Bodhrán
tambor de marco (es)

El Bodhrán (AFI [ˈbɔːrɑːn] o [ˈbaʊrɑːn]; plural bodhráin) ye un tambor de marcu (frame drum) irlandés. El diámetru del marcu va dende los 25 a los 66 centímetros (10" ~ 26"), mentantu que'l fondu ye d'ente 9 y 20 centímetros (3 1/2" ~ 8"). El marcu ye asemeyáu a l'arnu o artesa pa facer quesu. El tamañu más emplegáu tien un marcu d'ente 35 y 45 centímetros (14" ~ 18") de diámetru con un fondu d'unos 10 centímetros (4"). A un llau del marcu afáyase una pelleya (o parche) terriáu y claváu al marco per aciu de tachueles. Davezu la pelleya ye de cabra, magar qu'anguaño suelen atopase bodhráin fechos con pelleyos d'otros animales como'l canguru o inclusive materiales sintéticos como'l kevlar. L'otru llau del marcu queda abiertu. Una o dos barres cruzaes nel interior del marcu refuercien la cadarma.

Dalgunos bodhráin modernos pa usu profesional empleguen tensores mecánicos que dexen camudar la tensión del parche, asemeyaos a los emplegaos nos tambores de les bateríes.

Davezu tócase sentáu, suxetándolu en vertical ente l'antebrazu y el troncu, col marcu sofitáu na rodiella, al empar que la mano métese pel llaú abiertu del tambor ente les barres cruzaes y la pelleya, cincando el llau interior de la pelleya, lo que dexa remanar llixeramente la tensión del parche y camudar el tonu. El tambor tócase cola mano llibre, dándo-y güelpes cola mano esnuda o faciendo usu d'un tarecu de maera nomáu baqueta (n'inglés tipper o beater).

Hai numberoses menes de tocalu, siendo la mayoría de los estilos denomaos col nome de la rexón d'Irlanda au s'orixinaren. El más afamáu ye l'estilu kerry, que fai usu de baqueta duble.

Abondo espardíu n'Irlanda, el bodhrán ganó popularidá nel mundu de la música celta, sobro tou n'Escocia, Bretaña, Asturies y Terranova.

Dalgunos grupos améstenlu na so música, como Llan de Cubel, The Corrs, The Chieftains... etc

Ver tamién

• Tambor
• Panderu

Referencies

Enllaces esternos

• Wikimedia Commons tien conteníu multimedia tocante a Bodhrán.