Impautos direutos

El principal impautu ambiental direutu venceyáu colos caminos d'aldea, ye la erosión. N'efeutu, en zones bien emprunes y con munches precipitaciones ye frecuente que'l mal caltenimientu del sistema de drenaxe provoque llenes llocales y erosión nos cantos del camín. Per otru llau, en zones planes, puede cortar el fluxu natural de l'agua. El caltenimientu afayadizu de los caminos ye esencial pa evitar los problemes ambientales y socioeconómicos .

Otra fonte de contaminación orixinada nos caminos d'aldea ta venceyada a la producción de polvu, que puede perxudicar los cultivos próximos a les víes y ser inclusive perxudicial pa la salú, per otru llau el ruíu causáu pol tráficu tamién puede tener efeutos perxudiciales pa los seres humanos y animales.

Otres posibles fontes de contaminación de l'agua y del suelu son los químicos que se chisquen xunto al camín o na vía de pasaxe autorizáu, pa controlar los bardiales y el polvu.

Impautos indireutos

La construcción de los caminos d'entrada nes árees remotes afala la migración escontra los terrenes vecinos ya induz modelos d'usu del terrén y d'esplotación de los recursos que son desaxeradamente difíciles de remanar o controlar. Los resultaos pueden ser:

• El trestornu severu de los pueblos naturales;
• La conversión del monte en terrenes pal ganáu;
• La invasión de les zarces y la degradación de la tierra, produciendo l'eventual abandonu del área.

Allugamientu del camín

Camín en sable en Namibia.

L'allugamientu del camín constituye la decisión más crítica no que cinca a la so construcción. Esta va determinar, el tipu y la magnitú de los impautos ambientales y sociales que van causar. Los caminos d'aldea que más afeuten la redolada son los que:

• Traviesen les tierres de los pueblos indíxenes; o terrenes monteses críticos;
• Alterien l'equilibriu natural en zones con potenciales peligros naturales; árees que formen l'hábitat de la fauna montesa; y,
• Los que s'enfusen n'árees non aparentes pa los cambeos d'usu del suelu.

Impautos sociales positivos

La construcción d'un camín puede traer un ensame de beneficios pa la xente local, como por casu:

• Mayor accesu a los mercaos;
• Más servicios venceyaos col bienestar, tales como lletricidá, agua potable, servicios d'estensión, sistemes de créditu, servicios de salú y educación; estímulu a les agroindustries;
• Aumenta'l valor de los terrenes próximos pola mor l'usu más intensivu de la tierra;
• Mayores oportunidaes d'emplegu.
• Cambeos nos usos y métodos agrícoles que traen una medría de la producción y a superar l'agricultura de subsistencia con escedentes pa la venta y aumentu de prosperidá de los pueblos.

Impautos sociales negativos

Los principales inconvenientes que suelen presentase por causa de la construcción o cambéu sustancial de la rede de caminos d'aldea son:

• De cutiu, xuben los arriendos o camuda la propiedá o los derechos d'usu de los recursos, de les clases probes a les más riques;
• Puede afeutar negativamente a les minoríes étniques, que vivieron aisllaes xeográfica y políticamente del restu del país.