El certificáu Bai Euskarari ("Sí al euskera") ye una distinción creada en xunu de 2000 qu'acredita l'usu del euskera nel ámbitu llaboral. Ta promocionáu por Euskara Kontseilua. L'ámbitu d'actuación ye'l territoriu cultural d'Euskal Herria (Comunidá Autónoma del País Vascu y Comunidá Foral de Navarra d'España y el País Vascu-Francés en Francia.
Historia
El certificáu foi creáu a iniciativa d'Euskara Kontseilua en xunu de 2000. En 2007, Kontseilua impulsó la nacencia de Ziurtagiriaren Elkartea, la Asociación pa la Promoción del Certificáu Bai Euskarari coles mires d'integrar a toles entidaes que tienen el Certificáu, dexándo-yos participar na xestión del certificáu y facilitar asina'l so afitamientu, meyora y espardimientu.
Llogru y espardimientu
Pal llogru del Certificáu en cualesquier de los sos trés niveles (zerbitzua eta llana euskaraz -serviciu y funcionamientu n'euskera; zerbitzua euskaraz -serviciu n'euskera- y bidean -nel camín) tienen de cumplise una serie de criterios y, en función del grau de cumplimientu, llógrase unu o otru nivel. El Certificáu anuévase añalmente y dende 2007 Ziurtagiriaren Elkartea realiza los llabores de siguimientu, promoción y evaluación.
Na actualidá son más de 1.500 les empreses, comercios y entidaes de too tipu que llograron el Certificáu y alredor de 20.000 los trabayadores arreyaos. De diches empreses, 165 tienen el nivel cimeru, 508 consiguieron zerbitzua euskaraz y 843 tienen el nivel bidean. Por sectores, el Certificáu Bai Euskarari ta enllantáu en 194 empreses rellacionaes col sector industrial, el 13% del total; el 37% son del sector comercial y hosteleru; el 19% provienen del ámbitu cultural, deportivu o tán rellacionaes con movimientos sociales; el 7% tán rellacionaes cola educación; los servicios y les finances cunten col 20% y el 2% pertenecen al sector primariu. Ente les entidaes que cunten col certificáu atópense: Bankoa, Kutxa, Elkargi, Euskadiko Kutxa, Eroski, Athletic Club, Real Sociedad, Baskonia, Aviron Bayonnais, Diocesanes, Argiñano, Refractarios Kelsen, Obe Hettich, Elay Taldea, Arlan, JEZ Sistemes Ferroviarios, VUSA, Confederación de Cooperatives, SPRI, Fundación Kalitatea, Gehitu, SkunkFunk, etc.
Asociación del Certificáu Bai Euskarari
Ziurtagiriaren Elkartea, l'Asociación pa la Promoción del Certificáu Bai Euskarari ye una asociación ensin ánimu d'arriquecimientu inscrita na comunidá autónoma del País Vascu.
La xestión de l'Asociación ta en manes de dos órganos colexaos: la Xunta Xeneral y la Direición. La Xunta Xeneral de Socios ye l'órganu cimeru constituyíu por toles entidaes acomuñaes. Toes elles tienen los mesmos derechos y obligaciones. La Direición, pela so parte, tien el deber de llevar a cabu'l plan añal y demás decisiones de la Xunta.
Socios
L'Asociación tien tres tipos de socios:
- Socios proteutores: tolos miembros de Kontseilua.
- Socios usuarios: entidaes que llograren el Certificáu Bai Euskarari.
- Socios collaboradores: cualquier entidá que quiera participar na promoción del Certificáu.
Referencies
Enllaces esternos
