culturales y lliterarios, la so obra nestes décades ye básicamente de difusión oral pel conceyu de Llanera y alredores, participando en recitales, pregones, tertulies, animando festexos privaos (bautizos, casorios, etc.), quedando como muncho recoyíes les sos composiciones en dalguna collaboración de prensa o cartafueyos de fiestes).

Na década de 1980 retoma'l so llabor de dinamizador cultural del conceyu formando un nuevu grupu de teatru, el grupu Texu, que xunto col grupu de teatru Talía de Villabona percuerren les parroquies de Llanera[2].

En 1993 el conceyu de Llanera y la Conseyería de Cultura publiquen Cuentos, cuentiquinos y poemes, una recopilación de les sos composiciones que sirve también d'homenaxe a la so dedicación d'escritor popular, sucediéndose nos años siguientes dellos reconocimientos, como la celebración del Día de les Lletres en Llanera en 1993 dedicáu a él[3] o l'homenaxe que se-y rindió nel VII Concurso y muestra de Folklore Ciudad de Oviedo el 30 de mayu 1999.

Nel añu 1992 sufrió una trombosis que-y dexó torgada la movilidá de la parte derecha del cuerpo, anque siguió escribiendo hasta la so muerte, el 6 de setiembre de 2002. A mou de reconocimiento póstumu, nel añu 2003, tres la remodelación d'un parque de Posada, l'Ayuntamientu decidió pone-y el nome de Parque Cuno Corquera[4].

Estilu[5]

Cuno Corquera, que sigue modelos como los de Pepín de Pría, Pachín de Melás o Marcos del Torniello, pue encuadrase na Xeneración de Posguerra, siendo la so obra en xeneral de calter humorísticu y inxeniosu al mou de la poesía n'asturianu más popular enantes del Surdimientu.

Los dos rasgos que más destaquen de la so escritura son la popularidá y la tradición, primando lo oral sobre lo escrito y lo popular sobre lo culto, asina como una temática típicamente asturiana.

Dende'l puntu de vista llingüísticu, anque pola so formación autodidacta y previa a la normalización académica nun tien un modelu claru y nótase della vacilación ortográfica, emplega un asturianu polo xeneral mui cercanu al estándar lliterariu aceptáu, propiu del asturianu central, pudiendo destacar sicasí dalgunos localismos y rasgos caracteurísticos:

  • Cierre de o en u (utru por otru)
  • Cierre de e en i (tratin por traten)
  • Terminación en –ín tercera persona del plural nel imperfectu verbal (comín por comíen)
  • Terminación –áis, -ois pal plural femenín na forma nominal (autoridais por autoridades)
  • H aspirada envede f inicial (juente por fuente)

Obra: Cuentos, cuentiquinos y poemes

En 1993, por iniciativa del Ayuntamientu de Llanera y el sofitu de la Conseyería de Cultura publícase'l llibru que recueye la obra dispera de Cuno, encargándose de la recopilación y estudiu introductoriu la tamién escritora Esther Prieto.

El llibru, como'l propiu título anuncia, divídese en tres partes:

Cuentos

Recopilación de 5 rellatos breves en prosa nos que se recueyen tradiciones d'una Asturies del pasáu que l'autor nun quier que se pierda, una Asturies na que yeren comunes escenes como los filandones, romeríes, esfoyaces, etc. (asina s'aprecia polos propios títulos, como De vuelta d'una esfueya)

Cuentiquinos

Son 35 composiciones poétiques de calter narrativu y en munches ocasiones dialogáu, cecanes al xéneru del monólogu (dalgunos fueron recitaos pol propiu autor en dellos concursos, y también escribió pa monologuistes como El Maestru o Pandiella).

La temática principal son escenes tópiques d'esti xéneru, como'l matrimoniu (Los casorios), los cortexos (L'asuntu de Pepón al casar la fía), la oposición ente un pasáu idealizáu y un presente inciertu (Añorances y comparances). El tonu ye tamién el propiu d'estes composiciones, primando l'humor y la ironía. En cuanto a lo formal, tan escritos en versos octosílabos, con rima asonante y recursos propios de la oralidá pa los que taben pensaos (repeticiones, enumeraciones, invocaciones al oyente, etc.)

Poemes

Trátense de 17 composiciones de distintu calter tanto no formal como no temático, siendo les pieces onde l'autor muestra más claramente'l so yo llíricu. Un tema recurrente en toes elles ye Asturies, enfocada y cantada dende diferentes perspeutives: asina tenémosla personalizada como madre doliosa que llora pola asusencia de los fíos al tratar el tema de la emigración (Asturies a sos fíos que tán fuera del regazu), o empondérase la belleza del so paisaxe (Asturies ye un calendariu); tamién se toca'l mitu de Cuadonga, Pelayu y la Santina (A nuestra Virxe de Cuadonga) o la señaldá pola Asturies tradicional perdida (Da pena ver les coses). Tamién nestes composiciones l'autor dexa constancia de la so relixosidá (Dios creador)

Cánticu a Llanera

Nel añu 1992, por iniciativa del entós direutor de la Coral Polifónica de Llanera Luis G. Santana, promuévese la creación d'un himnu pal conceyu de Llanera, y pídese-y a Cuno una lletra que posteriormente será musicada pol compositor y direutor del coru de la Ópera d'Uviéu Fernando Menéndez Viejo. Naz asina'l Cánticu a Llanera, que será estrenáu na conmemoración nel conceyu de la XIV Selmana de les Lletres Asturianes nun conciertu celebráu nel espaciu escénicu Plaza de la Habana de Posada de Llanera el 3 de mayu de 1993.

Posteriormente, en marzu del añu 2009, la Corporación decidió por unanimidá convertir el Cánticu a Llanera n'himnu oficial del conceyu[6].

Cánticu a Llanera

Llanera, Llanera mía

nunca te podré olvidar.

Yes comceyu guapu y ricu

que compites con cualquiera

Toos te cantin, Llanera

los fíos que viven dientru

y también los que tan fuera.

Toos te cantin así,

Llanera, Llanera mía,

nunca te podré olvidar.

El verdor de los tos praos,

les tos fontes tan guapines

que nes tos once parroquies

dan les agües cristalines.

Tin tilín tilín, tilín.

Les esquiles de tos vaques.

Cuando tán ena praera

al facer tilín tilín,

dan un gran ¡Viva Llanera!

y obliguen a tol pueblu

a cantar d'esta manera:

Llanera, Llanera, Llanera mía

nunca te podré olvidar

Otres collaboraciones

Nel añu 2000 tamién escribió la lletra del equipu Valdesoto Club de Fútbol

Bibliografía

  • CORQUERA, Cuno. Cuentos, cuentiquinos y poemes. Edición y introducción d'Esther Prieto. Ayuntamientu de Llanera, 1993
  • RAMOS CORRADA, Miguel. “Historia de la Lliteratura asturiana”. Academia de la Llingua Asturiana, 2002

Referencies

  1. ↑ Cuno Corquera, la voz llariega que canta'l conceyu de Llanera. LLanera Información. xineru-febreru 1993.
  2. ↑ ¡Hasta luego Secundino, hasta siempre! El Tapín. setiembre 2002.
  3. ↑ Editado un libro que recoge la obrade Cuno Corquera. Boletín Informativo del Ayuntamiento de Llanera. mayu 2003.
  4. ↑ Cuno Corquera, para siempre. El Tapín. mayu 2003.
  5. ↑ PRIETO, EstherPrieto, Esther (1993). Cuentos, cuentiquinos y poemes. Introducción. Ayuntamiento de Llanera.
  6. ↑ Llanera, con himno propio.. 6 de marzu de 2009. https://www.lne.es/centro/2009/03/06/llanera-himno-propio/732875.html.

Enllaces esternos

  • ”Cánticu a Llanera” interpretáu pola Coral Polifónica de Llanera
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.