Cantón de Nidwalden
y
Alministración
Estáu federáu Suiza
ISO 3166-2 CH-NW
Tipu d'entidá cantón de Suiza
Capital Stans (es) Traducir
Nome oficial Kanton Nidwalden (de)
Llingües oficiales alemán estándar suizu
División
Xeografía
Coordenaes 46°57′N 8°24′E / 46.95°N 8.4°E / 46.95; 8.4
Superficie 275.85 km²
Llenda con Cantón d'Obwalden, Cantón de Lucerna, Cantón d'Uri, Cantón de Schwyz y Berna
Puntu más altu Rotstöckli (es) Traducir
Puntu más baxu Lago de los Cuatro Cantones (es) Traducir
Altitú media 454 m
Demografía
Población 43 223 hab. (31 avientu 2018)
Densidá 156,69 hab/km²
Más información
Estaya horaria UTC+01:00 y UTC+02:00
Fundación 1291 (Gregorianu)
nw.ch
Cambiar los datos en Wikidata

El cantón de Nidwalden o Unterwalden Baxu (n'alemán Nidwalden, en francés Nidwald, n'italianu Nidwaldo, en romanche Sutsilvania) ye un semicantón de Suiza Central y unu de los cantones montiegos (Waldstätten). La so capital ye la ciudá histórica de Stans.

Xunto col cantón d'Obwalden formaba'l cantón d'Unterwalden, unu de los trés cantones primitivos de l'Antigua Confederación Suiza.

Toponimia

El nome de Nidwalden vien deriváu del nome de Unterwalden. Nel so orixe, Unterwalden foi conocíu en llatín como inter xibles, que n'asturianu puede traducise como ente montes y n'alemán foi tomáu como Unterwalden. Depués, pa estremar los dos valles que constituyíen el territoriu de Unterwalden, l'unu foi llamáu ob dem Wald, ente que'l segundu foi llamáu nid dem Wald, qu'en 1803 nel Acta de Mediación ye mentáu como Nidwalden.

Historia

En 1291 los habitantes del cantón de Nidwalden xuniéronse xunto colos pueblos del cantón d'Uri y cantón de Schwyz pa formar el Pactu Federal de 1291 (Bundesbrief). Naquella dómina nun esistía un verdaderu estáu, pero a fines del sieglu XIV les primeres formes de gobiernu organizáu apaecieron. Estes comprendíen asamblees institucionales y cortes.

Nos sieglos XIV y XV, el cantón xuntóse col cantón d'Obwalden, anque los dos cantones nunca fueron realmente una sola entidá. Esta xunión yera llamada Unterwalden, y anque güei nun seya reconocida, dexó les sos repercusiones na historia de los dos cantones, pues al cuntar como semi-cantones, solo tienen derechu a unviar un representante al Conseyu de los Estaos en Berna.

Alredor del añu 1500 munches persones del cantón trabayaben como mercenarios. Dalgunos d'estos soldaos emigraron, lo que supunxo l'amenorgamientu de l'alta crecedera de la población. Una de les grandes destinaciones d'estos soldaos yera Alsacia. Dempués de sentir el rigor de la constitución de Napoleón, la idea de la revolución francesa nun foi perbién recibida nesti territoriu básicamente rural. El cantón de Nidwalden foi atacáu poles tropes franceses el 9 de setiembre de 1798. Al rematar la dominación francesa en 1814, la mayoría de los cambeos introducíos polos franceses fueron abolíos, foi solo hasta 1877 que'l cantón de Nidwalden aprueba la so primer constitución. Les asamblees públiques (Landsgemeinde) fueron abolíes en 1997.

Xeografía

El semicantón de Nidwalden ta asitiáu na rexón de Suiza Central. Al norte llenda col llagu de los Cuatro Cantones y los cantones de Lucerna y Schwyz, al este col cantón d'Uri, al sur y oeste col cantón d'Obwalden, y al sur col cantón de Berna.

L'altor máximu del cantón ye'l Rotstöckli con 2901 msnm, que ta asitiáu orográficamente nos Alpes uraneses. Sicasí, la mayor parte del territoriu del cantón ta asitiada sobre los Prealpes suizos (Prealpes de Lucerna). El puntu más baxu del cantón alcuéntrase a veres del llagu de los Cuatro Cantones. Finalmente, el cantón ye travesáu de sur a norte pel ríu Engelberger Aa, que desagua nel llagu de los Cuatro Cantones.

Demografía

El cantón de Nidwalden cunta con 43 223 hab. (31 avientu 2018)[1], lo que lo convierte nuno de los cantones menos poblaos de Suiza. De fechu namás los cantones d'Appenzell Rodes Interiores, Obwalden, Uri y Glaris son menos poblaos. Aproximao'l 10% de la población ye d'orixe estranxeru.

El 75% de la población reivindica ser de creencia católica, ente que'l 11,9% declaren ser protestantes. A Nivel llingüísticu, la llingua oficial del cantón ye l'alemán, faláu pol 92,5% de la población.[2] El dialeutu alemán-suizu faláu na rexón pertenez a la familia del Höchstalamanisch.

Política

Al interior de la Confederación, Nidwalden ye un semi-cantón, esto confiere-y tolos derechos d'un cantón ordinariu, cola esceición del Conseyu de los Estaos, nel cual cada cantón unvia dos representantes y cada semi-cantón solu unu.

El Landrat (parllamentu local) cuenta con 60 representantes escoyíos según el sistema proporcional por un periodu de cuatro años. L'executivu ye llamáu Regierungsrat (Conseyu de Gobiernu) y ta compuestu por siete miembros.

Engelberger Aa col Schlossberg al fondu.

Economía

Hasta finales del sieglu XX el cantón de Nidwalden yera básicamente agrícola. A partir de mediaos del sieglu XIX, el comerciu, la industria y el turismu empezaron a formar parte de la economía llocal. Güei un gran númberu de pequeñes y medianes empreses apoderen la economía. Pilatus Aircraft, empresa constructora d'aeroplanos, ye unu de los mayores suministradores de trabayu.

Árees tradicionales como la silvicultura y l'agricultura son inda importantes pa la economía llocal. L'agricultura ta especializada na ganadería y la producción de carne de caza.

Turismu

Gracies a la xeografía del territoriu, el turismu reviste d'un rol importante pa la economía cantonal. Los llagos y los montes atraen munchos turistes, seya mientres la estación iverniza, seya mientres la estación braniza. Los llugares que nun hai que dexar de visitar son: Klewenalp, Stanserhorn, Titlis, Bannalp y Bürgenstock.

Comuñes

El cantón de Nidwalden tien once comuñes: Beckenried, Buochs, Dallenwil, Emmetten, Ennetbürgen, Ennetmoos, Hergiswil, Oberdorf, Stans, Stansstad y Wolfenschiessen. La capital ye Stans.

Referencies

Enllaces esternos

This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.