| Conseyu Soberanu d'Asturies y Llión | |
|---|---|
| estáu desapaecíu | |
 | |
| Direición | España |
| Historia | |
| Fundación | 24 agostu 1937 |
| Disolución | 21 ochobre 1937 |
 | |
El Conseyu Soberanu d'Asturies y Lleón, foi l'órganu alministrativu que socedió al Conseyu Interprovincial d'Asturies y Lleón y que taba presidíu pol socialista asturianu Belarmino Tomás que llegó a iniciar contautos de manera independiente cola Sociedá de Naciones.[1]
Declaración de soberanía
.svg.png.webp)
El 24 d'agostu de 1937 róblase'l decretu qu'afita la soberanía de los territorios alministraos pol "Conseyu Interprovincial d'Asturies y Lleón" convirtiéndose nel "Conseyu Soberanu d'Asturies y Lleón". El 26 d'agostu saldrá espublizáu na prensa.[2]
- L'entamu del testu constitucional del conseyu, traducíu al asturianu, entamaba asina:
"Artículu 1u.– El Conseyu d'Asturies y Lleón, dende la fecha y hora d'esti Decretu, constitúise en Conseyu Soberanu de gobiernu de tol territoriu de la so xurisdicción, y a elli queden dafechamente sometíes toles xurisdicciones y organismos civiles y militares que funcionen y funcionaren no socesivo dientro del territoriu referíu.Artículu 2u.– El propiu Conseyu Soberanu, a la vista los acontecimientos favoratibles que se produzan nel trescursu de la guerra, determinará'l momentu de dexar les sos funciones soberanes que güei asume.
Artículu 3u.– D'esti Decretu daráse cuenta al gobiernu la República pa la so convalidación; ensin perxuiciu de la so absoluta vixencia, impuesta pol imperiu les circunstancies, dende esti mesmu momentu de la so promulgación.
Dau en Xixón, a venticuatro hores del día venticuatro d'agostu de mil novecientos trenta y siete."
Reaiciones polítiques
Esta declaración nun se fizo ensin polémiques tanto internes (dientro del Conseyu) como esternes (nos gobernantes de la Segunda República española). La propuesta fízola Belarmino Tomás en xunta estraordinaria y tamién la sofitaben la mayoría de dirixentes del PSOE y por Segundo Blanco y otros responsables de la CNT. El PCE taba a la escontra de la decisión. Los dos representantes de la UXT tuvieron una opinión diferente caún. Los conseyeros d'Izquierda Republicana reprobaron el determín. Les tensiones llevaron a engarraes ente dalgunos conseyeros que llegaron a los insultos personales. El xefe del exércitu y el comisariu políticu tamién víen con bonos güeyos la soberanía.
D'otra miente'l Gobiernu la República censuró l'actitú del Conseyu Soberanu, sobremanera cuando esti se dirixó a la Sociedá de Naciones. El Ministru de la Gobernación tresmitió a Belarmino Tomás la "so sorpresa y el so disgustu". El ministru de Defensa de la República Indalecio Prieto calificó de "disparatada" la decisión y el mesmu Presidente Manuel Azaña criticó la declaración. El gobiernu la República llegó a pidir a Belarmino Tomás que se presentare ente él diendo a la fin los conseyeros Segundo Blanco y Amador Fernández "Amadorín". El conceyu nun fizo que camudara'l determín. Llegó a convocase una xunta del Parllamentu pa tratar la cuestión d'Asturies anque nun llegó a celebrase polos acontecimientos bélicos.
Composición
El Conseyu d'Asturies y Lleón dende l'entamu taba conformáu por miembros del PSOE, PCE, Izquierda Republicana, Mocedaes Socialistes Unificaes, Mocedaes llibertaries, FAI, UXT y CNT. Los miebros del Conseyu Soberanu d'Asturies y Lleón son los que vienen darréu:
| Cargu | Nome | Organización |
|---|---|---|
| Presidencia y Guerra | Belarmino Tomás Álvarez | PSOE |
| Industria | Segundo Blanco González | CNT |
| Trabayu | Onofre García Tirador | FAI |
| Sanidá | Ramón Fernández Posada | JJ LL |
| Facienda | Rafael Luis Fernández Álvarez | JSU |
| Xusticia y Orden Públicu | Luis Roca de Albornoz / Rafael Luis Fernández Álvarez | JSU |
| Agricultura | Gonzalo López | PCE |
| Marina Mercante | Valentín Calleja Lanza | UXT |
| Pesca | Ramón Álvarez Palomo | FAI |
| Instruición Pública | Juan Ambou Bernat | PCE |
| Obres Públiques | José Maldonado González | Izq. Rep. |
| Asistencia Social | Maximiliano Llamedo Corte | CNT |
| Comerciu | Amador Fernández Montes | PSOE |
| Comunicaciones | Aquilino Fernández Roces | UXT |
| Propaganda | Antonio Ortega Fernández | Izq. Rep. |
Organización
En declarándose soberanu, el Conseyu asumió dafechu les responsabilidaes civiles y militares de gobiernu. El Conseyu Soberanu caltuvo les conseyeríes que veníen funcionando enantes de la soberanía:
- Guerra
- Comerciu y Mines
- Marina
- Facienda
- Xusticia
- Comunicaciones
- Agricultura
- Istrucción Pública
- Industria
- Asistencia Social
- Trabayu
- Pesca
- Sanidá Civil
- Obres públiques
- Propaganda
Pa coles conseyeríes crearanse agora unes Comisiones:
- Guerra
- Industries y fortificaciones
- Abastos, Tresportes y Evacuación
- Asistencia Social y Sanidá
- Orde Públicu, Xusticia, Propaganda y Comunicaciones
- Economía
Actuaciones
Dende la declaración de Soberanía'l Conseyu toma delles midíes nos diferentes campos xurdíos pa "constitúise en Conseyu Soberanu de gobiernu de tol territoriu de la so xurisdicción, y a él queden sometíes dafechu toles xurisdicciones y organismos civiles y militares". Por exemplu nel tarrén xudicial creáronse Tribunales Permanentes de Guerra les penes nestos tribunales y nel Tribunal Popular yá nun necesitaron de notificación al gobiernu español valiendo pal so cumplimientu la notificación al Conseyu Soberanu. Nel ámbitu militar el Conseyu Soberanu quitó-y el mandu al xeneral Gámir Urribarri que tenía la xefatura del Exércitu del Norte nomando xefe militar al coronel Adolfo Prada Vaquero. El Conseyu Soberanu va tomar tamién midíes de control de les llendes y les aduanes.
D'otra miente'l Conseyu d'Asturies y Lleón yá enantes de la declaración de soberania emitía moneda y sellos. Nesti puntu hai alderique sobre si'l Conseyu tendría o non capacidá llegal o competencies pa facelo. El casu ye que'l Conseyu Soberanu emitió billetes divisionarios [3] Los billetes son los conocíos popularmente como Belarminos de cursu llegal hasta la ocupación d'Asturies pol exércitu de Francisco Franco.
Disolución
A lo postrero del Conseyu Soberanu d'Asturies y Lleón tuvo'l llar na conocida como Casa Blanca, tovía güei na Plaza'l Parchis de Xixón.
El conseyu Soberanu disolvióse tres la ocupación total de les fuercies franquistes d'Asturies. Dende'l Conseyu Soberanu teníase la esperanza na llegada l'iviernu un mediu meyor pa la resistencia pola importancia de la orografía asturiana, esi añu la ñeve tardó en cayer. La situación militar tornó insostenible pal Conseyu qu'a la fin intentó apautar una rendición con Francisco Franco que namái aceutaba una rendición incondicional. El 20 d'ochobre de 1937 acabó la resistencia. Los miembros del Conseyu tuvieron que fuxir embarcando camín de Francia.
Cronoloxía
- 24 d'agostu: Róblase'l decretu pol que se tresforma'l Conseyu Interprovincial en Conseyu Soberanu.
- 26 d'agostu: Espublización en prensa del decretu.
- 29 d'agostu: El Conseyu Soberanu cesa al xeneral Gámir Ulíbarri y noma xefe militar al coronel Prada.
- 4 de setiembre: Les tropes franquistes entren n'Asturies.
- 5 de setiembre: Ocupación de Llanes.
- 20 de setiembre: Aranda ocupa'l Puertu Payares.
- 1 d'ochobre: Ocupación de Cuadonga.
- 17 d'ochobre: La 4ª Brigada navarra traviesa'l ríu Seya. El Conseyu Soberanu decide la evacuación del territoriu.
- 20 d'ochobre: Últimu aconceyamientu del Conseyu Soberanu. Entama la evacuación marítima dende Xixón.
- 21 d'ochobre: Les tropes golpistes, autodenomaes "exercitu nacional", entren en Xixón y Avilés rematando'l derrocamientu del Conseyu Soberanu.
Bibliografía
- La Guerra Civil Española - Tomu II. ISBN 844090326X
- La ofensiva nacionalista sobre Asturias
- Fernández, Alberto Asturias, 1936-1937. La frágil unidad del Frente Popular
Referencies
- ↑ «Así se gestó la independencia de Asturias en la Guerra Civil con su propia moneda, presidente y ministros» (castellán) (17 de xunetu de 2021).
- ↑ «El Consejo provincial se instituye poder soberano del territorio de su jurisdicción, en servicio de la República y su gobierno» (castellanu) (24-08-1937). Archiváu dende l'orixinal, el 2007-03-11. Consultáu'l 29 d'aviemtu de 2021.
- ↑ Billetes emitíos pol Conseyu Soberanu d'Asturies y Lleón.
