Cordelera Cantábrica
sistema montañoso (es) y cordal
Situación
País	España
Autonomía	Cantabria
Coordenaes	43°11′51″N 4°51′06″W / 43.1975°N 4.8517°O / 43.1975; -4.8517
Cordelera Cantábrica Cordelera Cantábrica (España)
Datos
Altitú	2648 m
Materiales	caliar
Fechos importantes
Orixe del nome	Mar Cantábricu
Anchor	65,000 m.
Llargor	480,000 m.

La Cordelera Cantábrica ye ún de los principales sistemes montañosos de la Península Ibérica. Asítiase al norte d'ella, cuasi paralela al mar Cantábricu, y tien una llonxitú de 480 km, ente la llende occidental de los Pirineos y'l Macizu Galaicu-Lleonés, qu'enllaza col Sistema Ibéricu, y un anchor mediu en direición norte-sur de 100 km. Estos montes, que son la cadena montañosa más occidental d'Europa, formen una provincia fisiográfica estremada diento de la división fisiográfica nomada Cinturón Alpín.

Nos sos montes pueden practicase toa triba de deportes de monte: senderismu, escalada... y tamién esquí, nes estaciones d'Altu Campóo, Valgrande-Payares, Fontes d'Inviernu, San Isidro, Ḷḷeitariegos y Manzaneda. La cordelera ta ente les comunidaes autónomes del País Vascu, Cantabria, Asturies y Castiella y Lleón. Los cumales perpasen los 2.500 m nos tramos más altos, nos Picos d'Europa ente Cantabria, Asturies y Llión. El monte más altu d'esti sistema ye La Torre Cerréu, nos Picos d'Europa, con una altitú de 2.648 m y, yá fuera de los Picos d'Europa, Peña Prieta (2.536 m) en Llébana (Cantabria). La cavidá más fonda ye'l sistema cavernariu del Trave, la mayor torca d'España y sesta mayor del mundu.

Xeografía

La Cordelera Cantábrica estiéndese en direición este-oeste, cuasi paralela al mar. El so estremu oriental márquenlu los Montes Vascos, una cadena montañosa de transición ente la Cantábrica, na qu'aveza a incluyise, y los Pirineos: tien establecíose la falla de Pamplona como la so llende xeolóxica convencional, magar que nun hai ruptura xeográfica ente les dos formaciones montañoses. La llende occidental márquenla los valles del ríu Miño, del so afluente'l Sil y del Cabrera, afluente del Sil. Estiéndese poles provincies de Lugo, Asturies, Llión, Burgos, Palencia, Cantabria, Bizkaia, Gipuzkoa, Álava, Navarra y La Rioxa.

En conxuntu la cordelera caracterízase polo complexo de la so estructura, magar que cuasi en toa la so estensión, y principalmente nel este, ye posible estremar dos socordeleres principales de les que se bifurquen sierres y cordales de menor altor. Una de les dos socordeleres principales va peraverada a la mar; la otra, con picos más altos, forma la llende septentrional de la gran meseta de Castiella y Lleón. En dellos puntos esa socordelera costera cae a plomu al mar, ya inclusive onde eso nun pasa la so inclinación ye tan grande qu'obliga a tolos cursos d'agua (ríos, regatos) que baxen per ella a ser cortos y de cursu rápidu. La transición ente la socordelera meridional y la meseta de Castiella ye más gradual, con dellos grandes ríos, especialmente l'Ebro, que nacen nella y flúin en direición sur o oeste.

L'anchor de la cordelera, con toles sos ramificaciones, va aumentando d'este (97 km) al oeste (185 km). Hai bien de picos de más de 2.000 m d'altor, pero los mayores d'ellos concéntrense nel sector central, nos Picos d'Europa, na llende ente les provincies d'Asturies, Lleón, Palencia y Cantabria. Equí topamos La Torre Cerréu (2.648 m), Peña Vieya (2.615 m), Peña Prieta (2.531 m) o l'Espigüete (2.407 m); un poco más al oeste hai otros picos que sobrepasen los 2.100 m. como Mampodre, Penubina, Peña Rubia y Cuiña. Una peculiaridá de la cordelera y la so rodiada ye la bayura de parameres, pequeñes mesetes aisllaes y arrodiaes por altos picos o inclusive por muries de piedra, en xeneral calizo.

La cordelera fai de llende natural ente la nomada España verde, de clima oceánicu húmedu, y la meseta central, la España seca, de clima continental secu.

Principales socordeleres

La Cordelera Cantábrica dixébrase en trés partes estremaes.

Occidental

Fórmenla'l Macizu Asturianu (Asturies, Llión y Cantabria) y les sos sierres y cordales asociaos. Xeolóxicamente ye la prolongación oriental del Macizu Galaicu-Lleonés, y ta formáu por materiales paleozoicos plegaos. Presenta profundes foses tectóniques d'orientación este-oeste, como'l valle del ríu Cares, y inclúi les siguientes sierres y picos de más altor:

• Sierra de la Bobia: Picu de la Bobia, 1.201 m.
• Sierra de Tinéu: Mulleirosu, de 1.241 m, cerca de Tinéu.
• Sierra del Sueve: Picu Pienzu, de 1.161 m, na marina centruoriental d'Asturies.
• Sierra del Cuera, Picu Torbina 1,315 m, nel estremu oriental d'Asturies.
• Otres sierres: Sierra de San Isidro, Sierra d'Eirelo, Sierra del Aramu, Sierra de Pandu, Sierra de Canielles, Sierra del Rañadoiru, Llomba de Parrondo, Sierra de San Mamés, Sierra de Serrantina, Sierra de la Zarza, Sierra de Degaña, Sierra de l'Acebu, Sierra de Sobia, Cordal de Ḷḷena, Sierra de Casomera, Porrones de Monéu y Cordal de Ponga.

Central

Vista parcial del macizu del Cornión, nos Picos d'Europa.

Ocúpenla los Picos d'Europa, una monumental formación xeolóxica de roca caliar y marga del Carboníferu. Divídense en trés sectores o macizos: el occidental o Cornión, cola Torre Santa, con 2.596 m d'altor, como cumal; el central, los Urrieles, aú s'alluga Torrecerréu; y l'oriental o macizu d'Ándara, col picu Morra de Lechugales como picu de más altor (2.444 m). A ella pertenecen delles cordeleres cántabres:

• Macizu de Fuentes Carrionas: Peña Prieta 2.536 m, cerca del borde oriental de los Picos.
• Sierra de Peña Sagra: Peña Sagra, 2.046 m.
• Sierra de Peña Labra: Picu Tres Mares, de 2.175 m, y Peña Labra 2.006 m.
• Montes Pasiegos: Castru Valnera, 1.707 m, nel área de transición a los Montes Vascos.Sierra Cocón
• Sierra de la Gándara: Peña Cabarga, 537 m, famosa pol so mirador sobro la costa central de Cantabria.
• Otres: Sierra Cocón, Montes d'Ucieda, Sierra del Escudu de Cabuérniga, Altu del Gueto, Sierra de la Matanza, Sierra del Cordel, Sierra de Híjar, Sierra del Hornijo, Sierra de Breñas.

Oriental

Los Montes Vascos, na fastera oriental de la cordelera, ye un conxuntu de montes pererosionaos, orixinaos por plegamientos del Mesozoicu y d'altor moderáu. Hai delles cordeleres interiores: Sierra Salbada, Montes de Gasteiz, Izki, Urbasa y Andía; y otres costeres: Gorbea, Urkiola, Elgea, Aizkorri, Altzania y Aralar.

Flora

La Cordelera Cantábrica ta dominada por bosques planocaducifolios formaos principalmente por fayes (Fagus sylvatica) nes fasteres solombrices y delles especies de carbayos (Quercus robur, Quercus petraea y Quercus pyrenaica), en función de l'altitú y les carauterístiques del suelu, nes soleyeres. Rescampla l'ausencia cuasi total de bosques naturales de coníferes, neto nel pisu montanu que nel soalpín, pola mor de la gran humedá del suelu. Hai dellos pinares pequeños, reconocíos como autóctonos, en Palencia y Llión. Nes sierres de caliar hai, con orientación sur y en llugares fríos y secos, sabinares, y tamién texos en roquedos calizos. Perriba los 1.800 m d'altitú predominen les bedules, el brezu y otros matorrales, y praos de gramínees d'altura, perimportantes pa l'alimentación del ganáu de monte.

Fauna

Pitu montés machu.

Ente les diverses especies animale de la zona destaca l'osu pardu cantábricu, una especie en riesgu d'estinción, con 300 exemplares que sicasí representen un númberu abondu mayor que'l de décades pasaes y que faen que la especie seya viable. Son importantes tamién les poblaciones de robecu cantábricu (Rupicapra pyrenaica parva), venáu común (Cervus elaphus), corzu (Capreolus capreolus), xabaril (Sus scrofa), llobu ibéricu (Canis lupus signatus), llóndriga (Lutra lutra), marta (Martes martes), melandru (Meles meles), falcatrúa ibérica (Galemys pyrenaicus), pitu montés (Tetrao urogallus) y utre leonado (Gyps fulvus).

La cabra montesa (Capra pyrenaica victoriae) ye una especie reintrocida na cordelera a partir d'un nucleu de cría en cautividá en Riañu (Llión), y anguaño estiéndese pela Sierra de los Ancares y na Monte de Riañu y Mampodre, con individuos aisllaos n'Asturies y Llébana. Considérase probable que, a mediu plazu, ha recolonizar tola cordelera.

Clima

El clima d'esta rexón xeográfica ye fundamentalmente de tipu oceánicu templáu y húmedu, carauterizándose por una mayor frecuencia de vientos de componente norte. La temperatura media añal de la zona ye de 13 °C y la diferencia ente la máxima temperatura del añu (agostu) y la mínima (xineru) ye de 12 °C. Esto fai de la Rexón Cantábrica la zona con amplitú térmica más baxa de la península ibérica.

El solazu ye de 1.700 hores de sol añales y la precipitación media ye de 1800 l/m², con un permediu de 150 a 200 díes d'agua al añu.

Llistáu de picos más altos

Galería

• 
  Sablera de Berria, Cantabria.
• 
  Picos d'Europa.
• 
  Somiedo, Asturies.
• 
  La Torre Cerréu, el picu más altu de la cordelera.
• 
  Picu Urriellu, nel macizu central de los Picos d'Europa.
• 
  Macizu de Fuentes Carrionas. En primer planu'l pozu de Las Lomas, y al fondu el picu Curavacas.
• 
  La Peña Ten, na monte de Riañu.
• 
  Castru Valnera, la más alta de les Montañes Pasiegues (Cantabria).
• 
  Picu Tesoreru, nel macizu central de los Picos d'Europa.
• 
  L'Espigüete, nel macizu de Fuentes Carrionas (Palencia).
• 
  Peña Labra, na monte palentina.
• 
  Aitxuri, la mayor altura del macizu d'Aitzkorri.

Ver tamién

• Picos d'Europa

Referencies

Enllaces esternos

• Wikimedia Commons acueye conteníu multimedia sobre Cordelera Cantábrica .