Mapa de los doce distritos de la Reserva Federal marcaos con círculos de color prietu y de los doce Bancos de la Reserva Federal marcaos con cuadraos prietos. Les sucursales dientro de cada distritu tán marcaes con círculos coloraos. La sede de Washington DC ta marcada con una estrella zarrada nun círculu prietu.

Un Bancu de la Reserva Federal ye un bancu rexonal del Sistema de la Reserva Federal, que ye'l bancu central de los Estaos Xuníos. Hai doce en total, ún por caún de los doce Distritos de la Reserva Federal creaos pola Llei de la Reserva Federal de 1913^[1]. Los bancos son responsables, en comuña, de poner en práutica la política monetaria afitada pol Comité Federal de Mercáu Abiertu (Federal Open Market Committee), y son los siguientes:

• Bancu de la Reserva Federal de Boston
• Bancu de la Reserva Federal de Nueva York
• Bancu de la Reserva Federal de Filadelfia
• Bancu de la Reserva Federal de Cleveland
• Bancu de la Reserva Federal de Richmond
• Bancu de la Reserva Federal d'Atlanta
• Bancu de la Reserva Federal de Chicago
• Bancu de la Reserva Federal de St. Louis
• Bancu de la Reserva Federal de Minneapolis
• Bancu de la Reserva Federal de Kansas City
• Bancu de la Reserva Federal de Dallas
• Bancu de la Reserva Federal de San Francisco

Dellos d'estos bancos tienen les sos propies sucursales, y la sé del Sistema de la Reserva Federal ta nel edificiu Eccles, en Washington DC.

Historia

Los 12 bancos de la Reserva Federal en 1936.

Los Bancos de la Reserva Federal son la cabera de les instituciones creaes a lo llargo'l tiempu pol gobiernu de los Estaos Xuníos pa exercer les funciones de bancu central. Primero d'ellos esistieron el Primer Bancu de los Estaos Xuníos (First Bank of the United States, 1791-1811), el Segundu Bancu de los Estaos Xuníos (Second Bank of the United States, 1818-1824), el Tesoru Independiente (Independent Treasury, 1846-1920) y el Sistema Bancariu Nacional (National Banking System, 1863-1935). La esistencia de tolos sos predecesores tuvo arrodiada por debates políticos de toa mena: sobre'l gráu d'influyencia nellos de los intereses privaos, sobre la so forma de conciliar les preocupaciones económiques de les distintes rexones, sobre les midíes tomaes pa prevenir los pánicos financieros, sobre'l tipu de reserves usáu pa respaldar la emisión de moneda...

La crisis financiera conocida como Pánicu de 1907 amenazó con arruinar a dellos bancos de Nueva York, que consiguieron sobrevivir gracies a préstamos iguaos pol banqueru J.P. Morgan. Esti consiguió, con estos préstamos, devolver la confianza a la comunidá de banqueros de Nueva York, pero la crisis punxera n'evidencia la debilidá d'un sistema financieru, el estauxunidense, tan feble qu'un banqueru priváu podía imponer les sos condiciones pa garantizar la sobrevivencia d'un bancu. Notres partes del país, al tiempu, delles cámeres de compensación interbancaria emitíen los sos propios billetes, válidos nel ámbitu de los negocios. En respuesta a la crisis el gobiernu federal creó la Comisión Monetaria Nacional (National Monetary Commission), col envís de qu'estudiara opciones pa poder apurrir moneda y creitu nes crisis vinientes. El resultáu de los sos trabayos foi la creación del Sistema de la Reserva Federal, qu'estableció una serie de Bancos de la Reserva Federal p'apurrir liquidez a los bancos de les estremaes rexones del país. Estos bancos abrieron les sos puertes en payares de 1914.

Estatus llegal

Los Bancos de la Reserva Federal organícense como corporaciones, autofinanciaes y col mandatu del Congresu de distribuyir la moneda y regular el so valor acordies coles polítiques alcordaes pol Comité Federal de Mercáu Abiertu y el Conseyu de Gobernadores de los Bancos. La so estructura corporativa espeya los intereses comunes del gobiernu y los bancos miembros, pero dengún d'estos intereses equival a una propiedá absoluta. Los tribunales establecieron qu'estos bancos nun son, con calter xeneral, nin privaos nin públicos, pero pueden ser trataos como cualesquier de les dos cosas en función de lo que se tea xulgando. Asina, nel casu United States Shipping Board Emergency Fleet Corporation v. Western Union Telegraph Co^[2]. el Tribunal Supremu afitó que «les axencies como los bancos nacionales o los bancos de la reserva federal, nos que concurren intereses privaos, nun son departamientos del gobiernu: son corporaciones privaes nes que'l gobiernu tien un interés». Los Estaos Xuníos tienen un interés nos Bancos de la Reserva Federal como axencies de creación federal exentes del pagu d'impuestos y que los sos beneficios pertenecen al gobiernu federal, pero esti interés nun quier dicir propiedá^[3].

La Llei de la Reserva Federal de 1913 apurrió capital inicial pa formar los Bancos de la Reserva pidiendo a los bancos que participaron na so creación que mercaren acciones del Bancu de la Reserva en cantidá proporcional a los sos activos. Estes acciones dan un dividendu de los beneficios del Bancu de la Reserva, pero sacante nesto son totalmente distintes de les acciones de cualesquier otra compañía privada: nun pueden ser puestes a la venta, tresferíes o emprestaes, y nun dan derechu de propiedá sobre los superávits del Bancu de la Reserva^[4]. Amás, la cantidá d'acciones de cada bancu nun da drechos de votu proporcional a la hora d'escoyer a los directores: cada bancu miembru recibe trés votos pa elixir a seis de los nueve directores del Bancu de la Reserva, que tienen que cumplir unos requisitos que recueye la Llei de la Reserva Federal. Si dalgún de los Bancos de la Reserva fora disueltu o liquidáu los bancos que participaron na so creación podríen recuperar el capital qu'invirtieran nelli, pero los superávits que podiera haber seríen propiedá del gobiernu federal.

No que cinca a la rellación estructural ente los doce Bancos de la Reserva Federal y los bancos comerciales que tienen acciones nellos el profesor de ciencia política Michael D. Reagan escribió que «la "propiedá" de los Bancos de la Reserva polos bancos comerciales ye simbólica: estos nun exercen los drechos de control asociaes col conceptu de propiedá nin comparten, sacante'l dividendu recoyíu nos estatutos, los "beneficios" del Bancu de la REserva. La propiedá y el drechu d'eleición de directores, asina, nun tienen significación denguna más allá de l'apariencia superficial de control de los Bancos de la Reserva polos bancos privaos que la so estructura formal espeya».^[5]

Funciones

Los Bancos de la Reserva Federal ufren diversos servicios al gobiernu federal y a los bancos privaos:

• Son los depositarios de les reserves de los bancos privaos.
• Emprestén-yos capital a los bancos pa cubrir déficits de fondos a cortu plazu, seya por la estacionalidá de los sos negocios o por demandes estraordinaries de liquidez.
• Recoyendo y repartiendo pagos ente diferentes bancos
• Emitiendo moneda, en forma de billetes de bancu, pa la circulación xeneral
• Alministrando los depósitos del gobiernu federal
• Dirixendo la emisión y recompra de deuda federal.

Históricamente los Bancos de la Reserva compensaben a los sos bancos miembros por guardar les sos reserves en depósitu, y poro calteniéndoles inutilizaes pal préstamu, pagándo-yos un dividendu sobro les sos ganancies, llimitáu por llei al 6%. La Llei d'Estabilización Económica d'Emerxencia de 2008 (Emergency Economic Stabilization Act (EESA) of 2008) autorizó, adicionalmente, a los Bancos de la Reserva a pagar intereses por eses reserves, y la Llei FAST de 2015 impúso-yos un dividendu adicional, con un límite igual al rendimientu de los bonos del Tesoru a diez años na emisión de deuda pública más reciente.

Magar que tolos Bancos de la Reserva tienen autoridá llegal pa realizar operaciones nel mercáu abiertu, na práctica namás el de Nueva York lo fai. Esti dirixe el SOMA (System Open Market Account), un portfolio d'acciones y valores propiedá del gobiernu o garantizaes por esti que ye compartíu pol conxuntu de los Bancos de la Reserva Federal.

Finances

Cada Bancu de la Reserva xestiona les sos propies operaciones, en principiu col capital obteníu polos intereses de los sos préstamos y el de los valores de la so cartera. Los gastos y dividendos que paguen son, xeneralmente, una pequeña parte de los sos beneficios añales, y pueden retener parte de les sos ganancies nos sos propios fondos de superávit, que tienen por llei un límite máximu, nacional, de 7.500 millones de dólares. El restu de les ganancies tresfiérense, al traviés del Conseyu de Gobernadores, al Secretariu del Tesoru, que les deposita nel fondu xeneral de capital del Tesoru^[6].

Los Bancos de la Reserva capitalizáronse, históricamente, con depósitos d'oru, y en 1933 tolos depósitos privaos d'oru-moneda foron tresferíos, pola Orde Executiva 6102, a ellos. Esti oru foi tresferíu dempués, a través de la Llei de Reserves d'Oru de 1934, al Tesoru, que dió-yos a los propietarios certificaos de posesión d'oru que nun pueden, coles lleis actuales, redimíos. Los Bancos de la Reserva siguen incluyendo estos certificaos nos sos balances magar que nun representen una propiedá directa d'esi oru, y el Conseyu de Gobernadores almitió por escritu que «la Reserva Federal nun tien oru de so»^[7].

Los Bancos de la Reserva sométense a auditoríes internes p'asegurase de que les sos cuentes tán bien llevaes y cumplen colos principios de gobernanza del Sistema de la Reserva Federal. Hai, amás, dos tipos d'auditoría esterna. De magar 1978 la Oficina de Contabilidá del Gobiernu (Government Accountability Office, GAO) tien desarrollao auditoríes regulares de les sos operaciones, con resultaos que se faen públicos; sicasí, nun pueden revisar les decisiones del bancu en materia de política monetaria, y tampoco faceles públiques. D'otra banda, dende 1999 cada bancu tien la obligación de sometese añalmente a una auditoría por una firma esterna, qu'ellabora un informe confidencial pal bancu y un resumen d'elli que se fai públicu nel informe añal del bancu. Dellos miembros del Congresu siguen puxando por que se fagan auditoríes más públiques y estenses al traviés del GAO^[8], pero los responsables de la Reserva Federal sofiten el modelu actual, que según ellos evita la influyencia de los políticos nel desarrollu de les decisiones de política monetaria a llargu plazu^[9].

Bancos

Edificiu del Bancu de la Reserva Federal de Nueva York.

La Reserva Federal identifica oficialmente los sos distritos por númberu y pol nome de la ciudá del Bancu de la Reserva correspondiente. Son:

• 1st District (A) - Federal Reserve Bank of Boston
• 2nd District (B) - Federal Reserve Bank of New York
• 3rd District (C) - Federal Reserve Bank of Philadelphia
• 4th District (D) - Federal Reserve Bank of Cleveland, con sucursales en Cincinnati y Pittsburgh.
• 5th District (E) - Federal Reserve Bank of Richmond, con sucursales en Baltimore y Charlotte.
• 6th District (F) - Federal Reserve Bank of Atlanta, con sucursales en Birmingham, Jacksonville, Miami, Nashville y Nueva Orleans.
• 7th District (G) - Federal Reserve Bank of Chicago, con una sucursal en Detroit.
• 8th District (H) - Federal Reserve Bank of St. Louis, con sucursales en Little Rock, Louisville y Memphis.
• 9th District (I) - Federal Reserve Bank of Minneapolis, con una sucursal n'Helena.
• 10th District (J) - Federal Reserve Bank of Kansas City, con sucursales en Denver, Oklahoma City y Omaha.
• 11th District (K) - Federal Reserve Bank of Dallas, con sucursales n'El Paso, Houston y San Antonio.
• 12th District (L) - Federal Reserve Bank of San Francisco, con sucursales en Los Angeles, Portland, Salt Lake City y Seattle.

El distritu de Nueva York ye'l mayor en términos de valor de los sos activos. Los que cubren una mayor estensión xeográfica son, por esti orden, San Francisco, Kansas City y Minneapolis. Missouri ye l'únicu estáu que tien dos bancos de la reserva, y hai dellos estaos que tienen dos o más sucursales nel so territoriu: California, Florida, Missouri, Ohio, Pennsylvania, Tennessee y Texas. La sucursal de Seattle, nel distritu 12, atiende les necesidaes monetaries d'Alaska, y el bancu de San Francisco les de Ḥawai. No que cinca a los territorios non estatales, atiéndenlos les siguientes sucursales: el bancu de Nueva York a Puertu Ricu y les Islles Vírxenes Americanes; el bancu de Richmond al distritu de Columbia; y el bancu de San Francisco a Samoa Americana, Guam y les Islles Marianes del Norte. Les llendes de los distritos foron revisaes por cabera vez pol Conseyu de Gobernadores en febreru de 1996^[10].

Activos

Referencies

Enllaces esternos