Una coleutividá territorial (francés: collectivité territoriale) ye una alministración y un suxetu públicu, distintu del Estáu Francés, qu'exerz ciertes competencies que-y son atribuyíes sobre un territoriu determináu. Les coleutividaes territoriales de la República Francesa tán definíes nel artículu 27 de la Constitución: estes son les comuñes (fr. communes), los departamentos (fr. départements), les rexones (fr. régions), les coleutividaes de estatus particular y dalgunes coleutividaes d'ultramar.
Esti términu sustitúi al de coleutividá local (fr. collectivité locale) dende la revisión constitucional del 28 de marzu de 2003. Sicasí, entá ye usáu, como por casu na Direición Xeneral de coleutividaes locales (fr. Direction générale des collectivités locales) del Ministeriu del Interior de Francia.
Carauterístiques
Una coleutividá territorial presenta trés carauterístiques:
- personalidá xurídica;
- competencies;
- llibertá d'alministración
Reforma de les coleutividaes territoriales
El Presidente Nicolas Sarkozy y el segundu gobiernu de François Fillon punxeron en marcha a partir de xineru de 2008 una reforma de les coleutividaes territoriales.[1] Esta foi finalmente adoptada pol Parllamentu'l 17 de payares de 2010.[2]
Los 3485 conseyeros territoriales deberíen ser escoyíos en 2014 n'escrutiniu uninominal mayoritariu a dos vueltes con un estragal de cualificación afitáu nel 12,5% de los inscritos y una estricta paridá de xéneru. Sicasí ye probable qu'esti nuevu cargu electu nun vea la lluz debíu al proyeutu de llei que conduz al abandonu d'esta reforma presentáu en payares de 2012 pol gobiernu de Jean-Marc Ayrault.
Referencies
- ↑ reformar-des-collectivites-territoriales_795903.html En francés, cronoloxía de la reforma de les coleutividaes territoriales L'Express, 20 d'ochobre de 2009
- ↑ La reforma territorial definitivamente aprobada nel Parllamentu Monde, 17 novembre 2010
Ver tamién
Notes y referencies
