Constantino Cabal
Vida
Nacimientu	Uviéu, 16 de mayu de 1877 (xul.)
Nacionalidá	España
Muerte	9 d'avientu de 1967 (90 años)
Estudios
Llingües falaes	castellanu asturianu
Oficiu	antropólogu, escritor, periodista
Miembru de	Real Academia Asturiana de les Artes y les Lletres

Constantino Cabal (16 de mayu de 1877 ^(xul.), Uviéu – 9 d'avientu de 1967) foi un antropólogu, escritor y periodista asturianu. Ta consideráu un de los meyores estudiosos de la cultura y folclor d'Asturies.^{[ensin referencies]}

Biografía

Empieza'l so trabayu de periodista en «El Zurriago Social», una publicación de calter satíricu ya irónicu dirixida por Maximiliano Arboleya.

Nel añu 1900 entra a trabayar nel diariu uvieín El Carbayón. Mientres ta trabayando nesti diariu escribe les sos primeres obres lliteraries: Psiquis y Memorias de un enfermo.

Nel añu de 1905 emigra a Cuba ya instálase en L'Habana. Nesta ciudá atopa trabayu nel periódicu: Diario de la Marina, dirixíu por otru periodista y emigrante asturianu llamáu Nicolás Rivero, nacíu en Villaviciosa. Nesti diariu conoz y entabla amistá col periodista y poeta gallegu Curros Enríquez. Al morrer ésti dan-y la so seición de política española. Tres cinco años na isla, torna a España como corresponsal del mesmu periódicu. Instalase en Madrid, sede del gobiernu, p'asina tar más en contautu cola clase dirixente y por tanto cola política española. Nesta ciudá conoz y entabla amistá col coruñés Ramón Menéndez Pidal; gracies a él empiézase a interesar pola hestoria, y empieza a trabayar nel Archivu Históricu Nacional, na Biblioteca Nacional, nel archivu de Simancas, Real Academia de la Historia, el Escorial y na Catedral d'Uviéu.

Mientres esta etapa de la so vida, la más granible, dedicase a editar les sos principales obres d'historia: Covadonga|Cuadonga: ensayo histórico-crítico,Cuentos, leyendas y tradiciones y La familia, la vivienda y oficios primitivos.

En 1925 escoyenlu como direutor del diariu católicu «Rexón» d'Uviéu. Tres el pasu por esti diariu, treslladase a Palencia, ciudá de la que torna en 1928 a Uviéu tres el so nomamientu de cronista oficial d'Asturies y direutor de la Biblioteca Provincial d'Asturies.

Nestos puestos sigue hasta la so muerte, siguiendo col so llabor lliterariu ya historiográficu. Foi miembru numerario del I.D.E.A (Institutu d'Estudios Asturianos) dende la so fundación.

Obra creativa

Palaciu del conde de Toreno n'Uviéu sede de la IDEA.

Ente les obres que destaquen d'esta etapa podemos resaltar les siguientes:

• «Psiquis»
• «Memorias de un enfermo»
• La triloxía sobre mitoloxía asturiana:

«Los dioses de la vida» (1925)

«Los dioses de la muerte» (1925)

«El sacerdocio del diablo» (1928)

• «Alfonso II el casto» (1943)
• «Contribución al Diccionario folclórico de Asturias» (cinco tomos. 1951–1958)
• «La Asturias que venció Roma» (1953)
• «L'alborá de los malvises (los madrigales del bable)» (1944), n'asturianu
• «La presa de las Águilas: drama en tres actos y en verso» (1924)
• «Majestad: drama en dos actos y en prosa » (1924)
• «La hora del yunque» (1944)
• «La sementera de sal » (1944)
• «Capitán de romancero» (1949)

Ver tamién

• Xeneración de la posguerra

Bibliografía

• Díaz Castañón, Carmen (1976). Literatura asturiana en bable. Salinas: Ayalga. ISBN 84-7411-010-6.
• García, Antón (1994). Lliteratura asturiana nel tiempu. Oviedo: Conseyería de Educación, Cultura, Deportes y Xuventú. ISBN 84-7847-280-0.

Referencies

Enllaces esternos